ނިޝާން ދިޔަމިގިލީ ޝަރަފުގެ އިއްޒަތް ކަށިމާ ޝާކިރަށް އަރުވައިފި؛ މިއީ 55 އަހަރުގެ ގައުމީ ޚިދުމަތުގެ އަގުވަޒަންކުރުމެއް

ދިވެހި ދައުލަތަށާއި، ދިވެހި ތާރީޚާއި އަދަބިއްޔާތަށް ފޯރުކޮށްދެއްވާފައިވާ މުހިންމު ޚިދުމަތްތަކުގެ އަގުވަޒަންކުރުމުގެ ގޮތުން، ދިވެހި ދައުލަތުގެ މަތިވެރި އިއްޒަތް ކަމަށްވާ ”ނިޝާން ދިޔަމިގިލީ ޝަރަފުގެ އިއްޒަތް“ އަލްފާޟިލް އަޙްމަދު ޝާކިރު (ކަށިމާ ޝާކިރު) އަށް މިއަދު އަރުވައިފިއެވެ.

މި ޝަރަފުގެ އިއްޒަތް ޝާކިރަށް އެރުވީ މިއަދު ހއ. އުތީމުގައި ބޭއްވި މިއަހަރުގެ ގައުމީ ދުވަހުގެ ރަސްމީ ޖަލްސާގައެވެ. ޝާކިރަށް މި އިއްޒަތް އެރުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒެވެ. މި ޖަލްސާގައި ޝާކިރުގެ އިތުރުން އިތުރު 4 ބޭފުޅަކަށްވެސް މިޝަރަފުގެ އިއްޒަތް އަރުވާފައިވެއެވެ.

އިޝްތިހާރު

ދައުލަތުގެ ޚިދުމަތުގައި 41 އަހަރު، ގައުމީ ޚިދުމަތުގައި 55 އަހަރު

ކަށިމާ ޝާކިރަކީ ދިވެހި ދައުލަތަށް މެދުނުކެނޑި 41 އަހަރަށްވުރެ ގިނަ ދުވަހު ޚިދުމަތް ކުރައްވާފައިވާ ބޭފުޅެކެވެ. އޭނާ ދައުލަތުގެ ޚިދުމަތް ފެއްޓެވީ 30 ޖުލައި 1969 ގައެވެ. މި ދިގު މުއްދަތުގެ ތެރޭގައި މިނިސްޓްރީ އޮފް ޓްރާންސްޕޯޓްގެ އެކި މަގާމުތަކާއި، ދިވެހިބަހާއި ތާރީޚަށް ޚިދުމަތްކުރާ ގައުމީ މަރުކަޒުގެ އެގްޒެކެޓިވް ޑިރެކްޓަރުކަން ހިމެނޭހެން ސަރުކާރުގެ ގިނަ އިސް މަގާމުތަކެއް ފުރުއްވާފައިވެއެވެ. މިއަދު އެރުވުނު މި މަތިވެރި ޝަރަފަކީ ވޭތުވެދިޔަ 55 އަހަރަށްވުރެ ދިގު މުއްދަތެއްގައި އޭނާ ގައުމަށް ކުރެއްވި އިޚުލާސްތެރި ޚިދުމަތްތަކުގެ އަގުވަޒަންކުރުމުގެ ގޮތުން އެރުވުނު ޝަރަފެކެވެ.

ތަޢުލީމީ ރަން ވަނަތަކެއް

ތަޢުލީމީ ދާއިރާއިން ޝާކިރު ހޯއްދަވާފައިވާ ކާމިޔާބީތަކަކީ ނަމޫނާ މިސާލެކެވެ. އޭނާ ވަނީ ވިލާ ކޮލެޖުން ބެޗްލާ އޮފް ޝަރީއާ އެންޑް ލޯ (އޮނަސް) ފުރިހަމަކުރައްވައި، ސުޕްރީމް ކޯޓުން ދެއްވާ ޝަރުއީ ކޯޓުތަކުގައި ވަކާލާތު ކުރުމުގެ ހުއްދަވެސް ހޯއްދަވާފައެވެ.

އަދި އޭގެ ފަހުން މާސްޓާ އޮފް ޝަރީއާގެ ޑިގްރީވެސް ޝާކިރު ވަނީ ހާސިލުކުރައްވާފައެވެ. ފާހަގަކޮށްލެވޭ ގޮތުގައި ޝާކިރު މާސްޓާސް ޑިގްރީ ފުރިހަމަކުރެއްވީ އުމުރުފުޅުން 69 އަހަރުގައެވެ. އޭނާ ވިދާޅުވި ގޮތުގައި ވިލާ ކޮލެޖުގައި މި ކޯސްތައް ފުރިހަމަކުރެއްވިއިރު، އޭނާއަކީ އެ ކޮލެޖުގެ ޑިގްރީ އަދި މާސްޓާސް ކުލާސްތަކަށް ކިޔަވައިދެއްވަމުން ގެންދެވި މުދައްރިސެއްވެސް މެއެވެ.

މިއަދުގެ ޖަލްސާގައި ޝާކިރަށް މި އެރުވުނު ”ނިޝާން ދިޔަމިގިލީ ޝަރަފުގެ އިއްޒަތް“ އަކީ ދިވެހި އަދަބިއްޔާތާއި، ތާރީޚާއި، އަދި ދައުލަތުގެ ހިންގުމުގެ ދާއިރާއަށް އޭނާ ވެދެއްވާފައިވާ މުހިންމު ހިއްސާގެ ރަމްޒެކެވެ. މި ރަސްމިއްޔާތުގައި ރައީސުލްޖުމްހޫރިއްޔާގެ އަރިހުގައި ނައިބު ރައީސް ޙުސައިން މުޙައްމަދު ލަޠީފާއި، މަޖިލީހުގެ ރައީސް ޢަބްދުއްރަޙީމް ޢަބްދުﷲ ބައިވެރިވެވަޑައިގެންނެވިއެވެ.