އިސްރާއީލުގެ އެއްވެސް ބައިވެރިވުމެއް ސޯމާލިއާގައި އޮތުމަކީ ޤަބޫލުކުރެވޭނެ ކަމެއް ނޫން – ރައީސް ހަސަން 

އަލްޖަޒީރާއަށް ދެއްވި ޚާއްޞަ އިންޓަވިއުއެއްގައި ރައީސް ހަސަން ޝެއިޚް މަހުމޫދު ވިދާޅުވީ، މެދުއިރުމަތީގެ މައްސަލަތަކުގެ ތެރެއަށް ސޯމާލިއާ ވެއްދުމަށް ކުރާ އެއްވެސް މަސައްކަތެއް ކާމިޔާބުވިޔަ ނުދެއްވާނެ ކަމަށެވެ.

އިސްރާއީލުގެ އެއްވެސް ބައިވެރިވުމެއް ސޯމާލިއާގައި އޮތުމަކީ އެއްވެސް ހާލަތެއްގައި ޤަބޫލުކުރެވޭނެ ކަމެއް ނޫން ކަމަށާއި، މެދުއިރުމަތީގެ ހަމަނުޖެހުންތަކުގެ ތެރެއަށް ސޯމާލިއާ ދަމައިގަތުމަށް ކުރާ ކޮންމެ މަސައްކަތަކާ ދެކޮޅަށް ތެދުވާނެ ކަމަށް ރައީސް މަހުމޫދު ވިދާޅުވި އެވެ.

އިޝްތިހާރު

އޭނާ އިތުރަށް ވިދާޅުވީ، އިސްރާއީލުން ބެރްބެރާގައި ކަނޑުގެ އަސްކަރީ މަރުކަޒެއް ޤާއިމުކޮށް، އެ ސިޓީގެ އެއާޕޯޓު ބޭނުންކުރުމަށް ރާވަމުންދާ ކަމަށެވެ. އަދި މިކަމުގެ އަސްލު މަޤްޞަދަކީ ޚަލީޖުގެ ޤައުމުތަކާއި އީރާނާ ގާތްވުން ކަމަށްވެސް ރައީސް ފާހަގަކުރެއްވި އެވެ.

ބެރްބެރާއަކީ ސޯމާލިއާގެ ހުޅަނގު އުތުރުގައި އޮންނަ، އަމިއްލައަށް މިނިވަންކަން އިޢުލާނުކޮށްފައިވާ ސޯމާލީލޭންޑުގެ ބަނދަރު ސިޓީއެކެވެ.

އިސްރާއީލުން މިދިޔަ އަހަރު ސޯމާލީލޭންޑަކީ މިނިވަން ދަޢުލަތެއްގެ ގޮތުގައި ބަލައިގެންފައިވީ ނަމަވެސް، ސޯމާލިއާގެ މަރުކަޒީ ސަރުކާރުން ބުނަމުންދަނީ އެއީ ސޯމާލިއާގެ ބައެއް ކަމަށެވެ.

ބެރްބެރާ އޮންނަނީ އަބްލް މަންދަބު ކަނޑުއޮޅި ކައިރީގައި، ކަނޑުގެ އަނެއް ފަރާތުން ޔަމަނާ ކުރިމަތިލައިގެންނެވެ.

އީރާނަށް ތާޢީދުކުރާ ހޫޘީން މީގެ ކުރިން ވަނީ އެ ސަރަހައްދުން ދަތުރުކުރާ އިސްރާއީލާ ގުޅުންހުރި އުޅަނދުތައް ބްލޮކްކޮށްފަ އެވެ.

”އިސްރާއީލުގެ މި ހަރަކާތްތަކުގެ ސަބަބުން އަޅުގަނޑުމެންގެ ޤައުމަށް ކުރިމަތިވާ ގޮންޖެހުންތަކުން އަޅުގަނޑުމެން އަރައިގަންނާނަން،“ ރައީސް މަހުމޫދު ވިދާޅުވި އެވެ.

އޭނާ އިތުރަށް ވިދާޅުވީ، އިސްރާއީލުގެ މި ރޭވުންތަކަކީ ”ގްރޭޓަރ އިސްރާއީލް“ މަޝްރޫޢުގެ ދަށުން ކުރިއަށްދާ ކަންކަން ކަމަށެވެ.

މިއީ އިސްރާއީލުގެ މިހާރުގެ ބޯޑަރުތަކުން ބޭރުގައިވާ ބިންތަކަށް އަތްގަދަކުރުމަށް ގެންގުޅޭ ފަލްސަފާއެކެވެ.

އިސްރާއީލުން މިއީ ރަސްމީ ސިޔާސަތެއްގެ ގޮތުގައި ބަލައިގެންފައި ނުވި ނަމަވެސް، ބޮޑުވަޒީރު ބެންޖަމިން ނަތަންޔާހޫ 2025 ވަނަ އަހަރުގެ އޯގަސްޓް މަހު ދެއްވި އިންޓަވިއުއެއްގައި އެ ތަސައްވުރާ ގުޅުން އޮތް ކަމަށް ވިދާޅުވުމުން ޢަރަބި ސަރުކާރުތަކުން ވަނީ އެކަން ކުށްވެރިކޮށްފަ އެވެ.

ސޯމާލިއާގެ ރައީސް އިސްރާއީލް ސިފަކުރެއްވީ ބައިނަލްއަޤްވާމީ ޤާނޫނުތަކަށް ބޯނުލަނބާ، ސަރަހައްދުގެ ހަމަޖެހުން ނަގާލާ ބާރެއްގެ ގޮތުގަ އެވެ.

ސޯމާލީލޭންޑުން ސޯމާލިއާގެ ކިބައިން މިނިވަންކަން އިޢުލާނުކުރީ 1991 ވަނަ އަހަރު އެވެ.