މުޒާހިރާކުރި ކުޑަކުއްޖަކަށް ސަޢުދީގައި މަރުގެ ޙުކުމް ތަންފީޒުކޮށްފި

ވަލީއަހުދު މުޙައްމަދު ބިން ސަލްމާންގެ ވެރިކަމުގައި ސިޔާސީ ނުފޫޒު ފޯރުވުމަށް ބޭނުންކުރާ އުކުޅެއްގެ ގޮތުގައި ސިއްރިއްޔާތުގައި މި މަރުގެ އަދަބު ތަންފީޒުކުރުން އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ވަނީ ކުށްވެރިކޮށްފަ އެވެ.

ސަޢޫދީގެ އިރުމަތީ ޕްރޮވިންސްގެ ޝިޢައިންގެ އަޣުލަބިއްޔަތު އޮންނަ ސަރަހައްދަށް ނިސްބަތްވާ ކުޑަކުއްޖެއްގެ ގޮތުގައި ހުއްޓާ ހައްޔަރުކުރި ކުއްޖަކާއި ސައުދީގެ އިތުރު ރައްޔިތެއްގެ މަރުގެ އަދަބު އެ ޤައުމުން ވަނީ ތަންފީޒުކޮށްފަ އެވެ.

އިޝްތިހާރު

ހޮނިހިރު ދުވަހު ސަޢޫދީ ޕްރެސް އެޖެންސީން ނެރުނު ބަޔާނެއްގައި ޤުރައިރީސްގެ މަރުގެ އަދަބު ތަންފީޒުކޮށްފައިވާކަން ރިޔާޟުން ވަނީ ކަށަވަރުކޮށްދީ ފައެވެ.

ސަޢޫދީގެ އިރުމަތީ ޕްރޮވިންސްގެ ނުފޫޒުގަދަ ޝިޢައި އާއިލާއަކަށް ނިސްބަތްވާ ގުރައިރީސް އަކީ 2011-12 ގެ ”އަރަބި ބަހާރު“ ގެ މުޒާހަރާތައް ކުރިއަށްދިޔަ ދުވަސްވަރު އުމުރުން އެންމެ 14 ނުވަތަ 15 އަހަރުގެ ކުއްޖެކެވެ.

ގުރައިރީސްގެ އާއިލާއާއި ދައުލަތުގެ ސަލާމަތީ ބާރުތަކާ ދެމެދު ކުރިންވެސް ވަނީ ކުރިމަތިލުންތަކެއް ހިނގާފަ އެވެ. އެގޮތުން އޭނާގެ އެއް ބޭބެ ސަލާމަތީ ބާރުތަކުން މަރާލާފައިވާއިރު އަނެއް ބޭބެ އުމުރުން 13 އަހަރުގައި ހައްޔަރުކޮށް ނުވަ އަހަރުގައި ކުރި ކަމަށް ބުނާ ކުށެއްގެ ދައުވާގައި މަރުގެ އަދަބު ދިނުމަށް ވަނީ ހުށަހަޅާފަ އެވެ.

ސަޢޫދީ ދާޚިލީ ވުޒާރާއިން ހާމަކޮށްފައިވާ ގޮތުގައި ފާޟިލް ބިން ޙަސަން ބިން ޢަބްދުﷲ އައްޞަފްވާނީގެ މަރުގެ އަދަބުވެސް ހޮނިހިރު ދުވަހު ވަނީ ތަންފީޒުކޮށްފަ އެވެ.

އެ ވުޒާރާއިން ބުނި ގޮތުގައި މި ދެމީހުންގެ މައްޗަށް ކުށް ސާބިތުވެފައިވަނީ ”ޓެރަރިޒަމްގެ ކުށްތަކަކަށެވެ“.

އޭގެ ތެރޭގައި ބޭރުގެ ޓެރަރިސްޓް ޖަމާއަތަކާ ގުޅުމާއި ހަތިޔާރާއި ގޮވާތަކެތި ބޭނުންކޮށްގެން ސަލާމަތީ ބާރުތަކަށާއި އުޅަނދުތަކަށް ބަޑިޖެހުމާއި، ވަޒަން ގެންގުޅުމާއި އަދި ސައުދީގެ އެތެރޭގައި ހިންގާ އޮޕަރޭޝަންތަކަށް މާލީ އަދި ލޮޖިސްޓިކް އެހީތެރިކަން ފޯރުކޮށްދިނުން ހިމެނެ އެވެ.

އެސް.ޕީ.އޭގެ ބަޔާނުގައިވާ ގޮތުން މި މައްސަލަތައް ޚާއްޞަ ޖިނާއީ ކޯޓުތަކުން ބަލައި ކުށް ސާބިތުވުމަށްފަހު ސުޕްރީމް ކޯޓުން ވަނީ އެ ނިންމުންތަކަށް ތާއީދުކޮށްފަ އެވެ. އަދި މި ހުކުމްތައް ތަންފީޒުކޮށްފައިވަނީ ރަސްކަމުގެ ފަރީމާނަކުން އެކަން ތަސްދީގުކުރުމަށްފަހުގަ އެވެ.