ރާއްޖެއިން މިއަހަރު ޙައްޖަށް ގެންދެވޭނެ ކުންފުނިތަކާއި ކޯޓާގެ ޢަދަދާއި އަގު ކަނޑައަޅައިފި

ރާއްޖެއިން މިއަހަރު ޙައްޖަށް ގެންދެވޭނެ ކުންފުނިތަކާއި ކޯޓާގެ ޢަދަދާއި އަގު ކަނޑައަޅައިފިއެވެ.

އިސްލާމިކް މިނިސްޓްރީން ވަނީ 1440 ވަނަ އަހަރު ރާއްޖެއިން ޙައްޖަށް ގެންދިއުމުގެ ހުއްދަ 6 ކުންފުންޏަކަށްދީފައެވެ.

އިޝްތިހާރު

އެގޮތުން ހުއްދަދީފައިވަނީ މޯލްޑިވްސް ޙައްޖު ކޯޕަރޭޝަން، ތަޒްކިޔާ ޕްރައިވެޓް ލިމިޓެޑް، ޒައީ ގްރޫޕް ޕްރައިވެޓް ލިމިޓެޑް، މިނާ ޙައްޖު އެންޑް ޢުމްރާ ޕްރައިވެޓް ލިމިޓެޑް، އެކްރޯ ޕްރައިވެޓް ލިމިޓެޑް އަދި އަލް ޙަރަމައިން ޙައްޖު އެންޑެ ޢުމްރާ މޯލްޑިވްސް ޕްރައިވެޓް ލިމިޓެޑަށެވެ.

މި ކުންފުނިތަކުގެ ތެރެއިން މޯލްޑިވްސް ޙައްޖު ކޯޕަރޭޝަނަށް  550 ކޯޓާދީފައިވާ އިރު، ދެން ހުރި ކުންފުނިތަކަށް، ކޮންމެ ކުންފުންޏަކަށްދީފައިވަނީ 90 ކޯޓާއެވެ.

މޯލްޑިވްސް ޙައްޖު ކޯޕަރޭޝަނާއި އަލް ޙަރަމައިން ގްރޫޕް އަދި މިނާ ގްރޫޕުން ޙައްޖަށް މީހުން ގެންދިއުމަށް ކަނޑައަޅާފައިވާ އަގަކީ ފަސްދޮޅަސް ނުވަހާސް ނުވަސަތޭކަ ފަސްދޮޅަސް ފަސް ރުފިޔާއެވެ. އަދި ތަޒްކިޔާ ޕްރައިވެޓް ލިމިޓެޑުން ޙައްޖަށް މީހުން ގެންދެވޭ އަގަކީ ހަތްދިހަ ދެހާސް ފަސްސަތޭކަ ފަންސާސް ރުފިޔާއެވެ.

ޒައީ ގްރޫޕުން ހަތްދިހަހާސް ރުފިޔާއަށް ޙައްޖަށް ގެންދިއުމުގެ ހުއްދަދީފައިވާ އިރު، އެކްރޯ ގްރޫޕުގެ އަގަކީ ފަންސާސް ނުވަހާސް ނުވަ ސަތޭކަ ފަސްދޮޅަސް ފަސް ރުފިޔާއެވެ.

އިސްލާމިކް މިނިސްޓްރީން ބުނެފައިވަނީ ދިވެހިރާއްޖެއިން ޙައްޖަށް މީހުން ގެންދިއުމާއިބެހޭ އުޞޫލުގެ 5 ވަނަ މާއްދާގެ (ނ) ގައިވާގޮތުގެމަތިން މޯލްޑިވްސް ޙައްޖު ކޯޕަރޭޝަން ފިޔަވާ ދެންހުރި ކުންފުނިތަކަށްދީފައިވާ ހުއްދައަކީ 1 އަހަރު ދުވަހުގެ މުއްދަތަށްދޫކޮށްފައިވާ ހުއްދަ ކަމަށެވެ.

އެ މިނިސްޓްރީން ވަނީ ހުއްދަދީފައިވާ އަގަށްވުރެ އިތުރަށް ކުންފުނިތަކުން ފައިސާ ނެގުމާއި ކުންފުނިތަކަށް ފައިސާ ދެއްކުމާއި ހުއްދަދީފައިވާ ކޯޓާއަށްވުރެ އިތުރަށް ފައިސާ ނެގުމަކީ ދިވެހިރާއްޖޭގެ ޙައްޖަށް މީހުން ގެންދިއުމާއިބެހޭ އުޞޫލުގެދަށުން މަނާ ކަމެއްކަންވެސް ހަނދާންކޮށްދީފައެވެ.