
ޔާސީން ސޫރަތުގެ ތަފްސީރު 2
لِتُنذِرَ قَوْمًا مَّا أُنذِرَ آبَاؤُهُمْ فَهُمْ غَافِلُونَ (6)
އެއުރެންގެ ކާބަފައިންނަށް إنذار ކުރައްވާފައިނުވާ ބަޔަކަށް ކަލޭގެފާނު إنذار ކުރެއްވުމަށްޓަކައެވެ. ފަހެ، އެއުރެންނީ غافل ވެގެންވާ ބަޔެކެވެ
ޚުލާޞާ މާނަ:
ކަލޭގެފާނަށް މި ފޮތް ބާލުއްވައިދެއްވީ، ޢަރަބީންނަށް އިންޒާރު ކުރެއްވުމަށްޓަކައެވެ. އެބައިމީހުންގެ ގާތަށް މީގެ ކުރިން އެއްވެސް ރަސޫލަކު ވަޑައިގެން އިންޒާރު ކުރައްވާފައެއް ނުވެއެވެ. އެބައިމީހުންވަނީ އީމާންކަމާއި ތައުޙީދާ ދުރުގައި، ޣާފިލުކަމެއްގެ ތެރޭގައެވެ. ކޮންމެ އުއްމަތަކަށްވެސް އިންޒާރުދޭނެ ފަރާތެއް ބޭނުންވާ ފަދައިން، މި އުއްމަތަށްވެސް އިންޒާރު ކުރައްވާނެ ރަސޫލަކު ބޭނުންވެއެވެ.
ޖަލާލައިނި ތަފްސީރު:
”އިންޒާރު ކުރެއްވުމަށްޓަކައި“ މި ބަސްފުޅު ގުޅިފައިވަނީ ވަޙީ ބާލުއްވައިދެއްވި މަޤްޞަދާއެވެ. ”އެބައިމީހުންގެ ކާބަފައިންނަށް އިންޒާރު ލިބިފައިނުވާ“ ބަޔަކަށް، އެބަހީ: ވަކި މުއްދަތަކަށް ރަސޫލަކު ވަޑައިނުގެން އޮތުމުގެ ސަބަބުން އެބައިމީހުން ތިބީ އީމާންކަމާއި ހިދާޔަތުން ”ޣާފިލުވެފައެވެ“.
އައްސަޢުދީ ތަފްސީރު:
ﷲ ސުބުޙާނަހޫ ވަތަޢާލާ އެކަލާނގެ ރިސާލަތާއި އެކަމުގެ ހެކިތަކުގެ މައްޗަށް ހުވާކުރެއްވުމަށްފަހު، މި ރިސާލަތަށް މީސްތަކުން ބޭނުންވެފައިވާ މިންވަރު ބަޔާންކުރައްވައި ވަޙީކުރެއްވިއެވެ: އެބައިމީހުންގެ ކާބަފައިންނަށް އިންޒާރު ލިބިފައިނުވާ ބަޔަކަށް އިންޒާރު ކުރައްވާށެވެ. އެބައިމީހުންނަކީ އީމާންކަމުގެ ފޮތްތަކާއި ރަސޫލުންގެ މަގުން އެއްކިބާވެފައިވާ، ޖާހިލުކަމާއި މަގުފުރެދުމުގެ ތެރޭގައި ތިބި އުއްމީ ޢަރަބީންނެވެ. އެހެންކަމުން ﷲ ގެ ނިޢުމަތް ޚާއްޞަ ގޮތެއްގައި ޢަރަބީންނަށް އަދި ޢާންމު ގޮތެއްގައި މުޅި އިންސާނިއްޔަތަށް މި ފޮތުގެ ސަބަބުން މިންވަރުކުރެއްވިއެވެ.
