ޓްރަމްޕްަށް މެސީގެ ރީތިވެއްޖެ

އެމެރިކާގެ ރައީސް ޑޮނަލްޑް ޓްރަމްޕް، ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ ލިއޮނަލް މެސީ އާއި އޭނާގެ ޓީމު، އިންޓަރ މިއާމީއަށް ބުރާސްފަތި ދުވަހު ވައިޓް ހައުސްއިން މަރުޙަބާ ކިޔައިފި އެވެ.

ނަމަވެސް، މެސީ އަންނަކަން އެނގުނީ ދަރިފުޅު ބުނެެމަ ކަމަށް ޓްރަމްޕް ބުނެޏެވެ.

އިޝްތިހާރު

2025 ވަނަ އަހަރުގެ މޭޖަރ ލީގު ސޮކަރ (MLS) ކަޕް ކާމިޔާބުކުރި އިންޓަރ މިއާމީގެ ޝަރަފުގައި ބޭއްވި މި ރަސްމިއްޔާތުގައި، ކުޅިވަރުގެ ކާމިޔާބީއާ އެކު އަސްކަރީ ބާރުވެރިކަމުގެ ވާހަކަތައް ވެސް ޓްރަމްޕް ވަނީ މަސްހުނި ކޮށްފަ އެވެ.

އެގޮތުން، އިރާނުގައި އެމެރިކާއިން ކުރިއަށްގެންދާ އަސްކަރީ އޮޕަރޭޝަނާ ބެހޭގޮތުން ވެސް ރައީސް ވާހަކަ ދެއްކި އެވެ.

”އެމެރިކާގެ އަސްކަރިއްޔާއާއި އިސްރާއީލުގެ ބައިވެރިން ގުޅިގެން، ތާވަލަށްވުރެ މާ ކުރިން އަދި މީގެ ކުރިން ދުވަހަކުވެސް ފެނިފައި ނުވާފަދަ ވަރުގަދަ މިންވަރަކަށް ދުޝްމަނުން ދަނީ މުޅިން ފުނޑުފުނޑު ކުރަމުން،“ އާޖެންޓީނާގެ ތަރި މެސީ ކައިރީގައި ހުއްޓައި ޓްރަމްޕް ބުންޏެވެ.

މީގެ އިތުރުން ޓްރަމްޕް ބުނި މުހިންމު ބައެއް ވާހަކަތަކުގެ ތެރޭގައި:

• މެސީއަށް މަރުޙަބާ ކިޔުން: ”މީގެ ކުރިން އެމެރިކާގެ އެއްވެސް ރައީސަކަށް ބުނުމުގެ ފުރުޞަތު ލިބިފައި ނުވާ ބަހެއް ބުނުމުގެ ޝަރަފު އަހަންނަށް އެބައޮތް. ވައިޓް ހައުސްއަށް މަރުޙަބާ، ލިއޮނަލް މެސީ.“

• ކުޅުންތެރިންގެ ރީތިކަން: ޓީމުގެ ކުޅުންތެރިންގެ ”ރީތިކަމަށް“ ތައުރީފު ކުރަމުން، އާޖެންޓީނާގެ މިޑްފީލްޑަރު ރޮޑްރިގޯ ޑި ޕޯލްއާ ސުވާލު ކުރީ ”މި ޓީމުގައި ހުތުރު ކުޅުންތެރިއަކު ނުހުރޭތަ؟“ މިހެންނެވެ. އަދި މަޖާޒީ ގޮތެއްގައި ”އަހަރެން ރީތި ފިރިހެނުން ދެކެ ލޯތްބެއް ނުވޭ، އެމީހުން ފެނުމުން އަމިއްލަ ނަފްސާ މެދު އޮންނަ އިތުބާރު ކުޑަވޭ،“ ކަމަށް ބުންޏެވެ.

ހަދިޔާ އާއި ކުރިއަށް އޮތް މުބާރާތްތައް

އިންޓަރ މިއާމީގެ ފަރާތުން ރައީސަށް ވަނީ 47 ނަންބަރު ޖާޒީއެއް (47 ވަނަ ރައީސްގެ ގޮތުން)، ފުޓްބޯޅައެއް އަދި ޓީމުގެ ޕިންކް ކުލައިގެ ގަޑިއެއް ހަދިޔާކޮށްފައެވެ.

ކުރިއަށް އޮތް ހޫނު މޫސުމުގައި އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕް 2026 އާއި އޮލިމްޕިކްސްއަށް ވެސް ޓްރަމްޕް ވަނީ އިޝާރާތް ކޮށްފަ އެވެ.