އެމެރިކާގެ ހިއްސާގެ ބާޒާރު ރެކޯޑް މިންވަރަކަށް އުފުލި، ތެލުގެ އަގު ދަށްވެފައިވާއިރު ޓްރަމްޕް ބުނަމުންދަނީ އީރާނާއެކު މަޝްވަރާތައް ކުރިއަށްދާކަމަށް

އެމެރިކާ އާއި އީރާނާ ދެމެދު ކުރިއަށްދާ މަޝްވަރާތަކާ ގުޅޭގޮތުން ދެ ގައުމުން ތަފާތު މައުލޫމާތުތަކެއް ހާމަކުރަމުންދާ ދަނޑިވަޅެއްގައި، އެމެރިކާގެ މައި ހިއްސާގެ ބާޒާރު ކަމަށްވާ އެސް.އެންޑް.ޕީ 500 (S&P 500) އޭގެ އެންމެ މަތީ ރެކޯޑާ ގާތްކޮށްފިއެވެ.
އެމެރިކާ އާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމަ ހުއްޓާލުމުގެ މަޝްވަރާތަކާ މެދު އުފެދިފައިވާ ދެބަސްވުންތަކުގެ ތެރެއިން، އެމެރިކާގެ ހިއްސާގެ ބާޒާރު ވަނީ ވަރަށް ބޮޑަށް ކުރިއަރާފައެވެ. އެގޮތުން ހޯމަ ދުވަހު އެސް.އެންޑް.ޕީ 500 އިންޑެކްސް 1.5 އިންސައްތަ މައްޗަށް ގޮސްފައިވާއިރު، މިއީ މިދިޔަ ޖޫން މަހުގެ 2 ވަނަ ދުވަހު ގާއިމުކުރި 7,620.90 ގެ ރެކޯޑާ ވަރަށް ގާތް އަދަދެކެވެ.
ޓެކްނޮލޮޖީ ކުންފުނިތަކަށް ހާއްސަ ނަސްޑާކް (Nasdaq Composite) އިންޑެކްސް 2.1 އިންސައްތަ މައްޗަށް ގޮސްފައިވާއިރު، ޑޯ ޖޯންސް އިންޑަސްޓްރިއަލް އެވްރެޖް (Dow Jones Industrial Average) 1.3 އިންސައްތަ ކުރިއަރައި، 53,178.41 ގެ އާ ރެކޯޑަކަށް ވަނީ އަރާފައެވެ.
މި ކުރިއެރުމުގައި އެންމެ ބޮޑު ދައުރެއް އަދާކުރީ ދުނިޔޭގެ އެންމެ ބޮޑެތި ޓެކްނޮލޮޖީ ކުންފުނިތަކެވެ. އެގޮތުން ފޭސްބުކްގެ މައި ކުންފުނި މެޓާގެ ހިއްސާ 6 އިންސައްތަ މައްޗަށް ދިޔައިރު، މައިކްރޯސޮފްޓް، އެމެޒޯން އަދި އަލްފަބެޓްގެ ހިއްސާގެ އަގު ވަނީ 4.4 އާއި 4.9 އިންސައްތައާ ދެމެދުގެ މިންވަރަކަށް އުފުލިފައެވެ. މީގެ އިތުރުން އެންވީޑިއާ އަދި ޓެސްލާގެ ހިއްސާގެ އަގުވެސް ވަނީ ފާހަގަކޮށްލެވޭ މިންވަރަކަށް ކުރިއަރާފައެވެ.
ބާޒާރަށް އައި މި ބޮޑު ބަދަލާ ގުޅޭގޮތުން ސިމްކޯޕްގެ އިންވެސްޓްމަންޓް ޑިޒިޝަން ރިސާޗްގެ މެނޭޖިންގ ޑިރެކްޓަރު މެލީސާ ބްރައުން އަލްޖަޒީރާއަށް ވިދާޅުވީ، ބާޒާރު މިހާ ބޮޑަށް ކުރިއަރައިގެން ދިއުމަކީ ހައިރާންވާންޖެހޭ ކަމެއް ކަމަށެވެ. ސަބަބަކީ މި ކުރިއެރުމަކީ ބާޒާރުގެ ހާލަތު ނޭދެވޭ ގޮތަކަށް އޮތް ދަނޑިވަޅެއްގައި، ފާހަގަކޮށްލެވޭ އަސާސީ ސަބަބެއް ނެތި އައި ބަދަލަކަށް ވުމެވެ.
ދުނިޔޭގެ ބާޒާރުގައި ތެލުގެ އަގުތަކަށް ބަލާއިރު، ބްރެންޓް ކުރޫޑްގެ އަގު ހޯމަ ދުވަހު 5 އިންސައްތަ ދަށްވި ނަމަވެސް، އަންގާރަ ދުވަހު އޭޝިއާގެ ބާޒާރުތައް ހުޅުވުނުއިރު އަގުތައް ވަނީ ކުޑަކޮށް އުފުލިފައެވެ.
ސިޔާސީ މަޝްރަހަށް ބަލާއިރު، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ އީރާނާއެކު މަޝްވަރާތައް ކުރިއަށްދާ ކަމަށާއި، އަލުން ހަމަލާތައް ދޭން ފެށުމުގެ ކުރިން އެއްބަސްވުމަކަށް އައުމަށް އީރާނަށް ފަހު ފުރުސަތު ދޭން ބޭނުންވާ ކަމަށެވެ. ޓްރަމްޕް މިހެން ވިދާޅުވީ، ދެވަނަ ބޮޑު ހަނގުރާމައަށްފަހު ދޭނެ އެންމެ ބޮޑު ހަމަލާ ދިނުމުގެ ރޭވުންތައް ކެންސަލްކުރިކަން އިއުލާނުކުރެއްވިތާ އެއްދުވަސް ފަހުންނެވެ.
ނަމަވެސް، އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވަނީ އެމެރިކާގެ ވާހަކަތައް ދޮގުކުރައްވާފައެވެ. އޭނާ ވިދާޅުވީ އެމެރިކާއާއެކު އެއްވެސް މަޝްވަރާއެއް ކުރިއަށް ނުދާ ކަމަށާއި، އެމެރިކާގެ އޮފިޝަލުންނާ ބައްދަލުކުރުމުގެ އެއްވެސް ރޭވުމެއްވެސް ނެތް ކަމަށެވެ. އަދި މިވަގުތު އީރާނުން މަޝްވަރާ ކުރަމުންދަނީ އޮމާނާއެކު، ހޮރްމޫޒް ކަނޑުއޮޅިން ދަތުރުފަތުރު ކުރުމާ ގުޅޭގޮތުން ކަމަށްވެސް އޭނާ ވިދާޅުވިއެވެ.

އިޝްތިހާރު