ޗައިނާ އާއި ފަލަސްތީނު ކުޅުނު މެޗު 5-0 އިން ފަލަސްޠީނު ކާމިޔާބުކޮށްފި
ޗޮންގްކިންގްގައި ޗައިނާއާ ދެކޮޅަށް ކުޅުނު މެޗުން ފަލަސްތީނުގެ ފުޓްބޯޅަ ޓީމު 5-0 އިން މޮޅުވެއްޖެ އެވެ.
މި މެޗުގައި އަސަދު އަލް-ހަމްލާވީ އަދި އަދީ ދައްބާޣް، މިއިން ކޮންމެ ކުޅުންތެރިއަކު ދެ ލަނޑު ކާމިޔާބުކުރި އެވެ.
މިއީ ނިއުޒީލެންޑާ ދެކޮޅަށް ކުޅެ 2-2 އިން އެއްވަރުވުމާއި، ތަޖިކިސްތާން އަތުން 4-2 އިން މޮޅުވި މެޗަށްފަހު ފަލަސްތީނުން ހޯދި ކާމިޔާބީއެކެވެ.
ޗައިނާގައި ކުރިއަށްދިޔަ ތަމްރީނު ކެމްޕޭނުގެ ފަހު މެޗުގައި، ހުކުރު ދުވަހު ބޮޑު ތަފާތަކުން މޮޅުވެ، ފަލަސްޠީނުން ވަނީ ބަލިނުވެ ތިން މެޗުގެ ސިލްސިލާ ނިންމާލާފަ އެވެ.
މެޗުގެ 16 ވަނަ މިނެޓުގައި އަސަދު އަލް-ހަމްލާވީ ފަލަސްތީނަށް ކުރިހޯދައިދިންއިރު، އޭގެ އަށް މިނެޓު ފަހުން ޒައިދު އަލް-ގަންބަރު ތަނަވަސްކޮށްދިން ފުރުސަތަކުން އޭނާ ވަނީ ދެވަނަ ލަނޑު ޖަހައިދީފަ އެވެ.
މެޗުގެ 37 ވަނަ މިނެޓުގައި ނަތީޖާގެ ފަރަގު ކުޑަކުރުމަށް ޗައިނާއަށް ފުރުސަތެއް ލިބުނު ނަމަވެސް، ޗައިނާގެ ތާއޯ ކިއަންގް ފޮނުވާލި ހަމަލާ ފަލަސްޠީނުގެ ގޯލްކީޕަރު ރާމީ ހަމާދާ ވަނީ ހުށިޔާރުކަމާއެކު ދިފާއުކޮށްފަ އެވެ.
ފުރަތަމަ ހާފުގެ އިތުރު ވަގުތުގެ ތެރޭގައި އޮމިދު މަހަޖްނާ ތަނަވަސްކޮށްދިން ފުރުސަތަކުން އަދީ ދައްބާޣް ވަނީ ޓީމުގެ ތިންވަނަ ލަނޑު ކާމިޔާބުކޮށްދީފަ އެވެ. އަދި 55 ވަނަ މިނެޓުގައި އޭނާ އިތުރު ލަނޑެއް ޖަހައި ނަތީޖާ 4-0 އަށް ބަދަލުކުރިއިރު، މެޗުގެ އެންމެ ފަހު ސިކުންތުކޮޅުގެ ތެރޭގައި ފަލަސްޠީނުގެ ފަސްވަނަ ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އަހުމަދު އަލް-ގާގް އެވެ.
2027 ވަނަ އަހަރުގެ އޭއެފްސީ އޭޝިއަން ކަޕަށް ތައްޔާރުވުމުގެ ގޮތުން ކުޅުނު މި ތިން މެޗުގައި ފަލަސްތީނުން ޖުމްލަ 11 ލަނޑު ޖަހާފައިވާއިރު، ބައިކޮޅަށް ވަދެފައިވަނީ ހަތަރު ލަނޑެވެ.
މިލިޔުން ކިޔާލުމުން
