ޚާން ޔޫނިސްގެ ރެފިއުޖީ ކޭމްޕުގައި ބޭއްވި ފުޓުބޯޅަ މެޗެއް ބަލަން އެތައް ސަތޭކަ ބަޔަކު އެއްވެއްޖެ

ޚާން ޔޫނިސްގެ ރެފިއުޖީ ކޭމްޕުގައި ބޭއްވި ފުޓުބޯޅަ މެޗެއް ބަލަން އެތައް ސަތޭކަ ބަޔަކު އެއްވެއްޖެ އެވެ.

ޣައްޒާގެ ދެކުނުގައިވާ މި ސަރަހައްދުގައި މެޗު ކުޅެމުންދަނީ ގެދޮރު ގެއްލިފައިވާ މީހުން ދިރިއުޅޭ ފޭލިގެތަކުން ވަށާލެވިފައިވާ ހުސްބިމެއްގަ އެވެ.

އިޝްތިހާރު

މި ކުޅިވަރު ހަރަކާތް ބާއްވާފައިވަނީ ކުރިއަށްދާ ހަނގުރާމައިގައި ޣައްޒާގެ ފުޓުބޯޅަ ޢާއިލާގެ ގިނަ ކުޅުންތެރިންތަކަކާއި ކުޅިވަރުގެ ދާއިރާގައި ހަރަކާތްތެރިވާ ފަރާތްތަކެއް ޝަހީދުވެފައިވާ ދަނޑިވަޅެއްގަ އެވެ.

އިބްރާހީމް މުޙާރިބް ކެމެރާގައި ރެކޯޑުކޮށްފައިވާ މަންޒަރުތަކުން ފެންނަ ގޮތުގައި، ޣައްޒާގެ ދެކުނުގައިވާ ޚާން ޔޫނިސްގެ ރެފިއުޖީ ކޭމްޕެއްގައި ކުރިއަށްދިޔަ މި ފުޓުބޯޅަ މެޗު ބަލަން އެތައް ސަތޭކަ ފަލަސްތީނު ރައްޔިތުންނެއް ވަނީ އެއްވެފަ އެވެ.

މި ވަގުތީ ދަނޑު އޮތީ އިސްރާއީލުގެ އުދުވާނީ ހަމަލާތަކުގެ ސަބަބުން ގެދޮރު ގެއްލި، ހާލުގައި ޖެހިފައިވާ ޣައްޒާގެ ރައްޔިތުން ދިރިއުޅޭ ފޭލިގެތަކުން ވަށާލެވިފަ އެވެ.

މި އެއްވުމަކީ އިސްރާއީލުގެ ހަމަލާތަކުގެ ސަބަބުން ޣައްޒާގެ ފުޓުބޯޅަ މުޖުތަމައަށް ލިބެމުންދާ ބޮޑެތި ގެއްލުންތަކުގެ ތެރެއިން ފެނިގެންދިޔަ މަންޒަރެކެވެ.

ފަލަސްތީނުގެ ފުޓުބޯޅަ އިދާރާތަކުން ހާމަކޮށްފައިވާ ގޮތުގައި 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް ޖުމްލަ 567 ކުޅުންތެރިންނާއި، ކޯޗުން އަދި ކުޅިވަރުގެ ދާއިރާގައި މަސައްކަތްކުރާ ފަރާތްތައް ވަނީ ޝަހީދުވެފަ އެވެ.

ހަނގުރާމައިގެ ސަބަބުން ލިބެމުންދާ ބޮޑެތި ގެއްލުންތަކާއި މަޖުބޫރުވެފައިވާ ހިޖުރަކުރުންތަކާ އެކުވެސް، ފުޓުބޯޅައަކީ ޣައްޒާގެ ގިނަ ބައެއްގެ އާންމު ދިރިއުޅުމުގެ މުހިންމު ބައެކެވެ. އަދި ހާލަތު ތަންދޭ މިންވަރަކުން، އެމީހުން ދަނީ މިފަދަ މެޗުތަކާއި ކުޅިވަރުގެ ހަރަކާތްތައް ބާއްވައި އެކުވެރިކަން އާލާކުރަމުންނެވެ.