ރައީސް ނަޝީދު ބޭސްފަރުވާއަށް ޖަރުމަނަށް ފުރާވަޑައިގެންފި

ބޮމުގެ ހަމަލާއިން ލިބިވަޑައިގެންނެވި ޒަހަމްތަކަށް އިތުރު ފަރުވާ ހޯއްދެވުމަށް ރައްޔިތުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ރާއްޖޭން ބޭރަށް ފުރާވަޑައިގެންފިއެވެ.

މޭ 6 ވަނަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ބޮމުގެ ހަމަލާއާއި ގުޅިގެން އެމަނިކުފާނަށް ވަނީ އޭޑީކޭ ހޮސްޕިޓަލުގައި ފަރުވާވެސް ހޯއްދަވާފައެވެ.

އިޝްތިހާރު

ބޮމުގެ ހަމަލާއަށް ފަހު ލިބިވަޑައިގެންނެވި ޒަހަމްތަކަށް އޭޑީކޭ ހޮޕސްިޓަލުގައި ފަރުވާ ހޯއްދެވުމަށްފަހު އިތުރު ފަރުވާއަށް ރައިސް ނަޝިދު ވަޑައިގަތީ ޖަރުމަނަށެވެ.

ވަރުގަދަ ސެކިއުރިޓީއަކާއި އެކު ނަޝީދު އެއާޕޯޓަށް ވަޑައިގެންނެވި މޮޓޯކޭޑް ދަތުރުކުރަމުން ދިޔަ މަގުގައި ގިނަ އަދަދެއްގެ ސިފައިން ހަތިޔާރާއެކު ހަރަކާތްތެރިވިއެވެ. އޭޑިކޭ ސަރަހައްދުވެސް އޮތީ އެ ވަގުތު ބަންދުކޮށްފައެވެ.

ނަޝީދު ޖަރުމަންވިލާތައް ދަތުރުކުރައްވަނީ ޕްރައިވެޓް ޖެޓެއްގައެވެ.

އޭޑީކޭ ހޮސްޕިޓަލުން އެމަނިކުފާނުގެ ސީރިއަސް އޮޕަރޭޝަންތަކެއް ކޮށްފައިވާއިރު، މި އޮޕަރޭޝަންތަކަށް 16 ގަޑިއިރު ހޭދަ ކުރެއްވި ކަމަށް އޭޑިކޭއިން މައުލޫމާތުދެއެވެ.

މި ހަމަލާއާ ގުޅިގެން މިހާތަނަށް ތިން މީހަކު ވަނި ހައްޔަރުކޮށްފައެވެ. ބޮމުގެ ހަމަލާ އާއި ގުޅިގެން ހައްޔަރުކޮށްފައިވަނީ މއ. ފޭރުގެ މުޖާޒް އަހުމަދު އާއި ގއ. ކޮނޑޭ ފޮޅޭމާ ތަހުމީން އަހުމަދު އާއި ވ. ތިނަދޫ، ހިޔާ، އަދުހަމް އަހުމަދު ރަޝީދު އެވެ. އަދުހަމް އަކީ ނަޝީދަށް ހަމަލާދިނުމަށް ތައްޔާރުކޮށްފައިވާ ޑިވައިސް ރިމޯޓެއް ބޭނުންކޮށްގެން ގޮއްވާލި މީހާއެވެ. އަދި ތަހުމީނަކީ ބޮން ގޮއްވާލުމަށް ބޭނުން ކުރި ސައިކަލްގެ ވެރިމީހާ އެވެ.