ވެނެޒުއޭލާގެ ރެފުޖީންނަށް ބްރެޒިލްގެ ބޯޑަރު ބަންދު ނުކުރުމަށް ސުޕްރީމް ކޯޓުން އަމުރު ކޮށްފި
ހާލުގައި ޖެހިގެން އެހީތެރިކަމަށް އެދި ބްރެޒިލްއަށް އަންނަ ރެފިއުޖީން މަނާ ކުރުމަށް ބްރެޒިލްގެ ބޯޑަރު ބަންދު ކުރުމަކީ އިންސާފުވެރި ގޮތެއް ނޫން ކަމަށް ބުނެ، ރެފިއުޖީންނަށް ބޯޑަރު ހުޅުވުމަށް އެ ޤައުމުގެ ސުޕްރީމް ކޯޓުން އަމުރު ކޮށްފިއެވެ.
ބްރެޒިލްއިން ދާދި ފަހުން އެ ޤައުމުގެ ބޯޑަރު ބަންދު ކޮށްފައި ވަނީ، ހާލުގައި ޖެހިފައިވާ ވެނެޒުއޭލާއިން އެ ޤައުމަށް އެތެރެވާ ރެފިއުޖީންގެ ޢަދަދު އިތުރު ވުމާއި ގުޅިގެންނެވެ.
އެހެންނަމަވެސް ބޯޑަރު ބަންދު ކުރުމަށް ފެޑަރަލް ކޯޓުން ކުރި އަމުރު ސުޕްރީމް ކޯޓުން ބާތިލް ކޮށްފައި ވަނީ ހޯމަ ދުވަހުއެވެ.
ބޯޑަރު ހުޅުވުމަށް އަމުރު ކުރަމުން ސުޕްރީމް ކޯޓުގެ ޖަޖު ރޯސާ ވެބަރ ބުނެފައި ވަނީ، ރެފިއުޖީންނަށް އަޅާލުމުގެ ދަތިކަމާހުރެ ކަމަށް ބުނެ ބަޔަކަށް އެހީވުމަށް އޮތް ދޮރުތައް ބަންދު ކުރުމަކީ އިންސާފެއް ނޫން ކަމަށެވެ. އަދި އެގޮތަށް ދެ ޤައުމުގެ ދޮރުތައް ބަންދު ކުރުމަކީ ބައިނަލްއަޤްވާމީ ޤާނޫނާއި ވެސް ޚިލާފު ކަމެއް ކަމުގައި އޭނާ ބުނެފައިވެއެވެ.
މިލިޔުން ކިޔާލުމުން
