މޯދީ އިސްރާއީލަށް ތާއީދުކުރަނީ ކީއްވެ؟

އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމަ ފެށުމުގެ ދެ ދުވަސް ކުރިން، އިންޑިއާގެ ބޮޑުވަޒީރު ނަރެންދުރަ މޯދީ އިސްރާއީލަށް ދަތުރުކުރީ ކީއްވެގެން ހެއްޔެވެ؟

މިއީ ފާއިތުވި ދުވަސްތަކުގައި އިންޑިއާގެ ރައްޔިތުން އުފައްދަމުންދާ ސުވާލެކެވެ.

އިޝްތިހާރު

އީރާނުގައި މިހާރު ކުރިއަށްދާ ހަނގުރާމައިގައި މިހާތަނަށް 1,000 އަށްވުރެ ގިނަ މީހުން މަރުވެފައިވާއިރު މުޅި ގަލްފު ސަރަހައްދަށް ބޮޑެތި ގެއްލުންތަކެއް ލިބިފައިވެ އެވެ.

މިއީ މި ޖީލުގައި މެދުއިރުމަތީގައި ހިނގާނެ އެންމެ ނަތީޖާ ބޮޑު ހަނގުރާމައަށް ވުމަކީ އެކަށީގެންވާ ކަމެކެވެ.

އީރާނަކީ އިސްރާއީލުން އެ ސަރަހައްދުގައި ފަތުރަމުންދާ ބާރާއި ނުފޫޒާ ދެކޮޅަށް އޮތް އެންމެ ފަހު ހުރަހެވެ.

މޯދީ، ނަތަންޔާހޫއާ ބައްދަލުކޮށް، ދެޤައުމުގެ ގުޅުން ”ސުލްޙަ، އީޖާދު އަދި ތަނަވަސްކަމުގެ ޚާއްސަ ސްޓްރެޓީޖިކް ޕާޓްނަޝިޕް“ އަކަށް މަތިކޮށް، އިސްރާއީލުގެ ރައްޔިތުންނަށް ކޮށްދިން ޚިދުމަތުގެ އަގުވަޒަންކުރުމުގެ ގޮތުން ދިން ”ކްނެސެޓް މެޑަލް“ ޙަޞިލުކުރިއިރު، ކުރިއަށް އޮތް ޙަމަލާއާ ބެހޭ މަޢުލޫމާތު އޭނާއަށް ކުރިން އެނގޭ ހެއްޔެވެ؟

އީރާނުގެ ރޫޙާނީ ލީޑަރު އާޔަތުﷲ ޢަލީ ޚާމަނާއީ އަވަހާރަކޮށްލި ފަހުން، އިންޑިއާ ސަރުކާރުން އެކަން ކުށްވެރިކޮށްފައެއް ނުވެ އެވެ. އަދި ބޮޑުވަޒީރު މޯދީ، އީރާނުގެ ރައްޔިތުންނަށް ކުޑަވެސް ތައުޒިޔާއެއް މިހާތަނަށް ފޮނުއްވާފައެއް ނުވެ އެވެ.

މީގެ އިތުރުން، އިންޑިއާގެ ދަޢުވަތަކަށް ”އިންޓަރނޭޝަނަލް ފްލީޓް ރިވިއު“ ގައި ބައިވެރިވުމަށްފަހު އެނބުރި ދަތުރުކުރި އީރާނުގެ އަސްކަރީ އުޅަނދަކަށް، ބައިނަލްއަޤްވާމީ ކަނޑުގެ ސަރަޙައްދުން އެމެރިކާގެ މަނަވަރެއް ވަނީ ޙަމަލާދީ ފައްތާލާފަ އެވެ.

އިންޑިއާގެ ކުރީގެ އަސްކަރީ އޮފިސަރުންނާއި ޑިޕްލޮމޭޓުން ސިފަކުރާ ގޮތުގައި، މިއީ އިންޑިއާ ސަރުކާރަށް ލިބުނު ”ސްޓްރެޓީޖިކް ލަދެއް“ އަދި ސަރަހައްދީ ފެންވަރުގައި އެޤައުމުގެ އިތުބާރު ގެއްލިގެންދިޔަ ކަމެކެވެ. އިންޑިއާގެ މި ފިނި އިޖާބައިގެ ސަބަބުން އެޤައުމުގެ އިދިކޮޅު ފަރާތްތަކާއި ޢިލްމީ ބޭފުޅުން ތިއްބެވީ ހައިރާންވެފަ އެވެ.

ސަބަބަކީ އީރާނަކީ އެތައް އަހަރެއް ވަންދެން އިންޑިއާގެ އެންމެ ގާތް އެކުވެރިންގެ ތެރޭގައި ހިމެނޭ ގައުމަކަށް ވުމެވެ.

އިންޑިއާގެ ރައްޔިތުން މިހާރު ސުވާލު އުފައްދަނީ، އެގައުމުގެ ”މިނިވަން ޚާރިޖީ ސިޔާސަތު“ ގެއްލި، އެމެރިކާގެ ދަށުވެފައިވާ ޤައުމަކަށް އިންޑިއާ ވެއްޖެތޯ އެވެ.

ނަމަވެސް، މަސްރަހު ދިރާސާކުރާ ފަރާތްތަކުން ބުނާ ގޮތުގައި، އީރާނާ ދެކޮޅަށް ކުރާ ހަނގުރާމައަށް އިންޑިއާއިން ދޭ ތާއީދަކީ، ބަލާލުމުން ޙައިރާންވާންޖެހޭ ފަދަ ކަމެއް ނޫނެވެ.