އަރަބިކަނޑުގައި އުފެދިފައިވާ ކޮޅިގަނޑު ތޫފާނަކަށް ބަދަލުވުމުގެ ފުރުުސަތު އެބައޮތް: މެޓް

އަރަބިކަނޑުގައި އުފެދިފައިވާ ކޮޅިގަނޑު ތޫފާނަކަށް ބަދަލުވުމުގެ ފުރުުސަތު އެބައޮތް ކަމަށް ރާއްޖޭގެ މޫސުމާއިބެހޭ ގައުމީ އިދާރާއިން ބުނެފި އެވެ.

އެ އިދާރާއިން ބުނީ ރާއްޖޭގެ ހުޅަނގު އުތުރުން، އިރު ދެކުނު އަރަބިކަނޑުގައި އުފެދިފައިވާ ކޮޅިގަނޑު ކުރިއަށް އޮތް 24 ގަޑިއިރު ތެރޭގައި ތޫފާނަކަށް ބަދަލުވުމުގެ ފުރުސަތު އެބައޮތް ކަމަށެވެ.

އިޝްތިހާރު

ރާއްޖޭގެ އަތޮޅުތަކުގެ މަތީގައި ގިނަ އަދަދެއްގެ ބޯ ވިއްސާރަ ވިލާ ވަނީ އުފެދިފަ. ކުރިއަށް އޮތް 24 ގަޑިއިރު ތެރޭގައި ބާރުގަދަ ކޮޅިގަނޑަކަށް ބަދަލުވެ، އޭގެ ފަހުން ތޫފާނަކަށް ވެސް ބަދަލުވުމުގެ ފުރުސަތު އެބައޮތް.“ މެޓް އޮފީހުން ބުނެފައި ވެއެވެ.

އެހެންނަމަވެސް ލަފާކުރެވޭ ގޮތުގައި މިކޮޅިގަނޑު ޖެހެމުން ދާނީ އުތުރު، ހުޅަނގު އުތުރަށް ރާއްޖެއާއި ދުރަށް ކަމަށް ވެސް މެޓް އޮފީހުން ބުނެއެވެ.

ވޭތުވެ ދިޔަ 24 ގަޑިއިރު، ރާއްޖޭގެ ބޮޑުބަޔަކަށް ވިއްސާރަކޮށް ބައެއް ރަށްތަކަށް ބޯކޮށް ވާރޭވެހުމުގެ ސަބަބުން ވަނީ ބޮޑެތި ގެއްލުންތަކެއް ލިބިފައިވާ އިރު، ކުރިއަށް އޮތް ތިން ދުވަހު ވެސް ރާއްޖޭގެ ސަރަޙައްދުގައި މޫސުން ގޯސްވާނެ ކަަމަށް ވެސް މެޓް އޮފީހުން ބުނެފައިވެއެވެ.

ޚާއްސަކޮށް އުތުރާއި މެދު ރާއްޖެތެރޭ ވައިގަދަވެ، ކަނޑުތައް ވަރަށް ގަދަވާނެ ކަމަށާއި ރަށްތަކަށް ބޯކޮށް ވާރޭވެހި އުދައިގެ އަސަރު ކުރުން އެކަށީގެންވާ ކަމަށް ވެސް އެ އިދާރާއިން ބުނެފައި ވެއެވެ.