ކަރާޗީގައި ހިނގި އަލިފާނުގެ ހާދިސާގައި މަރުވި މީހުންގެ އަދަދު 60 އަށް އަރައިފި
ކަރާޗީގައި ހިނގި އަލިފާނުގެ ހާދިސާގައި މަރުވި މީހުންގެ އަދަދު 60 އަރާފައިވާކަމަށް ޕާކިސްތާނުގެ އޮފިޝަލުން ބުނެފިއެވެ. އެފަރާތުން ހާމަކޮށްފައިވާ ގޮތުގައި، ޝޮޕިންގ ސެންޓަރެއްގައި ހިނގި މިހާދިސާގައި އެއްކޮށް އަނދާހުލިވެފައިވާ ފިހާރައެއްގެ ތެރެއިން މަރުވެފައިވާ 30 ހަށިގަނޑު ދާދިފަހުން ވެސް ވަނީ ފެނިފައެވެ.
ހޮނިހިރު ދުވަހު ކަރާޗީގެ ގުލް ޕްލާޒާ ޝޮޕިންގ ކޮމްޕްލެކްސްގައި ހިނގި މިހާދިސާގައި، މަރުވި މީހުންގެ އިތުރުން ގެއްލިފައިވާ 80 މީހުން ހޯދުމުގެ މަސައްކަތްވެސް އޮފިޝަލުން އަދިވެސް ދަނީ ކުރަމުންނެވެ. ހަލާކުވެފައިވާ ޝޮޕިންގ ސެންޓަރުގެ ތެރެއިން މީހުން ހޯދުމުގެ މަސައްކަތް މިއަދުވެސް އޮފިޝަލުން ވަނީ ކޮށްފައެވެ.
ޕާކިސްތާނުގެ ނޫހަކަށް މަޢުލޫމާތު ދެމުން ޑެޕިއުޓީ އިންސްޕެކްޓަރ ޖެނަރަލ ސަޔިދް އަސަދު ރަޒާ ބުނެފައިވަނީ، މީހުން ހޯދުމުގެ މަސައްކަތުގެ ތެރެއިން ޝޮޕިންގ ސެންޓަރުގެ ފިހާރައެއްގެ ތެރެއިން އިތުރު 30 ހަށިގަނޑު ފެނިފައިވާ ކަމަށާއި، އެހެންކަމުން މިހާދިސާގައި މަރުވި މީހުންގެ އަދަދު 60 އިން މައްޗަށް އަރާފައިވާ ކަމަށެވެ. އަދި މަރުވި މީހުންގެ ޔަގީން އަދަދެއް ބުނަން އެނގޭނީ ޑީއެންއޭ އެނަލިސިސްއެއް ހެދުމަށްފަހު ކަމަށްވެސް ބުނެފައިވެ އެވެ.
ލަފާކުރެވޭ ގޮތުގައި ފިހާރައިގެ ތެރެއިން ފެނުނު 30 މީހުންނަކީ ޝޮޕިންގ ސެންޓަރުގައި އަލިފާން ރޯވުމުން އަލިފާނުން ސަލާމަތްވުމަށް އެފިހާރައަށްވަތް މީހުން ކަމަށާއި، އެމީހުން ތިބީ ފިހާރައިގެ ދޮރު އެތެރެއިން ތަޅުލައިގެން ކަމަށެވެ.
ސިންދުގެ ޗީފް މިނިސްޓަރ ވަނީ މިހާދިސާގައި މަރުވި މީހުންގެ އަދަދު އިތުރުވަމުންދާތީ އެކަމާ ހިތާމަ ފާޅުކުރައްވާފަ އެވެ.
މިލިޔުން ކިޔާލުމުން
