މުޅި ރާއްޖެއަށް އުރީދޫގެ 4G+ ނެޓްވަރކް ފުޅާކޮށް ނިންމާލައިފި..

މުޅި ރާއްޖެއަށް އުރީދޫގެ 4G+ ނެޓްވަރކް ފުޅާކުރުމުގެ މަސައްކަތް ކާމިޔާބު ކަމާއި އެކު ނިމިފައިވާކަމަށް އެކުންފުނިން އިއުލާންކޮށްފިއެވެ.

އުރީދޫގެ ތަސައްވުރެއްކަމުގައިވާ އިޖުތިމާޢީ އަދި އިގްތިޞާދީ ފުރުޞަތުތައް ރާއްޖޭގެ މުޖުތަމަޢަށް ފޯރުކޮށްދިނުމަށް، މި ޚިދުމަތް މެދުވެރިކޮށް ދެވޭ ހައި ސްޕީޑް އިންޓަރނެޓްއިން މަގުފަހިކޮށްދޭނެއެވެ.

އިޝްތިހާރު

ޑިސެމްބަރ 2016ގައި ފެށި އުރީދޫގެ ނެޓްވާރކްގެ ފެންވަރު މަތިކުރުމުގެ މި މުހިއްމު މަސައްކަތް ކުރިޔަށް ގެންގޮސްފައިވަނީ ރާއްޖޭގެ ރައްޔިތުންނާއި ވިޔަފާރިތަކަށް ބޭނުންވާ މުވާސަލާތީ ބޭނުންތަކަށް، އުރީދޫގެ ނޭޝަންވައިޑް ސަބްމެރިން ކޭބަލް އިން ލިބިފައިވާ އިތުރު ކެޕޭސިޓީ މެދުވެރިކޮށް ހައްލެއް ގެނެސްދިނުމަށްޓަކައެވެ.

މިކަމާއިގުޅިގެން އުރީދޫގެ ސީއީއޯ ވިކްރަމަ ސިންގހަ ވިދާޅުވީ އެންމެ ފުރަތަމަ ދުވަހުން ފެށިގެން އުރީދޫއިން މަސައްކަތްކުރަމުންދަނީ ދުނިޔޭގެ އެންމެ ފަހުގެ އުފެއްދުންތަކާއި ޚިދުމަތްތައް މެދުވެރިކޮށް، ރާއްޖޭގެ ރައްޔިތުންގެ ދިރި އުޅުމަށް އިތުރު ފުރިހަމަކަމެއް ގެނެސްދިނުމަށް ކަމަށެވެ.

އަދި ރެކޯޑް މުއްދަތެއްގެ ތެރޭގައި އުރީދޫގެ 4G+ ނެޓްވާރކް މުޅި ރާއްޖެއަށް ފުޅާކުރުމުގެ މަސައްކަތް ނިންމާލެވިގެންދިޔައީ، އެންމެ ފަހުގެ ވަޔަރލެސް ޓެކްނޮލޮޖީ މެދުވެރިކޮށް މުޅި ދިވެހިރާއްޖެ ގުޅުވާލަދިނުމަށްޓަކައި އުރީދޫ ޓީމުން ކުރި މިންނެތް މަސައްކަތުގެ ސަބަބުން ކަމަށެވެ.

”ޑިޖިޓަލް މޯލްޑިވްސްއަށް ސަރުކާރުން ދެއްވާ އަހައްމިޔަތާއި އުރީދޫ ގްރޫޕްގެ އެހީތެރިކަމާއި ޓެކްނޮލޮޖީ މެދުވެރިކޮށް ދިރިއުޅުމަށް އިތުރު ފުރިހަމަކަމެއް ގެނެސްދިނުމަށް އުރީދޫ މޯލްޑިވްސް ޓީމުގެ ހުންނަ ޝައުގުވެރިކަމާއިއެކު ހައި ސްޕީޑް ބްރޯޑްބޭންޑް މުޅި ރާއްޖެއަށް ގެނައުމުގެ މުޅިން އާ މަރުހަލާއަކާއި ކުރިމަތިލުމަށް އަޅުގަނޑުމެން މިދަނީ އުފަލާއި އެކު ތައްޔާރުވަމުން“ އުރީދޫގެ ސީއީއޯ، ވިކްރަމް ސިންހާ ވިދާޅުވިއެވެ.

