މާލެ ސަރަހައްދުގެ ކާފިއު ގަޑި އަވަސް ކޮށްފި

ކޮވިޑު ބަލި ފެތުރުން ހުއްޓުވުމަށް މާލެ ސަރަހައްދުގައި އިޢުލާން ކޮށްފައިވާ ކާފިއު ގަޑި އަވަސް ކޮށްފި އެވެ.

ހެލްތު ޕްރޮޓކްޝަން އެޖެންސީ (އެޗްޕީއޭ) އިން ބުނީ މާދަމާއިން ފެށިގެން މާލެ ސަރަޙައްދުގެ ކާފިއު ގަޑި ފެށޭނީ ރޭގަނޑު 9:00އިން ކަމަށެވެ. އަދި ކާފިއު ގަޑި ނިމޭނީ ފަތިހު 4:00 އަށް ކަމަށެވެ.

އިޝްތިހާރު

މި ވަގުތުތަކުގައި ހިނގާބިނގާވެ އުޅުމާއި ދުއްވާ އެއްޗެހި ދުއްވުމަކީ މަނާ ކަމެއް ކަމަށާއި ޒަރޫރީ ބޭނުމަށާއި ޑެލިވަރީގެ ޚިދުމަތްތަކަށް ފުލުހުން ހުއްދަ ދޫކުރަމުން ގެންދާނެ ކަމަށްވެސް އެޗްޕީއޭ އިން ބުންޏެވެ.

މި ފަހަކަށް އައިސް ކޮވިޑު ކޭސްތައް ރާއްޖޭގައި އިތުރުވަމުން އަންނަ އިރު، ފާއިތުވި 24 ގަޑިއިރު ކޮވިޑަށް ޕޮޒިޓިވްވި މީހުންގެ އަދަދު ވެސް ވަނީ 734 އަށް އަރާފަ އެވެ. މީގެތެރޭގައި މާލެ ސަރަހައްދުން ޕޮޒިޓިވް ވި 540 މީހުން ވެސް ހިމެނެ އެވެ.

ކޮވިޑު ކޭސްތައް އިތުރުވާން ފެށުމުން އެ އެޖެންސީން މީގެކުރިން އިއުލާން ކުރީ ރޭގަނޑު 00:00 އިން ފެށިގެން ފަތިހު 4:00 އަށް ވެހިކަލް ދުއްވުން މަނާ ވާނެ ކަމަށެވެ.

ކޯވިޑް-19 ގެ ހާލަތުން ރައްކާތެރިވުމަށް އަޅަމުންދާ ފިޔަވަޅުތަކުގެ ތެރެއިން، 6 މެއި 2021 ގައި މާލެ ސަރަޙައްދުގައި (މާލެ، ހުޅުމާލެ، ވިލިމާލެ) ރޭގަނޑު 9:00 ން ފަތިހު 4:00 އަށް ކާފިއު ހިންގުމަށްވަނީ ނިންމާފަ. (1/2)

— Health Protection Agency (@HPA_MV) May 5, 2021

ކާފިއުގެ އިތުރުން މާލެ ސަރަޙައްދުގައި ހިމެނޭ ސަރުކާރުގެ އޮފީސްތަކާއި ސްކޫލްތައްވެސް ބަންދުކޮށްފައިވާ އިރު، ސިނާއީ މަސައްކަތް ކުރާ ރަށްރަށުން މީހުން ދިރިއުޅޭ ރަށްރަށަށް ދަތުރުކުރުން ވެސް ވަނީ މަނާ ކޮށްފަ އެވެ.

އިންޑިއާއިން ދިވެހިރާއްޖެއަށް އަންނަ ދިވެހިންނާއި ވާރކްޕާމިޓް ހޯލްޑަރުން 14 ދުވަހުގެ ކަރަންޓީނެއް ފުރިހަމަ ކުރުމާއި ކަރަންޓީނަށް ފަހު ޕީސީއާރު ޓެސްޓް ހެދުމާއި ވެކްސިންގެ ދެ ޑޯޒް ފުރިހަމަކުރުމުން ދަތުރުކުރުމަށް ދެވިފައިވާ ލުއިތައް މެދުކަނޑައިލުމަށްވެސް ވަނީ ނިންމާފަ އެވެ.

މިހާތަނަށް 25،473 މީހުން ވަނީ ކޮވިޑުން ރަނގަޅުވެފައިވާ އިރު، ރަނގަޅު ނުވެ 7،109 މީހުން އެބަތިއްބެވެ. އަދި ހޮސްޕިޓަލްގައި އެޑްމިޓްކޮށް 198 މީހަކަށް ދަނީ ފަރުވާ ދެމުންނެވެ.

ކޮވިޑް ޖެހިގެން ރާއްޖެއިން މިހާތަނަށް ވަނީ 74 މީހަކު ނިޔާވެފަ އެވެ.