ކެނދިކުޅުދޫ މޮނިޓަރިންގ އަށް ލައިފި

ނ. ކެނދިކުޅުދޫ މޮނިޓަރިންގ އަށް ލައިފި އެވެ.

އެރަށް މޮނިޓަރިންގ އަށް ލީ، އެރަށުން ނެގި ރެންޑަމްކޮށް ސާމްޕަލްތަކެއް ކޮވިޑަށް ޕޮޒިޓިވް ވުމުން ނެވެ.

އިޝްތިހާރު

އެރަށު ކައުންސިލުން ބުނީ އެ ރަށުގައި މުދާއުފުލުމަށް މާލެ ދަތުރުކުރާ ”ފުރަމާ (މަހުރޯދި)“ ދޯނިން 5 މީހަކު މި މަހުގެ 7 ވަނަ ދުވަހު ކޯވިޑަށް ޕޮޒިޓިވްވެފައިވާ ކަމަށެވެ.

މިއީ އެރަށުން ކޮވިޑު ކޭސްއެއް ފެނުނު ފުރަތަމަ ފަހަރެވެ.

އެ ދޯނީގައި މަސައްކަތް ކުރާ އިތުރު 3 ދިވެހިންގެ ސާމްޕަލް ނަގާފައިވާ އިރު، އެ 3 މީހުންނާއި އެ ފަރާތަކާއި ޑައިރެކްޓް ކޮންޓެކްޓުވި 3 މީހަކުވެސް ވަނީ ކޮވިޑަށް ޕޮޒިޓިވް ވެފަ އެވެ.

ރައްކާތެރިކަމުގެ ފިޔަވަޅެއްގެ ގޮތުން އެރަށު ކައުންސިލުން މިހާރުވަނީ ފުރަމާ (މަހުރޯދި“ ދޯނިން ދަތުރުކުރި އެއްވެސް ފަރާތަކާއި ކޮންޓެކްޓް ވެފަވާ ފަރާތެއްވާނަމަ ލަސްނުކޮށް އެރަށު ޞިއްޙީ މަރުކަޒަށް އެންގުމަށް އިލްތިމާސްކޮށްފަ އެވެ.

މީގެ އިތުރުން އަބަދުވެސް މާސްކް އަޅުއްވާ ގައިދުރުކަން ބެހެއްޓުމަށް ސަމާލުކަން ދެއްވުމަށާއި، ގިނަމީހުން އެއްވެ އުޅޭ ތަންތަނަށް ނުދިއުމަށް ވެސް ވަނީ އަންގާފައެވެ. އަދި ކޮންމެހެން ދާންޖެހިއްޖެ ޙާލަތެއްގައި މެނުވީ ގެއިންބޭރަށް ނުދިއުމަށް ވެސް ވަނީ އަންގާފަ އެވެ.

މީގެ އިތުރުން ކޯވިޑް-19 ރޯގާގެ އެއްވެސް އަލާމާތެއް (ރޯގާޖެހުން، ހުންއައުން، ގައިގަ ރިއްސުން، ވަހާއި ރަހަޔަށް ބަދަލުއައުން، ބޮލުގައި ރިއްސުން) ފެނިއްޖެނަމަ ލަސްނުކޮށް ޞިއްޙީ މަރުކަޒަށް މަޢުލޫމާތު ދިނުމަށް ވެސް އަންގާފައި ވެއެވެ.

އެޗްޕީއޭގެ އެންމެ ފަހުގެ ތަފާސް ހިސާބުތަކަށް ބަލާއިރު 48 ރަށެއް މިހައިތަނަށް ވަނީ މޮނިޓަރިންގ އަށް ލާފައެވެ.