އުރީދޫގެ ކޮންމެ ކަސްޓަމަރަކަށްވެސް، 4G ސިމްކާޑެއް ލައްވާފައިވާ 4G+ ފޯނެއް މެދުވެރިކޮށް، އިތުރު އަގަކާ ނުލާ، އުރީދޫގެ 4G+ ނެޓްވާރކް ބޭނުންކުރެވޭނެއެވެ. މިހާރު ގެންގުޅުއްވާ ސިމް ކާޑުން 4G+ ކޮމްޕެޓިބަލްތޯ ބެއްލެވުމަށް، “4G“ ޖެއްސެވުމަށް ފަހު، 5353 އަށް އެސްއެމްއެސް ކުރައްވައިގެން ޗެކްކުރެވޭނެއެވެ.

އުރީދޫ އެކްސްޕީރިއަންސް ސެންޓަރ ތަކުންނާއި ބިޒްނަސް ޕާރޓްނަރ ޝޮޕްތަކުން ފަސޭހަކަމާއިއެކު 4G ސިމް ކާޑް ލިބިވަޑައިގަންނަވާނެއެވެ.

މިއަދުގެ ދުނިޔޭގައި، އިޤްތިސާދީ އަދި އިޖްތިމާއީ ތަރައްޤީ ގެނައުމުގައި ދެވަނައެއްނުވާ ރޯލެއް އިންޓަރނެޓް އިން ކުޅެމުންދާއިރު، ދިވެހިރާއްޖޭގެ ހުރިހާ ރައްޔިތުންނަށް ހަލުވި ސްޕީޑްގެ އިންޓަނެޓް ފޯރުކޮށްދިނުމަށްޓަކައި އުރީދޫއިން ވަނީ މުހިއްމު އިންވެސްޓްމެންޓްތަކެއް ކޮށްފައެވެ.

މިގޮތުން އެކުންފުނީގެ މަލްޓިމިލިއަންޑޮލަރުގެ ނޭޝަންވައިޑް ސަބްމެރިން ކޭބަލް މެދުވެރިކޮށް، ނެޓްވަރކް ކެޕޭސިޓީ އިތުރުކޮށް، ރާއްޖޭގެ ރަށްތަކަށް ފޯރުކޮށްދެވޭ ޚިދުމަތުގެ ފެންވަރު ރަގަޅުކޮށްފައިވާ އިރު، މުޅި ރާއްޖެއަށް 4G+ ނެޓްވަރކް ފުޅާކުރުމުގެ މަސައްކަތާއި މިއަހަރު ތެރޭގައި ރާއްޖޭގެ ހުރިހާ ރިސޯޓުތަކާއި ރަށްތަކަށް، ބްރޯޑްބޭންޑްގެ ޚިދުމަތް ފޯރުކޮށްދިނުމުގެ މަސައްކަތް އެކުންފުނިން ވަނީ ފަށާފައެވެ.

އުރީދޫގެ ނޭޝަންވައިޑް 4G+ ނެޓްވަރކް އަދި އަލަށް ތައާރަފްކުރުމަށް ތައްޔާރުވަމުންދާ ބްރޯޑްބޭންޑް ޚިދުމަތްތަކުގެ ސަބަބުން، ދިވެހިރާއްޖޭގެ އެކި ސަރަހައްދުތަކަށް ފެތުރިފައިވާ ވިޔަފާރިތަކަށް ވެސް ގިނަގުނަ ފައިދާ ލިބުން އެކަށީގެންވެއެވެ. ހަމައެއާއިއެކު، އުރީދޫގެ ބައިނަލްއަޤްވާމީ ވިޔަފާރީގެ ޚިދުމަތްތަކާއި، ރިސޯޓްތަކަށް ބޭނުންވާ ހުރިހާ މުވާސަލާތީ ޚިދުމަތް އެއްތަނަކުން ފޯރުކޮށްދޭ ހާއްސަ ރިސޯޓް ސޮލިއުޝަންތަކުގެ ބޭނުން ހިފޭނެއެވެ.