ޕާކިސްތާނުގެ ފަޤީރުކަމުގެ ނިސްބަތް އިންޑިއާ އަދި ބަންގްލަދޭޝްއަށްވުރެ މަތި – ޔޫ.އެން.ޑީ.ޕީ

ޔޫ.އެން.ޑީ.ޕީ އިން ހޯމަ ދުވަހު ނެރުނު ’މަލްޓިޑައިމެންޝަނަލް ޕަވަރޓީ އިންޑެކްސް‘ ދައްކާގޮތުން، ޕާކިސްތާނުގެ އާބާދީގެ ތިންބައިކުޅަ އެއްބަޔަށްވުރެ ގިނަ މީހުން ދަނީ ޞިއްޙަތާއި، ތަޢުލީމާއި އަދި ދިރިއުޅުމުގެ ފެންވަރުގެ ގޮތުން ތަފާތު ދަތިތަކާ ކުރިމަތިލަމުންނެވެ.

ނިއުޔޯކުގައި ޔޫ.އެން.ޑީ.ޕީ އިން އާންމުކުރި ތަފާސްހިސާބުތަކުން އެނގޭގޮތުގައި ޕާކިސްތާނުގެ އާބާދީގެ 38.3 އިންސައްތަ މީހުންނަކީ ތަފާތު ދާއިރާތަކުން ފަގީރުންނެވެ.

އިޝްތިހާރު

މީގެ ބަދަލުގައި އިންޑިއާގައި މި ނިސްބަތް ހުރީ 16.4 އިންސައްތައިގަ އެވެ. އަދި ބަންގްލަދޭޝްގައި މި ނިސްބަތް ހުރީ 14.9 އިންސައްތައިގަ އެވެ.

މި ހިސާބުތަކަކީ އެކި އަހަރުތަކުގައި ހިންގާފައިވާ ސާވޭތަކުގެ މައްޗަށް ބިނާކޮށް ތައްޔާރުކޮށްފައިވާ ހިސާބުތަކެކެވެ.

ޕާކިސްތާނުގައި ފަގީރުންގެ ގޮތުގައި ކަނޑައަޅާފައިވާ މީހުންގެ މެދުގައި ދަތިކަން ހުރި މިންވަރު ހުރީ 51.7 އިންސައްތައިގަ އެވެ.

މީގެ އިތުރުން، އާބާދީގެ 12.9 އިންސައްތަ މީހުންނަކީ ފަގީރުކަމުގެ ތެރެއަށް ވެއްޓުމުގެ ބިރު އޮތް މީހުން ކަމުގައި ވަނީ ފާހަގަކޮށްފަ އެވެ.

އާދައިގެ ގޮތެއްގައި އާމްދަނީއަށް ބަލައިގެން ފަގީރުކަން ވަޒަންކުރާ ކުރުމާ ޚިލާފަށް، އެމް.ޕީ.އައި އިން ބަލަނީ ކާނާގެ މުއްސަނދިކަމާއި، ކުޑަކުދިން މަރުވާ ނިސްބަތާއި، ތަޢުލީމީ ފެންވަރާއި، ސާފުތާހިރުކަމާއި، ބޯފެނާއި، ކަރަންޓާއި، ގެދޮރުވެރިކަން އަދި ގޭބިސީގެ ވަސީލަތްތަކުގެ މައްޗަށެވެ.

މި ރިޕޯޓުގައި ފާހަގަކޮށްފައިވާ ގޮތުގައި، ވޭތުވެދިޔަ 15 އަހަރުގެ ތެރޭގައި ފުރަތަމަ ފަހަރަށް ދުނިޔޭގެ ފަގީރުކަމުގެ ހާލަތު ވަނީ ގޯސްވެފަ އެވެ.

އަސާސީ ބޭނުންތައް ފުއްދުމަށް ދަތިވެފައިވާ މީހުންގެ އަދަދު މިހާރު ވަނީ 1.2 ބިލިއަނަށް އަރާފަ އެވެ.

މި އަދަދަކީ ކުރިން ލަފާކުރި ވަރަށްވުރެ 51.5 މިލިއަން އިތުރު އަދަދެކެވެ. މީގެ ތެރެއިން ދެބައިކުޅަ އެއްބަޔަކީ ކުޑަކުދިންނެވެ.