ނަމަވެސް، އިންޒާރު ލިބުމަށްފަހު މީސްތަކުން ދެ ބަޔަކަށް ބެހިގެންދިޔައެވެ. އެއްބަޔަކީ ތެދުބަސް ޤަބޫލުކޮށް އިންޒާރުގެ ބޭނުން ހިފި މީހުންނެވެ. އަނެއް ބަޔަކީ އެކަން ޤަބޫލުނުކުރި މީހުންނެވެ. އެބައިމީހުންނާ ބެހޭގޮތުން ﷲ ވަޙީކުރެއްވިއެވެ: ”ހަމަކަށަވަރުން، އެބައިމީހުންގެ ތެރެއިން ގިނަ މީހުންގެ މައްޗަށް ބަސްފުޅު (ޢަޛާބުގެ ވަޢުދު) ޙައްޤުވެއްޖެއެވެ. ފަހެ، އެބައިމީހުން އީމާނެއް ނުވާނެއެވެ.“
لَقَدْ حَقَّ الْقَوْلُ عَلَىٰ أَكْثَرِهِمْ فَهُمْ لَا يُؤْمِنُونَ (7)
ހަމަކަށަވަރުން، އެއުރެންކުރެން ގިނަމީހުންގެ މައްޗަށް ކޯފާގެ ބަސްފުޅު حق ވެއްޖެކަން ކަށަވަރެވެ. ފަހެ، އެއުރެން إيمان އެއް ނުވާނެތެވެ.
ޚުލާޞާ މާނަ:
މި މީސްތަކުންގެ ގާތަށް ﷲ ގެ ޙަޟްރަތުން ރަސޫލަކު މެދުވެރިކޮށް ޙައްޤު އައުމުންވެސް، އެބައިމީހުން އެއަށް އީމާންނުވެ ދެކޮޅުވެރިވުމުގެ ސަބަބުން، އެބައިމީހުންގެ މައްޗަށް ޢަޛާބު ދެއްވުމަށް ﷲ ކަނޑައަޅުއްވައިފިއެވެ. އެބައިމީހުންވަނީ ކާފިރުކަންމަތީ ދެމިތިބެފައެވެ. ސަބަބަކީ އެބައިމީހުން ﷲ އަށާއި އެކަލާނގެ ރަސޫލާއަށް އީމާންނުވެ، ޙައްޤު ގޮތުގައި ޢަމަލުނުކުރާތީއެވެ.
ޖަލާލައިނި ތަފްސީރު:
”ބަސްފުޅު ޙައްޤުވެއްޖެއެވެ“ މާނައަކީ، އެބައިމީހުންގެ ތެރެއިން ގިނަ ބަޔަކަށް ޢަޛާބު ދެއްވުން ލާޒިމްވެއްޖެއެވެ. އެއީ އެބައިމީހުން އީމާންނުވާނެކަން ކަށަވަރުވެފައިވާތީއެވެ.
އައްސަޢުދީ ތަފްސީރު:
އެބައިމީހުން ކާފިރުކަމާއި ޝިރުކުގެ ތެރޭގައި ދެމިތިބޭނެކަން ﷲ ގެ މިންވަރުފުޅުގައިވެއެވެ. ޙައްޤު ހުށަހެޅުމުން އެއަށް ފުރަގަސްދިނުމުގެ ސަބަބުން، އެބައިމީހުންގެ މައްޗަށް ޢަޛާބުގެ ބަސްފުޅު ޙައްޤުވީއެވެ. އެއަށްފަހު، އެބައިމީހުންގެ ހިތްތަކުގައި ސިއްކަޖެހި، ތެދުމަގުން މަޙްރޫމްވިއެވެ.
إِنَّا جَعَلْنَا فِي أَعْنَاقِهِمْ أَغْلَالًا فَهِيَ إِلَى الْأَذْقَانِ فَهُم مُّقْمَحُونَ (8)
ހަމަކަށަވަރުން، ތިމަންރަސްކަލާނގެ އެއުރެންގެ ކަނދުރާތަކުގައި ކަސްތަޅުތަކެއް ލެއްވީމެވެ. ފަހެ، އެ ކަސްތަޅުތައް ދަތްދޮޅިތަކާ ހަމަޔަށް ހުންނަހުށްޓެވެ. ފަހެ، އެއުރެންވަނީ ބޯތައް އުފުލިގެންނެވެ.
