ނައިވާދޫގައި ކަނޑުގެ މާހައުލު ހިމާޔަތްކުރުމުގެ ޕްރޮގްރާމެއް ބާއްވައިފި

ހދ. ނައިވާދޫގައި ކަނޑުގެ ދިރުންތަކާއި މާހައުލު ރައްކާތެރިކުރުމުގެ ދާއިރާއިން މީހުން ބިނާކޮށް، ޤާބިލުކަން އިތުރުކުރުމުގެ ޚާއްޞަ ހަރަކާތެއް ކާމިޔާބުކަމާއެކު ބާއްވައިފި އެވެ.

މި ހަރަކާތަކީ އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީ.އާރް.އޭ)، މޯލްޑިވްސް ރެޒިލިއަންޓް ރީފްސް އަދި ނައިވާދޫ ޑައިވް އެންޑް ވޯޓާ ސްޕޯޓްސް ގުޅިގެން ކުރިއަށްގެންދިޔަ ހަރަކާތެކެވެ. މި ތަމްރީނު ޕްރޮގްރާމް ކުރިއަށް ގެންގޮސްފައިވަނީ ދުނިޔޭގެ މަޝްހޫރު ޑައިވިންގ ޖަމްޢިއްޔާއެއް ކަމަށްވާ ”ޕަޑީ“ (PADI) ގެ ފަންނީ އެހީތެރިކަމާއެކުގަ އެވެ.

އިޝްތިހާރު

މި ތަމްރީނުގެ މައިގަނޑު މަޤްޞަދަކީ ދިވެހިރާއްޖޭގެ ކަނޑުގެ މާހައުލު ހިމާޔަތްކޮށް ބެލެހެއްޓުމަށް ބޭނުންވާ މުހިންމު ޢިލްމާއި، އަމަލީ ހުނަރުތައް ބައިވެރިންނަށް އުނގަންނައިދިނުމެވެ. މިގޮތުން، މި ޕްރޮގްރާމުގެ ޒަރީއާއިން ކަނޑުގެ ދިރުންތައް ރައްކާތެރިކުރުމަށް ބޭނުންވާ އަގުހުރި މަޢުލޫމާތުތަކާއި ފަންނީ ހުނަރުތައް ބައިވެރިންނަށް ވަނީ ފޯރުކޮށްދެވިފަ އެވެ.

ރާއްޖޭގެ ކަނޑުތަކާއި ފަރުތައް ހިމާޔަތްކުރުމަށްޓަކައި ލޯކަލް ފެންވަރުގައި މީހުން ބިނާކުރުމަށް ”ޕަޑީ“ އިން ވެދެމުންދާ މެދުކެނޑުމެއްނެތް އެހީތެރިކަމާއި އެއްބާރުލުމަށް މި ހަރަކާތް އިންތިޒާމުކުރި ފަރާތްތަކުން ވަނީ އެ ފަރާތަށް ޚާއްޞަ ޝުކުރެއް އަދާކުރައްވާފަ އެވެ.