ދިވެހިރާއްޖޭގެ ރައީސްކަމުގެ މަޤާމަށް އިބޫޫ އިންތިޚާބުވިކަން ރަސްމީކޮށް އިޢުލާންކޮށްފި

ދިވެހިރާއްޖޭގެ ރައީސުލްޖުމްހޫރިއްޔާކަމުގެ މަޤާމަށް އިބްރާހިމް މުޙައްމަދު ސާލިޙް (އިބޫޫ) އިންތިޚާބުވިކަން އިލެކްޝަންސް ކޮމިޝަނުން ރަސްމީކޮށް އިޢުލާންކޮށްފިއެވެ.

އެ ކޮމިޝަނުން މިއަދު ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ މި މަހުގެ 23 ވީ އާދީއްތަ ދުވަހު ބޭއްވި ރިޔާސީ އިންތިޚާބުގެ ވަގުތީ ނަތީޖާއާ އެއްގޮތަށް ދާއިމީ ނަތީޖާވެސް ދާދި ހަމަހަމަކަމަށެވެ. އެގޮތުން އިބޫއަށް 134،705 އަދި ރައީސް އަބްދުﷲ ޔާމީނަށް 96،052 ވޯޓު ލިބިވަޑައިގެންފައިވާ އިރު، އިބޫއަށް ވޯޓުގެ 58.4 އިންސައްތަ އަދި ރައީސް ޔާމީނަށް 41.6 އިންސައްތަ ވަނީ ލިބިވަޑައިގެންފައެވެ.

އިޝްތިހާރު

ދާއިމީ ނަތީޖާއިން ދައްކާފައިވާ ގޮތުގައި އިންތިޚާބުގައި ވޯޓު ދިނުމުގެ ޙައްޤު ލިބިގެންވާ 262،135 މީހުންގެ ތެރެއިން 233،889 މީހުން ވަނީ ވޯޓުލާފައެވެ. އަދި. ބާޠިލް ވެފައިވަނީ 3،132 ވޯޓެވެ.

މިއަދުގެ ބައްދަލުވުމުގައި އީސީ އިން ބުނެފައިވަނީ އިންތިޚާބު ބޭއްވި ދުވަހުގެ ރޭ އިޢުލާނުކުރި ވަގުތީ ނަތީޖާއިން ގުޅިފައިވާ ޕާޓީތަކުގެ ކެންޑިޑޭޓް އިބޫއަށް 134،616 ވޯޓު އަދި ރައީސް ޔާމީނަށް 96،123 ވޯޓު ލިބިވަޑައިގެންފައިވާ ކަމަށެވެ. އެހެންވެ ދެ ނަތީޖާގެ އުޅެނީ 80 ވޯޓުގެ ފަރަގެކެވެ.

އިލެކްޝަން ކޮމިޝަންގެ ރައީސް އަޙްމަދު ޝަރީފް ވިދާޅުވީ އެއީ ނަތީޖާ ޝީޓުގައި ވޯޓުގެ ޢަދަދު ލިޔުމުގައި އަރާފައިވާ އޮޅުމެއްގެ ސަބަބުން އައި ބަދަލެއް ކަމަށެވެ.