އެއީ ގާތްގަނޑަކަށް 617 މިލިއަން ކުދިންނެވެ. އަދި ފަގީރުންގެ 83 އިންސައްތަ މީހުން ދިރިއުޅެނީ ރަށްފުށުގެ ސަރަޙައްދުތަކުގަ އެވެ.

ދުނިޔޭގެ ފެންވަރުގައި ފެންނަން ހުރި މި ނަތީޖާތަކުން ހާމަވަނީ، އެކަހެރިވެފައިވާ މުޖުތަމަޢުތަކަށް އަސާސީ ޚިދުމަތްތައް ފޯރުކޮށްދިނުމުގައި ސަރުކާރުތަކަށް ހުރި ގޮންޖެހުންތަކުގެ ބޮޑުމިނެވެ.

ފަގީރުކަމަކީ ހަމައެކަނި އާމްދަނީ މަދުވުމެއް ނޫނެވެ. އޭގެ ތެރޭގައި ރަނގަޅު ކާނާ ނުލިބުމާއި، ތަޢުލީމުން މަޙްރޫމްވުމާއި، އަދި ސާފު ބޯފެނާއި ކަރަންޓުގެ ޚިދުމަތް ނުލިބުންވެސް ހިމެނެ އެވެ.

ދެކުނު އޭޝިއާއަކީ ދުނިޔޭގެ ފަގީރުކަމުގެ ބޮޑު ހިއްސާއެއް އޮތް ސަރަޙައްދެކެވެ. ރިޕޯޓުގައިވާ ގޮތުން ކާނާއާއި، ގެދޮރުވެރިކަމާއި އަދި ތަޢުލީމުން މަޙްރޫމްވެފައިވާ މީހުންގެ ތިންބައިކުޅަ އެއްބައި ހިއްސާކުރަނީ މި ސަރަޙައްދުންނެވެ.

އަދި މި ސަރަޙައްދުގެ 150 މިލިއަން ފަގީރުން ދިރިއުޅޭ ގޭބިސީތަކުގައި، ސްކޫލަށްދާ އުމުރުގެ ކުދިން ސްކޫލަށް ނުދާކަން ވަނީ ފާހަގަކުރެވިފަ އެވެ.

މިއީ ތަރައްޤީގެ ރޮނގުން ކުރިއެރުންތަކެއް ލިބިފައިވީ ނަމަވެސް، ތަޢުލީމު ހާސިލުކުރުމަށް ހުރި ހުރަސްތައް ދައްކުވައިދޭ ކަމެކެވެ.

ޔޫ.އެން.ޑީ.ޕީގެ ހިސާބުތަކުން ދައްކާގޮތުގައި ދެކުނު އޭޝިއާގެ ފަގީރުކަމުގެ ނިސްބަތަކީ 19.3 އިންސައްތައެވެ. އަދި އިތުރު 18.4 އިންސައްތަ މީހުން ތިބީ ފަގީރުކަމުގެ ތެރެއަށް ވެއްޓުމުގެ ބިރުގަ އެވެ.

މި ސަރަޙައްދުގެ ފަގީރުކަމަށް ބަލާއިރު، ޞިއްޙީ ދާއިރާގެ ދަތިތައް 29.9 އިންސައްތަ ހިއްސާކުރާއިރު، ތަޢުލީމީ ދާއިރާ 33.7 އިންސައްތަ އަދި ދިރިއުޅުމުގެ ފެންވަރު 36.3 އިންސައްތަ ހިއްސާކުރެ އެވެ.

މި ހިސާބުތަކުން އެނގެނީ އެކި ދާއިރާތަކުން ކުރިމަތިވާ އުނިކަންތައްތަކުގެ ސަބަބުން އެކަކު އަނެކަކަށް ކުރާ ނޭދެވޭ އަސަރުތަކެވެ.

ބަލިކަށި ޞިއްޙަތާއި، އެކަށީގެންވާ ތަޢުލީމެއް ނުލިބުމާއި، އަދި ދިރިއުޅުމުގެ ދަށް ފެންވަރުގެ ސަބަބުން އާއިލާތައް ފަގީރުކަމުގެ ތެރޭގައި ތާށިވެ، އެމީހުންގެ ހާލަތު ރަނގަޅުކުރުމަށް ބޮޑެތި ހުރަސްތަކެއް ކުރިމަތިވެ އެވެ.