މިއަހަރު ފިތުރު ޒަކާތް ދެއްކުން އެންމެ ރަނގަޅީ އޮންލައިންކޮށް: މިނިސްޓްރީ

މިއަހަރު ފިތުރު ޒަކާތް ދެއްކުން އެންމެ ރަނގަޅީ އޮންލައިންކޮށް ކަމަށް އިސްލާމިކް މިނިސްޓްރީން ބުނެފި އެވެ.

އެ މިނިސްޓްރީން އެކަމަށް ބާރުއަޅާ ބުނީ ކޯވިޑް19ގެ ޙާލަތާ ގުޅިގެން މިފަހަރު ޑެސްކްތައް ބަހައްޓައިގެން ޒަކާތް ބަލައިގަތުން ކުރިއަށްގެންދާނީ، އޮންލައިންކޮށް ޒަކާތް ދެއްކުމަށް ދަތިވާ މީހުންނަށް އެކަނިކަމަށެވެ.

އިޝްތިހާރު

މިއަހަރުގެ ފިތުރު ޒަކާތް މާލެ ސަރަހައްދާއި އަތޮޅުތަކުގައި ބަލައިގަންނަން ފަށާފައިވާ އިރު، މިނިސްޓްރީއަށް ގޮސްގެން ޒަކާތް ދެއްކޭނީ މާދަމާއިން ފެށިގެން ކަމަށް ވަނީ ބުނެފަ އެވެ.

“ މިފަހަރު ޒަކާތް ބަލައިގަތުމަށް ބަހައްޓާނީ އެންމެ ޑެސްކެއް. މިއީ އޮންލައިންކޮށް ޒަކާތް ނުދެއްކޭ މީހުންނަށް ހަމަޖައްސައިދޭ އިންތިޒާމެއް.“ އިސްލާމިކް މިނިސްޓްރީން ބުންޏެވެ.

މާލޭގައި އިސްލާމިކް މިނިސްޓްރީގައި ބަހައްޓާ ޑެސްކުން ޒަކާތް ބަލައިގަންނާނެ ގަޑިތައް އަދި މިނިސްޓްރީން އަދިހާމައެއް ނުކުރެއެވެ.

ދިރާގާ އުރީދޫ އަދި މޯލްޑިވްސް އިސްލާމިކް ބޭންކާ، ބޭންކް އޮފް މޯލްޑިވްސް މެދުވެރުކޮށް ޒަކާތް ދެއްކޭނެ އިންތިޒާމް ވަނީ ހަމަޖައްސާފައެވެ. އުރީދޫއާއި ދިރާގުން އެސްއެމްއެސް މެދުވެރިކޮށްވެސް ޒަކާތް ދެއްކޭނެއެވެ.

މީގެއިތުރަށް ފަހިޕޭ އެޕްލިކޭޝަންއާއި ޕޯޓަލް މެދުވެރިކޮށްވެސް ޒަކާތް ދެއްކޭނެއެވެ. މިއަހަރު ފިތުރު ޒަކާތުގެ ގޮތުގައި ނެރުމަށް ކަނޑައަޅާފައިވަނީ އެރަށެއްގައި ކެއުމަށް އާއްމުކޮށް ކައިއުޅުނު ބާވަތެއްގެ 2.4 ކިލޯގެ އަގެވެ.

މާލޭ ސަރަޙައްދުގައި ޒަކާތް ބަލައިގަންނާނެ އެންމެ ފަހުގެ ތާރީޚަކީ މޭ މަހުގެ 14 ވަނަ ދުވަހުއެވެ.