ސްކޮލަރސް ސެމިނަރ އޮން އިސްލާމިކް ފައިނޭންސް ޕްރޮގްރާމް ބާއްވަނީ
މޯލްޑިވްސް އިސްލާމިކް ބޭންކުގެ އެހީތެރިކަމާއެކު ދިވެހިރާއްޖޭގެ އިސްލާމީ ޔުނިވަރސިޓީން އިންތިޒާމުކޮށްގެން ބާއްވާ މި ޕްރޮގްރާމު އޮންނާނީ މި އޮކްޓޯބަރ މަހުގެ 8 ވާ ހޮނިހިރު ދުވަހުގެ ހެނދުނު 10:00ން ހަވީރު 17:00އަށެވެ.
ދިވެހިރާއްޖޭގެ ޢިލްމުވެރިންނަށް އަމާޒުކޮށްގެން އިސްލާމީ ޔުނިވަރސިޓީގެ ހޯލުގައި ބާއްވާ މި ޕްރޮގްރާމުގައި ފަސްދޮޅަހަށްވުރެ ގިނަ ޢިލްމުވެރިންނާއި ކަމާއިބެހޭ ފަރާތްތަކުން ބައިވެރިވާނެއެވެ.
އިސްލާމިކް ފައިނޭންސާއި އިސްލާމިކް ބޭންކިންގ އާބެހޭ މަޢުލޫމާތު މި ޕްރޮގްރާމުގައި ފޯރުކޮށްދޭ އިރު، މަޢުލޫމާތު ދެއްވާނީ މޯލްޑިވްސް އިސްލާމިކް ބޭންކުގެ ޝަރީޢާ ބޯޑުގެ ޗެއަރމަން ޝައިޚް ޑރ. އީޖާޒް އަޙްމަދު ސަމަދާނީ އެވެ.
އޭނާއަކީ އިސްލާމިކް ފައިނޭންސާއި ޝަރުޢީ ދާއިރާއިން މަތީ ތަޢުލީމު ޙާޞިލުކޮށް މިދާއިރާގެ ގިނަގުނަ ތަޖުރިބާ ލިބިފައިވާ ބޭފުޅެކެވެ.
މި ޕްރޮގްރާމުގައި ” މުރާބަހާ “ގެ ނަމުގައި ވަރަށް ޚާއްޞަ ފޮތެއް ނެރުމަށްވެސް ވަނީ ހަމަޖެހިފައެވެ. މިފޮތް ނެރެދެއްވާނީ ދިވެހިރާއްޖޭގެ އިސްލާމީ ޔުނިވަރސިޓީގެ ޗާންސެލަރ ޑރ. މުޙައްމަދު ޝަހީމް ޢަލީ ސަޢީދެވެ.