ސެލަޓަވީގޯ އަތުން ބަލިވެ ބާސެލޯނާ ލީގުގެ ހަތަރުވަނައަށް ވެއްޓިއްޖެ.

ސްޕެނިޝް ލީގުގައި ރޭ ކުޅުނު މެޗުން ބާސެލޯނާ ބަލިވެއްޖެއެވެ.

ބާސާ ރޭ ބަލިވީ ސެލްޓަވީގޯ އާއި ބައްދަލުކުރި މެޗުން 3-4 ގެ ނަތީޖާއަކުންނެވެ.

އިޝްތިހާރު

ސެލްޓަވީގޯގެ އަމިއްލަ ދަނޑުގައި ކުޅުނު މި މެޗުގައި އެޓީމުގެ ފަރާތުން ރަނގަޅު ކުޅުމެއް ފެނިގެން ދިޔައިރު އެޓީމުން ވަނީ މެޗުގެ 22 ވަނަ މިނެޓުގައި ލަނޑުޖަހާ ލީޑުނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ޕިއޯނޭ ސިސްޓޯއެވެ. ސިސްޓޯ ލަނޑުޖަހާ ލީޑުނަގައިދިންތާ މާ ގިނައިރެއް ނުވެ އަސްޕަސް ވަނީ ސެލްޓަވީގޯ ގެ ދެވަނަ ލަނޑުޖަހާ ލީޑު ފުޅާކޮށްދީފައެވެ.

ސެލްޓަވީގޯއިން އެޓީމުގެ ތިންވަނަ ލަނޑުޖަހާ ލީޑު އިތުރަށް ފުޅާކުރީ މެޗުގެ 33 ވަނަ މިނެޓުގައި ބާސެލޯނާގެ ޖެރެމީ މެތީއު އަތުން ބައިކޮޅަށް ވަތް ލަނޑަކުންނެވެ.

ތިން ގޯލުގެ ލީޑަކާއެކީ ފުރަތަމަ ހާފް ސެލްޓާއިން ނިންމާލިއިރު ދެވަނަ ހާފްގެ ކުރީކޮޅު ޖެރާޑް ޕީކޭ ވަނީ ބާސާއަށް އެޓީމގެ ފުރަތަމަ ލަނޑު ކާމިޔާބުކޮށްދީފައެވެ. އަދި މެޗުގެ 64 ވަނަ މިނެޓްގައި ބާސާއަށް ލިބުނު ޕެނަލްޓީއަކުން  ނޭމާ ވަނީ އެޓީމުގެ ދެވަނަ ލަނޑު ޖަހާ ނަތީޖާގެ ފަރަގު އެޓީމަށް ކުޑަކޮށްދީފައެވެ.

މި ގޯލަށްފަހު ނަތީޖާ އެއްވަރުކުރުމަށް ބާސާއިން މަސައްކަތްތަކެއް ކުރަމުންދަނިކޮށް މެޗުގެ 77 ވަނަ މިނެޓްގައި ޕަބްލޯ ހަނާންޑޭޒް ވަނީ ސެލްޓާގެ ހަތަރުވަނަ ގޯލް ކާމިޔާބުކޮށްދީ ލީޑު އިތުރަށް ފުޅާކޮށްފައެވެ.

ބާސާގެ ތިންވަނަ ލަނޑު ކާމިޔާބު ކޮށްފައިވަނީ މެޗުގެ 87 ވަނަ މިނެޓްގައި ފުރަތަމަ ލަނޑުވެސް އެޓީމަށް ކާމިޔާބު ކޮށްދިން ޖެރާޑް ޕީކޭ އެވެ.

މި މެޗުން ސެލްޓަވީގޯ އަތުން ބާސެލޯނާ ބަލިވިއިރު މިއީ އެޓީމު ލީގުގައި ބަލިވި ދެވަނަ މެޗުކަން ފާހަގަކޮށްލެވެއެވެ. އެޓީމު މީގެކުރިން ބަލިވެފައިވަނީ ލީގަށް އަލަށް މިފަހަރު ޕްރޮމޯޓްވި އަލަވޭސް އަތުންނެވެ.

ރޭގެ މި ބާސެލޯނާ ވަނީ 13 ޕޮއިންޓާ އެކު ލީގުގެ 4 ވަނަ އަށް ވެއްޓިފައެވެ. ރެއާލް އޮތީ 15 ޕޮއިންޓާއެކީ ލީގުގެ ދެވަނައިގައެވެ. 15 ޕޮއިންޓާއެކީ އެތްލެޓިކޯ މެޑްރިޑް ލީގުގެ އެއްވަނައިގައި އޮތްއިރު އެޓީމަށް ކުރި ލިބެނީ ގޯލުގެ ތަފާތުންނެވެ.