ސަޢޫދީގެ ސްކޫލް ފޮތްތަކުން ޔަހޫދީންނާ ދެކޮޅު ވާހަކަތައް އުނިކޮށްފި

ތަޢުލީމީ ދާއިރާގެ ކަންކަން ބަލާ އިމްޕެކްޓް-އެސްއީ އިން ނެރުނު ރިޕޯޓެއްގައިވާ ގޮތުން، ސަޢޫދީ ޢަރަބިއްޔާގެ 2025-2026 ވަނަ އަހަރުގެ މުޤައްރަރުން ޔަހޫދީންނާ ދެކޮޅު އަދި ހަރުކަށި ފިކުރުތަކަށް ބާރުދޭ ބައިތައް ވަނީ އުނިކޮށްފަ އެވެ.

މިއީ ދީނީ ގޮތުން އެކަކު އަނެކަކަށް އިހުތިރާމްކުރުމާއި، ސުލްހަވެރިކަމާއެކު އުޅުމަށް ބާރުއެޅުމަށާއި، އެ ޤައުމުގެ ”ވިޜަން 2030“ ގެ ލަނދުދަނޑިތަކާ އެއްގޮތަށް މުޤައްރަރަށް ގެންނަ އިސްލާހީ ބަދަލުތަކުގެ ދަށުން ކުރެވުނު ކަމެކެވެ.

އިޝްތިހާރު

މިގޮތުން އުނިކުރެވުނު ބައިތަކުގެ ތެރޭގައި، ހަތްވަނަ ގްރޭޑްގެ ފޮތެއްގައި ދީނީ މައިނޯރިޓީތަކާ ބެހޭގޮތުން އޮތް ހަދީޘެއްގެ މާނަ އާއި، ޔަހޫދީންނަކީ ނަރަކަވަންތަވެރިން ކަމަށް ބުނާ ބަސްތަކާއި، ޔަހޫދީންނާއި ނަޞާރާއިންނާ ރަހުމަތްތެރިކަން ބޭއްވުން މަނާކުރާ މާއްދާތައް ހިމެނެ އެވެ.

މީގެ އިތުރުން، އުސްމާނީ ޚިލާފަތް އުވިގެން ދިއުމުގައި ޔަހޫދީންގެ ނުފޫޒު އޮތް ކަމަށް ދޭހަވާ ގޮތަށް އޮތް ބައިތައް ވެސް މިހާރު ވަނީ އުނިކޮށްފަ އެވެ.

އިސްރާއީލާ ގުޅޭގޮތުން ބޭނުންކޮށްފައިވާ ބަސްމަގަށް ވެސް ވަނީ ބަދަލުތަކެއް ގެނެސްފަ އެވެ. އެގޮތުން ”ޒަޔަނިސްޓު ދުޝްމަނުން“ ފަދަ އިބާރާތްތަކުގެ ބަދަލުގައި ”އިސްރާއީލުގެ އިސްތިޢުމާރު“ މި އިބާރާތް މިހާރު ބޭނުންކުރެ އެވެ. އަދި ”ޤުދުސްގެ މިނިވަންކަމަށްޓަކައި މުސްލިމުން ދުވަހަކުވެސް މަސައްކަތް ހުއްޓައެއް ނުލާނެ“ ކަމަށް ބުނާ ބައި ވެސް ވަނީ އުނިކޮށްފަ އެވެ.

ނަމަވެސް، ރަސްމީ ޗާޓުތަކުގައި އިސްރާއީލުގެ ނަން އަދިވެސް ހިމަނާފައެއް ނުވެ އެވެ.

އަލަށް ގެނެވުނު ބަދަލުތަކުގައި އެކި ދީންތަކުގެ މެދުގައި އޮންނަ ގުޅުންތަކަށް ބޮޑު ސަމާލުކަމެއް ދީފައިވެ އެވެ.

ކީރިތި ރަސޫލާ ﷺ ޔަހޫދީންނާއި، ނަޞާރާއިންނާއި، ޢަރަބި އެކި ޤަބީލާތަކާއެކު ހެއްދެވި ސުލްހައިގެ އެއްބަސްވުންތަކަށް މިހާރު އަލިއަޅުވާލާފައިވެ އެވެ. އަދި ސުލްހަވެރިކަމާއެކު އުޅުމާއި ޚިޔާލު ބަދަލުކުރުމަކީ އިންސާނީ އަސާސީ ބޭނުމެއްކަން ފާހަގަކޮށްފައިވެ އެވެ.

ޖިހާދާއި ހަނގުރާމައާ ގުޅޭ މާއްދާތަކަށް ވެސް ވަނީ ބަދަލު ގެނެސްފަ އެވެ. ނުވަވަނަ ގްރޭޑްގެ އިސްލާމީ ތަޢުލީމު ފޮތުގައި ހަނގުރާމައިގައި ބައިވެރިނުވާ މީހުންނަށް އަނިޔާކުރުން ސަރީހަކޮށް މަނާކޮށްފައިވާއިރު، ބާރަވަނަ ގްރޭޑްގެ ފޮތުން ހަނގުރާމައިގައި ޝަހީދުވުމާ ގުޅޭ ބައެއް އިބާރާތްތައް ވަނީ އުނިކޮށްފަ އެވެ.

އެހެންނަމަވެސް، މީގެ ކުރިން އުނިކުރި ބައެއް ބައިތައް ވަނީ އަލުން ހިމަނާފަ އެވެ. އެގޮތުން ދިހަވަނަ ގްރޭޑްގެ ފޮތުގައި ޖިހާދުކުރުމަކީ ވެރިޔާއަށް ކިޔަމަންތެރިވުމާ ގުޅިފައިވާ ކަމެއް ކަމަށް ބުނާ ބައި ވަނީ އަލުން ހިމަނާފަ އެވެ.

މީގެ އިތުރުން، ހަރުކަށި ފިކުރުގެ ޖަމާޢަތްތަކާއި ޓެރަރިސްޓް ޖަމާޢަތްތައް ސަޢުދީގެ މުޤައްރަރުގައި ޞަރީޙަކޮށް ކުށްވެރިކުރެ އެވެ.

އައިސިސް، އަލްގައިދާ، ހިޒްބުالله، ހޫޘީން އަދި މުސްލިމް ބްރަދަހުޑް އަކީ ޓެރަރިޒަމާއި ހަރުކަށި ފިކުރު ފަތުރާ ޖަމާޢަތްތަކެއްގެ ގޮތުގައި ވަނީ ބަޔާންކޮށްފަ އެވެ.