މަހާނަމަތީގައި ގަސް އިންދުމަކީ ހުއްދަކަމެއް ނޫން!

ލޯބިވާ ގާތް މީހަކު ދުނިޔެ ދޫކުރުމުން އެމީހެއްގެ މަހާނަ ޒީނަތްތެރިކޮށް، ގަސް އިންދުމަކީ ވަރަށް ގިނަ ފަރާތްތަކުން ކުރިންވެސް އަދި މިހާރުވެސް ކުރަމުންއަންނަ ކަމެކެވެ.

ބައެއް ފަރާތްތަކުން ދެކޭގޮތުގައި، މިގޮތަށް މަހާނަ ޒީނަތްތެރި ކުރުމަކީ، މަރުވެފައިވާ މީހާއަށް އިޙްތިރާމް ކުރުމާއި ލޯބިވާ މިންވަރު ދައްކުވައިދޭ ރަމްޒެކެވެ. އެގޮތުން މަހާނަ ވަށައިގެން ގާއަތުރައި، މަހާނަމަތީގައި މާ ނުވަތަ މޭވާއެއް އަޅާ ގަސް އިންދައި، އެގަސްތަކަށް ފެންދީ ބަލަހައްޓައެވެ. މިފަދައިން ކަންކުރުމުން އޭގެ މަންފާއެއް ޤަބުރުގައިވާ މައްޔިތާއަށް ކުރާނެކަމަށް ޤަބޫލުކޮށް އެކަންކުރާ ފަރާތްތައްވެސް އުޅެ އެވެ.

އިޝްތިހާރު

މިގޮތަށް ކަންތައް ކުރުމަކީ ހުއްދަކަމެއްތޯ، ނުވަތަ ނޫންތޯ، މިއީ އަޅުގަނޑުމެއް ހޯދާ ބަލާލަންޖެހިފައިވާ މުޙިއްމު ކަމެކެވެ.

އެގޮތުން މަހާނައިގައި ގަސްއިންދުމާއި ބެހޭގޮތުން ކުރި ސުވާލެއްގެ ޖަވާބު ތިރީގައި ބަޔާންކޮށްލާނަމެވެ.

ސުވާލު: ބައެއް މީހުން ކަށްވަޅުތަކުގެ މަތީގައި ކަފިހިކަޅު (Indian fig trees) ފަދަ ގަސްގަހާގެހި އިންދައި އުޅެނީ، ރަސޫލުﷲ ޞައްލަﷲ ޢަލައިހި ވަސައްލަމަ އެކަލޭގެފާނުގެ ދެ އަޞްޙާބީއެއްގެ ކަށްވަޅުމަތީގައި އެފަދަ އެއްޗެއް ބޭއްވެވި ކަމަށް ބުނެއެވެ. މިކަމުގެ ޙުކުމަކީ ކޮބައިތޯއެވެ؟

ޖަވާބު: ޙަމްދު ހުރީ ﷲ އަށެވެ. އަދި ޞަލަވާތާއި ސަލާމް ﷲގެ ރަސޫލާއަށް ހުއްޓެވެ.
ކަށްވަޅުތަކުގެ މަތީގައި ކަފިހިކަޅު ނުވަތަ އެނޫންވެސް ބާވަތެއްގެ ގަހެއް އިންދުމަކީ، ނުވަތަ އެހެންވެސް އެއްޗެއް އިންދައި ހެދުމަކީ ހުއްދަވެގެންވާ ކަމެއް ނޫނެވެ. ސަބަބަކީ ރަސޫލުﷲ ޞައްލަﷲ ޢަލައިހި ވަސައްލަމަ އަދި އެކަލޭގެފާނުގެ ފަހުން ވަޑައިގެންނެވި ޚަލީފާއިންވެސް (ﷲ އެބޭކަލުންނަށް ރުއްސުންލައްވާށި) ކަށްވަޅުތަކަށް އެފަދައިން ކަންތައް ކުރައްވާފައި ނުވާތީއެވެ.
ދެ ކަށްވަޅެއްގެ ވެރިންނަށް ޢަޛާބު ލިބެމުންދާކަން ﷲ އެކަލޭގެފާނަށް ދެއްކެވުމުން، އެ ދެ ކަށްވަޅުމަތީގައި ކަދުުރު ރުކުގެ ކުރިގަނޑެއް އިންދެވި އިންދެވުމަކީ، ހަމައެކަނި އެ ދެ ކަށްވަޅަށް ޚާއްޞަވެގެންވާ ކަމެކެވެ. އެއީ އެކަލޭގެފާނު އެނޫން އެހެން އެއްވެސް ކަށްވަޅަކަށް އެފަދައިން ކަންތައް ކުރައްވާފައި ނުވާތީއެވެ. ﷲ އަމުރުކުރައްވާފައި ނުވާ އަޅުކަމުގެ އައު ކަންތައްތައް އުފެއްދުމުގެ ޙައްޤެއް މުސްލިމުންނަށް ލިބިގެންނުވެއެވެ. އެއީ މަތީގައި ބަޔާންކުރެވުނު ޙަދީޘަށް ރިޢާޔަތްކޮށް އަދި ﷲގެ މި ބަސްފުޅާ ގުޅިގެންނެވެ:
”ﷲ އިޒްނަދެއްވާފައިނުވާ ދީނެއް، އެއުރެންނަށް ޝަރުޢުކޮށްދޭ ބައިވެރިންތަކެއް އެއުރެންނަށް ވަނީ ހެއްޔެވެ؟“ (އައްޝޫރާ: 21)
މަޖްމޫޢު ފަތާވާ އައްޝައިޚް އިބްނު ބާޒް، 5/407