ފ. އަދި ސ. އަތޮޅަށް ބޯކޮށް ވާރޭ ވެހި، ގުގުރުން އެކަށީގެންވޭ: މެޓް

ފ. އަދި ސ. އަތޮޅަށް ބޯކޮށް ވާރޭ ވެހި، ގުގުރުން އެކަށީގެންވާކަމަށް މޫސުމާއިބެހޭ ޤައުމީ އިދާރާއިން ލަފާކޮށްފިއެވެ.

އެ އިދާރާއިން މިއަދު ހެނދުނު ނެރެފައިވާ ވައިޓް އެލަރޓުގައި ބުނެފައިވަނީ 08:30ން 14:30 އާދެމެދުގެ ވަގުތުތަކުގައި ފ. އަދި ސ. އަތޮޅަށް ބޯކޮށް ވާރޭވެހި، ގުގުރުން އެކަށީގެންވާ ކަމަށެވެ. އެހެންކަމުން ޚާއްޞަކޮށް އެސަރަހައްދުން ކަނޑުދަތުރުފަތުރު ކުރައްވާ ފަރާތްތަކުން މޫސުމަށް ބައްލަވައިގެން ދަތުރުކުރެއްވުމަށް އެދޭ ކަމަށެވެ.

އިޝްތިހާރު

މިހާރު ރާއްޖެއަށް ކުރަމުން މިދާ ވިއްސާރައިގާ ރާއްޖޭގެ އެކި ހިސާބަށް އަންނަނީ ބޯކޮށް ވާރޭވެހެމުންނެވެ. އަދި މޫސުމާއިބެހޭ އިދާރާއިން އަންނަނީ އެކި ސަރަހައްދުތަކަށް އެކި ވަގުތު އެލަރޓްވެސް ނެރެމުންނެވެ.

މޫސުމާ ގުޅިގެން ނެރޭ އެލަރޓްތައް:

ވައިޓް އެލަރޓް:

މި އެލަރޓްގައި މޫސުމަށް ސަމާލުވާންޖެހެއެވެ. ކޮންމެވެސް ވަރަކަށް ވައިގަދަވެ، ވާރޭ ވެހި، އާންމު ގޮތެއްގައި ކަނޑުތައް ގަދަ ވާނެއެވެ. ވައިޖެހޭނީ 20 މޭލާއި 30 މޭލާ ދެމެދުގެ ބާރުމިނެއްގައެވެ. ވައިޓް އެލަރޓް ނެރެފައިވާނަމަ، ދަތުރަށް ފެށުމުގެ ކުރިން މޫސުމާއިބެހޭ އެންމެ ފަހުގެ މަޢުލޫމާތު ހޯދުން މުހިއްމެވެ.

ޔެލޯ އެލަރޓް:

މި އެލަރޓްގެ މުއްދަތުގައި ވައި ބާރުވެ، ބޯކޮށް ވާރޭ ވެހޭނެއެވެ. އާދަޔާ ޚިލާފަށް ކަނޑުގަދަވެ، ވައި ބާރުވާނެއެވެ. މި އެލަރޓްގެ މުއްދަތުގައި ކަނޑުމަގުން ކުރާ ދަތުރުތައް ކުރުމުގައި ސަމާލުވާން ޖެހޭނެއެވެ. ވިދާ ގުގުރާ ބޯކޮށް ވާރޭވެހޭނެއެވެ. އުދައެރުންފަދަ ކަންތައް ދިމާވުމަކީ އެކަށީގެންވާކަމެކެވެ. މި އެލަރޓް ނެރުމާއެކު ދަތުރުފަތުރުކުރާ ފަރާތްތަކުންނާއި ހިކިފަސް ތަންތަނުގައި ތިބޭ ފަރާތްތަކުންވެސް މޫސުމާބެހޭ އެންމެ ފަހުގެ މަޢުލޫމާތު ހޯދައި، މޫސުމަށް ސަމާލުކަން ދިނުމަކީ މުހިއްމުކަމެކެވެ.

ރެޑް އެލަރޓް:

މި އެލަރޓްގެ މުއްދަތުގައި ބާރުގަދަ ކޮޅިގަނޑުތައް އެރުމަކީ އެކަށީގެންވާކަމެކެވެ. ކަނޑު ދަތުރުފަތުރު ކުރުމަށް ދަތިތައް ކުރިމަތިވާ މިންވަރަށް ކަނޑުގަދަވާނެއެވެ. އާދަޔާ ޚިލާފަށް ވައިގަދަވެ، ވިދާ ގުގުރައި، ބޯކޮށް ވާރޭވެހޭނެއެވެ. ކަނޑު ދަތުރުފަތުރު ކުރުމަކީ މި އެލަރޓްގެ މުއްދަތުގައި ކޮށްގެންވާނެކަމެއް ނޫނެވެ. ކޮޅިގަނޑެއްގެ ސަބަބުން ނުރައްކާތެރި ޙާދިޘާއެއް ހިނގައިފާނެފަދަ ތަންތަނުގައި ދިރިއުޅޭ ފަރާތްތަކުން ރައްކާތެރި ހިސާބުތަކަށް ދިޔުމަކީ މުހިއްމުކަމެކެވެ. މި އެލަރޓް ނެރުމާއެކު ކަމާ ބެހޭ ފަރާތްތަކުން އަބަދުވެސް ތިއްބަވާނީ ދިމާވެދާނެ ޙާދިޘާއަކުން މީހުންނަށް އެހީތެރިކަން ފޯރުކޮށްދިނުމަށް ތައްޔާރުވެގެންނެވެ.

ގްރީން އެލަރޓް:

މިއީ މޫސުން ޢާންމު ގޮތެއްގައި ރަނގަޅުނަމަ ނެރޭ އެލަރޓެކެވެ. މި އެލަރޓް ނެރުމުން ޢާންމު ޙާލަތަށް ރުޖޫޢަވީއެވެ