ޔުނައިޓެޑަށް ސްޓޯކް ސިޓީ އަތުންވެސް މޮޅެއް ނުވެވުނު.
އިނގިރޭސި ޕްރިމިއަރ ލީގުގައި މިއަދު ހަވީރު މެންޗެސްޓަރ ޔުނައިޓެޑާއި ސްޓޯކް ސިޓީ ބައްދަލުކުރި މެޗު އެއްވަރުވެގެން ނިމިއްޖެއެވެ.
މި ދެޓީމް ބައްދަލުކުރި މެޗު އެއްވަރުވެގެން ގޮސްފައިވަނީ 1-1 ގެ ނަތީޖާއިންނެވެ.
ޔުނައިޓެޑްގެ އަމިއްލަ ދަނޑުގައި ކުޅުނު މި މެޗުގެ ފުރަތަމަ ހާފްގައި ޔުނައިޓެޑުގެ ފަރާތުން ރަނގަޅަށް ކުޅުމެއް ފެނިގެން ދިޔައިރު އެޓީމަށް މިހާފުގައި ވަނީ ގޯލްޖަހާނެ ރަނގަޅު ފުރުސަތުތަކެއް ލިބި ބޭކާރުވެގެން ގޮސްފައެވެ.
އެގޮތުން އެޓީމާ މި ސީޒަނުގައި އަލަށް ގުޅުނު ތަޖުރިބާ ފޯވާޑް ޒަލަޓާން އިބްރަހިމޮވިޗް އާއި ލިންގާޑް ފޮނުވާލި ހަމަލާތައް ފާހަގަ ކޮށްލެވެއެވެ.
މި މެޗުގެ ފުރަތަމަ ހާފު ލަނޑެއް ނުޖެހި އެއްވަރެއްގައި އޮވެ ނިމުނު ނަމަވެސް ފަހު ހާފުގެ 69 ވަނަ މިނެޓްގައި ބަދަލު ކުޅުންތެރިއެއްގެ ގޮތުގައި މި މެޗުގައި ކުޅެން އެރި، އެންތޮނީ މާޝިއަލް ވަނީ ލަނޑެއް ޖަހާ ޔުނައިޓެޑަށް ލީޑުނަގާދީފައެވެ.
މި ގޯލާއެކީ ޔުނައިޓެޑުން އިތުރަށް ކުޅުން ބަރުގަދަ ކުރިއިރު ސްޓޯކްގެ ގޯލަށް އެޓީމުން ވަނީ ނުރައްކާތެރި ގިނަ ހަމަލާތަކެއް ވެސް ފޮނުވާލާފައެވެ.
އެހެން ނަމަވެސް އިތުރު ލަނޑެއް ކާމިޔާބު ނުކުރެވުނު އިރު ސްޓޯކް ސިޓީން ވަނީ މެޗުގެ 82 ވަނަ މިނެޓްގައި ލަނޑުޖަހާ ނަތީޖާ އެއްވަރުކޮށްފައެވެ. މި ލަނޑު އެޓީމަށް ޖަހައިދިނީ މިޑްފިލްޑަރު ޖޯ އެލެން އެވެ.
ސްޓޯކު ގެ މި ލަނޑަށް ފަހު ވެސް ޔުނައިޓެޑަށް ވަނީ ނަތީޖާ އަނބުރާލަން ރަނގަޅު ފުރުސަތެއް ލިބިގެން ގޮސްފައެވެ. އެހެން ނަމަވެސް ޕޮގްބާ މުޅިން ހުސްކޮށް ހުރެ ފޮނުވާލި މި ހަމަލާ އަމާޒުވީ ގޯލުގެ ހުރަސް ދަނޑިއަށެވެ.
މި ނަތީޖާއާއެކު ޔުނައިޓެޑް އޮތީ 13 ޕޮއިންޓާއެކީ ލީގުގެ ހަވަނައިގައެވެ. ސްޓޯކް ސިޓީ އޮތީ 3 ޕޮއިންޓާއެކީ ލީގުގެ 19 ވަނައިގައެވެ.
ލީގުގައި ޔުނައިޓެޑް ދެން ބައްދަލުކުރާނީ ލިވަޕޫލްއާއެވެ.
މިލިޔުން ކިޔާލުމުން
