ދާއިމީ ނަތީޖާ އިޢުލާންކުރުން ލަސްވީ ވަކި ފަރާތެއްގެ ނުފޫޒާ ހެދިއެއް ނޫން: ޝަރީފް
ދާއިމީ ނަތީޖާ އިޢުލާންކުރުން ލަސްވީ ވަކި ފަރާތެއްގެ ނުފޫޒާ ހެދިއެއް ނޫންކަމަށް އިލެކްޝަންސް ކޮމިޝަން (އީސީ) ގެ ރައީސް އަޙްމަދު ޝަރީފް ވިދާޅުވެއްޖެއެވެ.
މި މަހުގެ 23 ވީ އާދިއްތަ ދުވަހު ބޭއްވި ރިޔާސީ އިންތިޚާބުގެ ދާއިމީ ނަތީޖާ އިޢުލާންކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި ޝަރީފް ވިދާޅުވީ ދާއިމީ ނަތީޖާ އިޢުލާންކުރުން ލަސްވީ ވަކި ފަރާތެއްގެ ނުފޫޒާ ހެދިއެއް ނޫންކަމަށާއި ނަތީޖާ އިޢުލާންކުރުމުގެ ކުރިން ކޮމިޝަނުން ބަލަން ޖެހޭ ކަންކަން ބެލުމަށް ކަމަށެވެ. އަދި ނަތީޖާ މިއަދު އިޢުލާން ކުރަން މި ނިންމީ ރޭގެ ވަގުތެއްގައި ކަމަށެވެ.
ޝަރީފް އިތުރަށް ވިދާޅުވީ އިންތިޚާބުގެ ހުރިހާ ކަމެއްވެސް ގެންދިޔައީ ޤާނޫނީ އިމުގެ ތެރެއިން ކަމަށެވެ. އަދި މެމްބަރުން މަސައްކަތް ކުރެއްވީ ނުފޫޒެއްގެ ދަށުވެ، ވަކި ފަރާތަކަށް އިންތިޚާބު ކާމިޔާބުކޮށްދެއްވަން ނޫން ކަމަށެވެ.
އީސީގެ ރައީސް މިހެން ވިދާޅުވެފައިވާ އިރު، އިންތިޚާބުގެ ނަތީޖާއާ ގުޅިގެން ކޮމިޝަންގެ 5 މެމްބަރުންނަށް ތަފާތު ތުހުމަތުތަކާއިއެކު މަރުގެ އިންޒާރުތައްވެސް ދިން ކަމަށްވެސް އޭނާ ވަނީ ވިދާޅުވެފައެވެ. އަދި މެމްބަރުން ރިޝްވަތު ނެންގެވި ކަަމަށް ކުރާ ތުހުމަތަށް ޖަވާބު ދެއްވައި ޝަރީފް ވިދާޅުވީ ޤާނޫނާ ޚިލާފު އެފަދަ އެއްވެސް ކަމެއް އިންތިޚާބު ކުރިންވެސް އަދި ފަހުންވެސް ކޮމިޝަންގެ އެއްވެސް މެމްބަރަކު ކުރައްވާފައި ނުވާނެ ކަމަށެވެ.
މިލިޔުން ކިޔާލުމުން