ޚުލާސާ މާނަ:
އެބައިމީހުންގެ މިސާލަކީ، ކަރުގައި ކަސްތޮޅު އެޅި، އެބައިމީހުންގެ އަތްތައް ދަތްދޮޅިދަށުން ކަރާ އެކު ބަނދެވިފައިވާ ބައެއްގެ މިސާލެވެ. އޭގެ ސަބަބުން އެބައިމީހުންގެ ބޯތައް އުޑާ ދިމާއަށް އުފުލިފައިވާއިރު، ބޯ ތިރިކުރުމުގެ ކުޅަދާނަކަން އެބައިމީހުންނަށް ލިބިގެންނުވެއެވެ. މިއީ އެބައިމީހުން ﷲ އަށް އީމާންވުމުން އެއްކިބާވެ، އެކަލާނގެ އަމުރުފުޅުތަކަށް ބޯނުލަނބާ މިންވަރު ބަޔާންކޮށްދޭ މިސާލެކެވެ.
ޖަލާލައިނި ތަފްސީރު:
”ތިމަންރަސްކަލާނގެ އެބައިމީހުންގެ ކަރުތަކުގައި ކަސްތޮޅުތަކެއް އެޅުއްވީމެވެ.“ މިތާނގައި ކަސްތޮޅު އެޅުއްވުމުގެ މާނައަކީ އަތްތަކާއެކު ކަރުގައި ބަނދެވުމެވެ. ސަބަބަކީ ކަސްތޮޅަކީ އަތާއި ކަރު އެއްކޮށްލާ އެއްޗެކެވެ. ”އެ ކަސްތޮޅުތައްވަނީ ދަތްދޮޅިތަކާ ހަމައަށް ފޯރާފައެވެ.“ އެބަހީ، އަތްތައްވަނީ ދަތްދޮޅިތަކާ ހަމައަށް އުފުލި، ކަރުގައި ބަނދެވިފައެވެ. ”އެހެންކަމުން އެބައިމީހުންގެ ބޯތައް ވަނީ އުފުލިފައެވެ.“ އެބައިމީހުންގެ ބޯތައް އުފުލިފައި ހުރުމުގެ ސަބަބުން ތިރިނުކުރެވެއެވެ. މިއީ އެބައިމީހުން އީމާންކަމުގެ މަގަށް ރުޖޫޢަނުވާނެކަމުގެ ރަމްޒީ މިސާލެކެވެ.
ތަފްސީރުއް ސަޢުދީ:
އެބައިމީހުންގެ ހިތްތަކަށް އީމާންކަން ވަނުމަށް ހުރި ހުރަސްތައް ބަޔާންކުރައްވަމުން ﷲ ވަޙީކުރެއްވިއެވެ. ”ތިމަންރަސްކަލާނގެ އެބައިމީހުންގެ ކަރުތަކުގައި ކަސްތޮޅުތަކެއް އެޅުއްވީމެވެ.“ މި ކަސްތޮޅުތަކަކީ އެބައިމީހުންގެ ކަރުތަކުގައި ބަނދެވިފައިވާ ބާރުގަދަ ކަސްތޮޅުތަކެކެވެ. އެ ކަސްތޮޅުތައް ދަތްދޮޅިއާ ހަމައަށް ފޯރާފައިވުމުގެ ސަބަބުން އެބައިމީހުންގެ ބޯތައް ވަނީ މައްޗަށް އުފުލިފައެވެ.
ނުނިމޭ…
މިއީ surahquran.com ގައި ލިޔެފައިވާ ލިޔުމެއްގެ ދހިވެހި ތަރުޖަމާ އެވެ.
އާޔަތްތަކުގެ ދިވެހި ތަރުޖަމާ ނަގާފައިވާނީ tanzil.net އިންނެވެ.



