މެދުއިރުމަތީގައި ހަމަނުޖެހުމުގެ ސަބަބުން ރާއްޖެ ތެލަކަށް ނުޖެހޭނެ – ވަޒީރު ސަޢީދު

އެމެރިކާއާއި އިސްރާއިލު އިސްވެ އީރާނަށް ދޭން ފަށާފައިވާ ޙަމަލާތަކާ ގުޅިގެން މެދުއިރުމަތީގައި ހަމަނުޖެހުންތައް އުފެދިފައިވީ ނަމަވެސް، އޭގެ ސަބަބުން ދިވެހިރާއްޖެ ތެލަށް ނުޖެހޭނެ ކަމުގެ ޔަގީންކަން އެބަ އޮތް ކަމަށް އިކޮނަމިކް މިނިސްޓަރު މުޙައްމަދު ސަޢީދު ވިދާޅުވެއްޖެ އެވެ.

މިދިޔަ ހޮނިހިރު ދުވަހުން ފެށިގެން އެމެރިކާއާއި އިސްރާއިލުން އިސްވެ އީރާނަށް ދޭން ފަށާފައިވާ ޙަމަލާ ތަކުގެ ރައްދުގައި އީރާނުންވެސް އަންނަނީ މެދު އިރުމަތީގެ ގައުމު ތަކުގައި ހުންނަ އެމެރިކާގެ މިލިޓަރީ ބޭސް ތަކާއި އެމްބަސީތަކަށް އަމާޒުކޮށް ހަމަލާތައް ދެމުންނެވެ.

އިޝްތިހާރު

މީގެ އިތުރުން މެދުއިރުމަތީ ޤައުމު ތަކުގެ ބައެއް އެއާޕޯޓް ތަކަށްވެސް އީރާނުގެ ޙަމަލާތައް އަންނަނީ އަމާޒު ކުރަމުންނެވެ.

މީގެ ސަބަބުން، މެދުއިރުމަތީ ޤައުމު ތަކުގެ ވައިގެ ސަރަޙައްދު ބަންދުވެސް ކުރެވުނެއެވެ.

އެފަހުންވެސް، ކަނޑުމަގުންނާއި ވައިގެ މަގުން އެ ސަރަޙައްދުގެ ޤައުމުތަކަށް ދަތުރުފަތުރު ކުރުން ވަނީ ދަތިކަމަކަށް ވެފައެވެ.

މެދު އިރުމަތީގައި ހަމަނުޖެހުމެއް އުފެދިއްޖެ ނަމަ އެކަމުގެ އަސަރު އެންމެ ފުރަތަމަ ކުރާ އެއްޗަކީ ތެޔޮ ކަމަށާ، މިފަހަރު ގޭހުގެ އަގަށްވެސް އޭގެ އަސަރު ކޮށްފައިވާ ކަމަށް ސަޢީދު ވިދާޅުވި އެވެ.

ސައީދު ވިދާޅުވީ ރާއްޖޭގެ ތެލުގެ ކަންކަން ބަލަހައްޓަމުންދަނީ އެފަދަ ކަންކަމަށް ބަލައިގެން ކަމަށެވެ.

އެގޮތުން އެންމެ ދަތިވާނެ ޙާލަތެއްގައިވެސް ތެޔޮ ލިބޭނެ އެހެން ގޮތްތައް ހަމަޖައްސަމުންދާ ކަން އޭނާ ފާހަގަކުރެއްވި އެވެ.