އެމެރިކާއިން ފަލަސްތީނުގެ ރައީސަށް އދ.ގައި ވާހަކަދެއްކުން މަނާކޮށްފި

އެމެރިކާއިން ދެވަނަ ފަހަރަށްވެސް ފަލަސްޠީނު ރައީސް މަހްމޫދު އައްބާސްއަށް، ނިއުޔޯކްގައި ބޭއްވުމަށް ހަމަޖެހިފައިވާ އދ.ގެ ޢާންމު މަޖިލީހަށް ހާޒިރުވުމަށް ވިސާ ދިނުމަށް ދެކޮޅު ހަދައިފި އެވެ.

ސްޓޭޓް ޑިޕާޓްމަންޓުން ބުނެފައިވަނީ، ފަލަސްޠީނު ވެރިން ސުލްހައިގެ ދޮރު ބަންދުކޮށްލާ ފަދަ ހަރަކާތްތައް ހިންގަމުންދާ ކަމަށް ބެލެވޭތީ، ޕީ.އެލް.އޯ އާއި ފަލަސްޠީނު އޮތޯރިޓީގެ ވެރިންނަށް ވިސާ ދިނުން ހިފެހެއްޓުމުގެ ނިންމުން ދަމަހައްޓާ ކަމަށެވެ.

އިޝްތިހާރު

ވަކިން ޚާއްޞަކޮށް، ބައިނަލްއަޤްވާމީ ކޯޓުތަކުގައި އިޒްރޭލާ ދެކޮޅަށް ހިންގާ ޤާނޫނީ ހަރަކާތްތަކާއި، ފަލަސްޠީނު ދަޢުލަތަށް  ބަލައިގަތުން ހޯދުމަށް ކުރާ މަސައްކަތްތައް ސްޓޭޓް ޑިޕާޓްމަންޓުން ސީދާ ފާހަގަކޮށްފައިވެ އެވެ.

ފަލަސްޠީނުގެ ފޮރިން މިނިސްޓްރީން މިކަން ހަރުކަށި ބަހުން ކުށްވެރިކޮށް ބުނެފައިވަނީ، ބައިނަލްއަޤްވާމީ މުއައްސަސާތަކަށް ރުޖޫޢަވުމަކީ ފަލަސްޠީނު ދައުލަތުގެ ޙައްޤެއް ކަމަށާއި، ޙަޤީޤީ ނުރައްކަލަކީ ހިފެހެއްޓިފައިވާ ބިންތަކުގައި ހިންގާ ވަޒަންވެރިކުރުވުމާއި ރައްޔިތުން ހިޖުރަކުރުވުމުގެ ސިޔާސަތުތައް ކަމަށެވެ.

ފާއިތުވި އަހަރުވެސް ހަމަ ފިޔަވަޅު އެޅި ނަމަވެސް، 145 ވޯޓު 5 ވޯޓާ ދެކޮޅަށް ފާސްކޮށް، ރައީސް އައްބާސްއަށް ދުރުން ތަޤްރީރު ކުރުމުގެ ހުއްދަ ދިނެވެ. ފަލަސްތީނު ދަޢުލަތް މިހާރު ވަނީ ދުނިޔޭގެ 80 އިންސައްތައަށްވުރެ ގިނަ ޤައުމުތަކުން، (157 ގައުމަކުން) ބަލައިގެންފަ އެވެ.