ސްޓޭންޑަރޑް ފަސްޓް އެއިޑް ޓްރެއިނިންގ ޕްރޮގްރާމްގެ ފުރަތަމަ ބުރު ނިންމާލައިފި

ހުޅުމާލޭގައި ހުންނަ ދިވެހި ރެޑް ކްރެސެންޓްގެ ހެޑްކުއާޓަރޒްގައި ބޭއްވި ޚާއްޞަ ރަސްމިއްޔާތެއްގައި، ”ސްޓޭންޑަރޑް ފަސްޓް އެއިޑް ޓްރެއިނިންގ“ ޕްރޮގްރާމްގެ ފުރަތަމަ ބުރުގެ ބައިވެރިންނަށް ސެޓްފިކެޓް ހަވާލުކޮށްފިއެވެ. ސެޓްފިކެޓްތައް ހަވާލުކޮށްދެއްވީ މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓްގެ ސްޓޭޓް މިނިސްޓަރ ނަޝާތު ރަޝީދުއެވެ.

މި ތަމްރީނު ޕްރޮގްރާމަކީ ކުއްލި ހާލަތްތަކުގައި އެހީތެރިކަން ފޯރުކޮށްދިނުމުގެ ހުނަރު ދަސްކޮށްދިނުމަށް ކުރިއަށްގެންދިޔަ ޕްރޮގްރާމެކެވެ. މި ބުރުގައި ޖުމްލަ 22 ބައިވެރިން ވަނީ ތަމްރީނު ފުރިހަމަކޮށް، ސެޓްފިކެޓް ހާސިލްކޮށްފައެވެ.

އިޝްތިހާރު

މި ރަސްމިއްޔާތުގައި ވާހަކަފުޅު ދައްކަވަމުން ސްޓޭޓް މިނިސްޓަރ ނަޝާތު ރަޝީދު ވަނީ، ވޭތުވެދިޔަ ތިން ދުވަހުގެ ތެރޭގައި ބައިވެރިން ހާސިލްކުރި އިލްމާއި ހުނަރުގެ ބޭނުން ހިފުމުގެ މުހިންމުކަމުގެ މައްޗަށް އަލިއަޅުވާލައްވާފައެވެ. ވަޒީފާގެ މާހައުލުގައާއި އާންމު ދިރިއުޅުމުގައި ދިމާވާ ކުއްލި ހާލަތްތަކުގައި، މި ދަސްކުރި ހުނަރުތައް މެދުނުކެނޑި ބޭނުންކޮށް، އެ ހުނަރުތައް އިތުރަށް ހަރުދަނާކުރުމަށް ބައިވެރިންނަށް އިލްތިމާސްކުރެއްވިއެވެ.

މިފަދަ ތަމްރީނުތަކަކީ މުޖުތަމައުގެ ރައްކާތެރިކަން އިތުރުކުރުމަށާއި، ކުއްލި ހާލަތްތަކުގައި އަވަސް އެހީތެރިކަން ފޯރުކޮށްދިނުމަށް ބޭނުންވާ ތަމްރީނު ލިބިފައިވާ މީހުން އުފެއްދުމަށް ކުރިއަށްގެންދާ މުހިންމު މަސައްކަތެކެވެ.