މައްކާ އެއްބަސްވުން: ބާރު ދައްކާލަން ކޮންމެހެން ބޭނުންތެރިކަނެއް

މެދުއިރުމަތީގެ މަސްރަޙަށް މި އަންނަ ބޮޑު ބަދަލަކީ އެމެރިކާގެ ބަލިކަށިކަމުގެ ސަބަބުން ކުރިމަތިވި ކަމެކެވެ. ސަރަޙައްދީ ބޮޑު ތިން ބާރަކުން މިވަނީ އިސްރާއީލުގެ އިސްތިޢުމާރީ ބާރުވެރިކަމުގެ ސިލްސިލާ ނިމުމަކަށް ގެނައުމަށް ނިންމާފަ އެވެ.

އަންނަ އޮކްޓޯބަރު މަހަށް ތިން އަހަރު ފުރޭއިރު، އިސްރާއީލުން ޣައްޒާގައި ހިންގަމުންދާ ނަސްލު ނައްތާލުމުގެ ލާއިންސާނީ ޢަމަލުތަކާއި، ހިފާފައިވާ ހުޅަނގު އައްސޭރިއާއި، ދެކުނު ލުބުނާނާއި އަދި އީރާނުގައި ހިންގާ ހަނގުރާމައިގެ ޖަރީމާތައް ވަނީ ތަކުރާރުކޮށްފަ އެވެ.

އިޝްތިހާރު

މި ދިގު މުއްދަތުގެ ބޮޑު ބައިގައި، ތުރުކީއާއި ޢަރަބި ދުނިޔެއިން ތިބީ ބިރުން ހައިރާންވެފަ އެވެ. ނަމަވެސް، ޢަމަލީ ގޮތުން އެއްވެސް ކަމެއް ނުކުރެ އެވެ. ”އަހަރެމެންނަށް ކުރެވޭނީ ކީއްހެއްޔެވެ؟ އިސްރާއީލާ ދެކޮޅަށް ހަނގުރާމައެއް ފަށަންވީ ހެއްޔެވެ؟“ މިއީ އެއްވެސް ބާރެއް ނެތް މީހުންގެ ޢާންމު އުޒުރަކަށް އޮތީ ވެފަ އެވެ.

މި ވާހަކަތައް އަންކާރާއިން ވެސް ތަކުރާރުކޮށް އިވެމުންދިޔަ އެވެ. ވިޔަފާރީގެ ގުޅުންތައް ކަނޑާލާފައިވާ ކަމަށް ބުނި ނަމަވެސް، އަޒަރުބައިޖާނުގެ ތެޔޮ ތުރުކީގެ ބަނދަރުތައް މެދުވެރިކޮށް އިސްރާއީލުގެ އަސްކަރިއްޔާއަށް ފޯރުކޮށްދިނުން އޮތީ ހުއްދަކޮށްފަ އެވެ.

އެހެންނަމަވެސް، އިސްރާއީލާއި އެމެރިކާގެ އެހީތެރިކަމާއެކު އީރާނުގެ ކުރުދީ ހަނގުރާމަވެރިން އީރާނަށް އެރުމަށް ކުރި މަސައްކަތް ތުރުކީން ވަނީ ހުއްޓުވާފަ އެވެ. އަދި ފަލަސްޠީނުގެ މިނިވަން ދައުލަތެއް އުފެއްދުމަށް ސާފު މަގެއް ފެންނަން ނެތުމުން، ސަޢޫދީ ޢަރަބިއްޔާއިން ވަނީ އިސްރާއީލާއެކު ގުޅުން އިޢާދަކުރުމަށް ފަޚުރުވެރިކަމާއެކު އިންކާރުކޮށްފަ އެވެ.

ނަމަވެސް، ވޭތުވެދިޔަ ތިން އަހަރުގެ ބޮޑު ބައިގައި އިސްރާއީލުގެ ބޮޑުވަޒީރު ނަތަންޔާހޫއަށް ވަނީ ސަރަޙައްދުގެ ނިޒާމު ބަދަލުކުރުމުގެ ފުރިހަމަ މިނިވަންކަން ލިބިފަ އެވެ.

އެގޮތުން ސޫރިޔާގެ ދެކުނުގެ ބޮޑު ބައެއް ހިފުމާއި، ހަތް މިލިއަން ޔަހޫދީން ބޭނުންކޮށްގެން 450 މިލިއަން ޢަރަބިންގެ މައްޗަށް ބާރުފޯރުވުމަށްޓަކައި އައު ”ހައި-ޓެކް“ ސަލާމަތީ ނިޒާމެއް ބިނާކުރަން އޭނާ މަސައްކަތް ކުރި އެވެ.

މިކަން މިގޮތަށް ދެމިއޮތީ މިދިޔަ ހަފުތާއާ ހަމައަށެވެ. އެމެރިކާގެ ރައީސް ޑޮނަލްޑް ޓްރަމްޕަށް ބިލިއަނުން އިންވެސްޓް ކުރެއްވި ވަލީއަހުދު މުޙައްމަދު ބިން ސަލްމާން، ތުރުކީއާއި ޕާކިސްތާނާއެކު ދިފާޢީ އެއްބަސްވުމެއްގައި ސޮއިކުރައްވަން މަޖުބޫރުވީ ސަބަބަކީ، ތާރީޚު ދިރާސާކުރާ ފަރާތްތަކުން ކުރިމަގުގައި ފުންކޮށް ބަލާނެ މުހިންމު ކަމެކެވެ.