އިސްލާމީ އަޤީދާ އަކީ މުސްލިމުގެ އެކުވެރިކަމާއި އެއްބައިވަންތަކަމުގެ ތަނބު: ޢީދު ޚުތުބާ
ފިޠުރު ޢީދުގެ އުފާވެރި ދުވަސް ފަހަގަކުރަމުންދާއިރު އިސްލާމީ އަޤީދާ އަކީ ހުރިހާ މުސްލިމުގެ އެކުވެރިކަމާއި އެއްބައިވަންތަކަމާއި އެއްބައިވަންތަކަމުގެ ތަނބުކަން ހަނދާނުގައި ބެހެއްޓުމަށް ޢީދު ހުތުބާގައި ގޮވާލައިފިއެވެ.
މިއަދުގެ ހުުތުބާގައި ޖީލަކަށްފަހު ޖީލަކަށް މި މަތިވެރި އަޤީދާ ފޯރުކޮށްދީ ޤައުމުގެ އިސްލާމީ ޝަޚުސިއްޔަތު ރައްކާތެރިކޮށް ދެމެހެއްޓުމަށް އަޒުމް އާކުރުމަށް ވެސް ވަނީ ގޮވާލައްވާފައެވެ. މި އަޤީދާ ފުނޑުފުނޑުކޮށްލުމަށްޓަކައި ފިކުރީ ގޮތުން އެތަކެއް މަސައްތައްތައް ކުރަމުންދާކަން ފާހަގަކޮށް ޚުތުބާގައި ވަނީ އެފަދަ ކެހިވެރި ރޭވުންތަކުށް މާތް ﷲ އަޅަމެންގެ ދީން ރައްކާތެރި ކުރެއްވުން އެދި ދުޢާކޮށްފައެވެ.
މީގެ އިތުރުން ޓެރަރިޒަމްގެ ޢަމަލުތައް ހިންގާ މީހުން އިންސާފުގެ ކުރިމައްޗަށް ގެނައުމަށާއި އެފަދަ އަމަލުތައް ހިންގާ މީހުންނަށް ހަރުކަށި އަދަބު ދެވެންޖެހޭކަމަށް ވެސް މިއަދުގެ ހުތުބާގައި ވަނީ ވިދާޅުވެފައެވެ. އަދި ޓެރަރިޒަމްގެ ޢަމަލުތައް ހިންގާ ފަރާތްތަކަށް ހަރުކަށި އަދަބު ނުދެވިއްޖެނަމަ މުޖުތަމަޢު ނާމާންވެ ބިރުވެރިކަން އާއްމުވެދާނެކަމަށްވެސް މިއަދުގެ ހުތުބާގައި ވިދާޅުވިއެވެ.
މީގެ އިތުރުން ނިމިގެން ދިޔަ ރަމަޟާންމަހު ޒުވާނުން ދެއްކި އީމާންކަމުގެ މަތިވެރި ނަމޫނާގެ މަތީގައި ނަމާދާއި އެހެނިހެން އަޅުކަންތަކަށް ފަރުވާތެރިވިފަދައިން އެހެން މަސްމަހުގައިވެސް އެ ނަމޫނާ ދެއްކުމަށް ވެސް ވަނީ ގޮވާލައްވާފައެވެ. މީގެ އިތުރުން މައިންބަފައިންނާއި އަނބިދަރިންނަށް އޯގާތެރިވެ ހެޔޮބަސް ބުނުމުގައި ދެމިހުރުމަށް ވެސް ހުތުބާގައި ގޮވާލައްވާފައެވެ. މީގެ އިތުރުން މިއަދު މުސްލުމުން ޢީދު ފާހަގަކުރަމުން އަންނައިރު ފަލަސްތީނާއި ދުނިޔޭގެ އެކި ކަންކޮޅުތަކުގައި ހިތާމަވެރި ހާލުގައި ތިބި މުސްލިމުންގެ މަތިން ހަނދާން ކުރުމަށް ގޮވާލާ އިސްލާމީ އުއްމަތަށް ނަޞްރު ދެއްވުން އެދި ގިނަގިނައިން ދުޢާކުރުމަށްވެސް ގޮވާލާފައިވެއެވެ.
މީގެ އިތުރުން ޚުތުބާގައި ވަނީ އިސްލާމް ދީނަކީ ސަލާމަތާއި އަމާންކަމުގެ ދީންކަމަށާއި، އަނިޔާވެރިކަމާއި ހައްދު ފަހަނަ އެޅުމާ ދެކޮޅު ދީންކަން ފާހަގަކުރައްވާފައެވެ. އެގޮތުން މީސްތަކުންގެ ފުރާނަޔާއި މުދަލަށް ގެއްލުންދިނުން ފަދަ އަނިޔާވެރި އަމަލުތަކުން އިސްލާމްދީން ބަރީއަވެގެންވާކަމަށްވެސް ހުުބާގައި ވިދާޅުވިއެވެ. މިއަދު ކުރިމަތިވެފައިވާ ކޯވިޑްގެ ބަލިމަޑުކަމުން އަޅަމެން ސަލާމަތް ކުރެއްވުން އެދި ދުޢާ ދަންނަވާފައެވެ.
މިލިޔުން ކިޔާލުމުން
