17 އަހަރުގެ ކުއްޖަކަށް ސިނގިރޭޓު ވިއްކަން އިންކާރުކުރުމުން ބަޑިޖަހައި މަރާލައިފި

17 އަހަރުގެ ކުޑަކުއްޖަކަށް ސިނގިރޭޓު ވިއްކަން އިންކާރުކުރުމުން، އެމެރިކާގެ ޝިކާގޯގައި އުޅޭ އުރުދުންގެ ރައްޔިތަކު ބަޑިޖަހައި މަރާލައިފި އެވެ.

ޝިކާގޯގައި އަމިއްލަ ވިޔަފާރިއެއް ހިންގަމުން އައި އުމުރުން 34 އަހަރުގެ މުޙައްމަދު ފާއިޤް އަލް-ހަޝައިޝާ މަރާލާފައިވަނީ، ދުންފަތުގެ އިސްތިޢުމާލުކުރުމުގެ ޤާނޫނީ ޢުމުރު ހަމަނުވާ ކުއްޖަކަށް ސިނގިރޭޓު ވިއްކަން ދެކޮޅު ހެދުމާ ގުޅިގެންނެވެ.

އިޝްތިހާރު

އޭނާގެ ބޮޑުބޭބެ އަޝްރަފް އަލް-ހަޝައިޝާ ”ރޯޔާ ނިއުސް“ އަށް މައުލޫމާތު ދިން ގޮތުގައި، މި ހާދިސާ ހިނގަން މެދުވެރިވީ ޢުމުރުން 17 އަހަރުގެ ފިރިހެން ކުއްޖަކު ފިހާރައަށް ވަދެ ސިނގިރޭޓު ގަންނަން އުޅުމުންނެވެ.

އެ ސަރަހައްދުގެ ޤާނޫނުތަކަށް ބޯލަނބައި، މުޙައްމަދު ވަނީ އެ ކުއްޖާއަކީ ޤާނޫނީ ގޮތުން ސިނގިރޭޓު ގަނެވޭ ޢުމުރުގެ މީހެއްކަން ޔަޤީންކުރުމަށް އައިޑީ ކާޑު ދެއްކުމަށް އެދިފަ އެވެ.

ނަމަވެސް އެ ކުއްޖާއަކީ އުމުރު ހަމަނުވާ ކުއްޖަކަށް ވާތީ، މުޙައްމަދު ވަނީ ސިނގިރޭޓު ވިއްކަން އިންކާރުކޮށްފަ އެވެ.

މިކަމާ ގުޅިގެން އެ ކުއްޖާ ފިހާރައިން ނުކުމެގެން ގޮސް، ކުޑަވަގުތުކޮޅެއްގެ ތެރޭގައި ބަޑިއަކާއެކު އެނބުރި އައިސް މުޙައްމަދުގެ ކަރުގެ ސަރަހައްދަށް ބަޑިޖެހި އެވެ.

ބަޑީގެ ހަމަލާގައި ލިބުނު އަނިޔާތަކަށް ފަރުވާ ދެމުން ދަނިކޮށް މުޙައްމަދު ވަނީ ނިޔާވެފައެވެ.

އަޝްރަފް އަލް-ހަޝައިޝާ ކަށަވަރުކޮށްދިން ގޮތުގައި، ޝިކާގޯގެ ފުލުހުން މިހާރު ވަނީ ހަމަލާދިން 17 އަހަރުގެ ކުއްޖާ ދެނެގަނެފަ އެވެ. އަދި އޭނާ ހައްޔަރުކޮށް ޤާނޫނީ ފިޔަވަޅު އެޅުމަށްޓަކައި ފުލުހުން އަންނަނީ ޚާއްޞަ އޮޕަރޭޝަނެއް ހިންގަމުންނެވެ.

މުޙައްމަދު އެމެރިކާގައި ދިރިއުޅެމުން އަންނަތާ 15 އަހަރު ވެފައިވާއިރު، އޭނާއަކީ އެމެރިކާގެ ރައްޔިތުކަންވެސް ހޯދާފައިވާ މީހެކެވެ. އޭނާ ނިޔާވިއިރު ހަތަރު ކުޑަކުދިން ތިބި އިރު، އޭނާގެ އަންހެނުން އިނީ ފަސްވަނަ ދަރިފުޅަށް ބަނޑުބޮޑުކޮށެވެ.

އާއިލާގެ ފަރާތުން ސިފަކުރާ ގޮތުގައި މުޙައްމަދަކީ ޢާއިލާއަށްޓަކައި ބުރަ މަސައްކަތްކުރާ، ހިތްހެޔޮ މީހެކެވެ. އޭނާގެ ކުއްލި މަރާއެކު އޭނާގެ ޢާއިލާއަށާއި، ރައްޓެހިންގެ އިތުރުން އެމެރިކާގައި ދިރިއުޅޭ އުރުދުންގެ މުޖުތަމައަށް ވަނީ ބޮޑު ސިހުމަކާއި މާޔޫސްކަމެއް ލިބިފަ އެވެ.

މުޙައްމަދުގެ ކަށުނަމާދާއި ވަޅުލުމުގެ ކަންތައްތައް އެމެރިކާގައި ކުރިއަށްދާއިރު، އޭނާގެ އުފަން ޤައުމު ކަމަށްވާ އުރުދުންގައި ތައުޒިޔާ ކިޔުމުގެ ކަންތައްތައް ކުރިއަށް ގެންދިއުމަށް ވަނީ ހަމަޖެހިފަ އެވެ.