މާދަމާއިން ފެށިގެން 3 ހަފުތާއަށް މެލޭޝިއާ ފުރަބަންދު ކުރަން ނިންމައިފި
ކޮވިޑުގެ 3 ވަނަ ރާޅާއެކު މެލޭޝިއާގައި ކޮވިޑުގެ ހާލަތު އިތުރަށް ގޯސްވަމުންދާތީ، 3 ހަފުތާއަށް އެގައުމު ފުރަބަންދު ކުރަން ނިންމައިފި އެވެ.
ޚަބަރުތައް ބުނާ ގޮތުން މާދަމާއިން ފެށިގެން ޖޫން ހަތްވަނަ ދުވަހާ ހަމައަށް އެ ގައުމުގެ ހުރިހާ ސަރަހައްދެއް ފުރަބަންދުކުރަން މިހާރުވަނީ ނިންމާފަ އެވެ.
މި ދުވަސްތަކުގައި ބޮޑެތި އެއްވުންތަކާއި ފިތުރު އީދު ފާހަގަ ކުރުމުގެ ގޮތުން ގާތް ތިމާގެ ގެތަކަށް ޒިޔާރަތްކުރުމާއި އާއްމު ތަންތަނަށް އެއްވެ އުޅުން މަނާވާނެ ކަމަށް އެ ގައުމުގެ ބޮޑު ވަޒީރު މުޙްޔިއްދީން ޔާސީން އިއްޔެ ވަނީ ވިދާޅުވެފަ އެވެ.
އެހެންނަމަވެސް 50 މީހުންނަށްވުރެ ގިނަ ނުވާނެހެން މިސްކިތްތަކުގައި އީދު ނަމާދު ކުރެވޭނެ ކަމަށް ވަނީ ވިދާޅުވެފަ އެވެ. އަދި ފަރުޟު ފަސް ނަމާދާއި ހުކުރު ނަމާދުގެ ޖަމާއަތު ވެސް ކުރިއަށް ގެންދެވޭނީ މިގޮތުގެ މަތިން ކަމަށް ބޮޑުވަޒީރު ވަނީ ވިދާޅުވެފަ އެވެ.
ބޮޑުވަޒީރު މުހްޔިއްދީން ޔާސީން ވިދާޅުވީ ފުރަބަންދު ކުރިޔަސް އިގްތިސާދީ ސިނާއަތްތައް ހުއްޓުމެއްނެތި ކުރިއަށް ދާނެ ކަމަށެވެ. އަދި ގޭގައި ތިބެގެން މުވައްޒަފުންނަށް މަސައްކަތް ކުރެވޭނެ ގޮތް، ވަޒީފާ ދޭ ފަރާތްތަކުން ހަމަޖައްސައިދިނުމަށް ވެސް އޭނާ ވަނީ އިލްތިމާސް ކުރައްވާފަ އެވެ.
މެލޭޝިއާ އަކީ ގިނަ އަދަދަކަށް ދިވެހީންވެސް އުޅޭ ގައުމަކަށް ވާއިރު، ކޮވިޑުގެ 3 ވަނަ ރާޅުގައި ދުވާލަކަށް ޕޮޒިޓިވްވާ މީހުންގެ ޢަދަދު އުޅެނީ 4000 ން މަތީގަ އެވެ.
މިލިޔުން ކިޔާލުމުން
