ރޮބަޓް ލެވެންޑޯސްކީ ބަޔާންގެ ކޮންޓްރެކްޓް އާކޮށްފި
ޖަރުމަނުގެ ބަޔާން މިއުނިކަށް ކުޅެމުންއަންނަ ޕޯލަންޑްގެ އިތުބާރު ފޯވާޑް، ރޮބަޓް ލެވެންޑޯސްކީ އެޓީމުގެ ކޮންޓްރެކްޓް އާކޮށްފިއެވެ.
ލެވެންޑޯސްކީ ބަޔާންގެ ކޮންޓްރެކްޓް އާކުރުމާއި އެކީ އޭނާ އެކުލަބުގައި 2021 ވަނަ އަހަރާއި ހަމައަށް ހުންނާނެއެވެ.
އޭނާ ބަޔާން އާއެކު ހަތަރު އަހަރުގެ މި ކޮންޓްރެކްޓް އާކުރިއިރު މީގެ ކުރިން އޭނާ އެކުލަބާއެކު ހަދާފައިވާ ކޮންޓްރެކްޓް ހަމަވާނީ 2019 ވަނަ އަހަރުގެ ނިޔަލަށެވެ.
ކޮންޓްރެކްޓް އާކުރުމަށްފަހު ލެވެންޑޯސްކީ ވަނީ ބަޔާންގައި އިތުރު އަހަރުތަކަކަށް ހުރެވޭތީ އެކަމާ އުފާކުރާކަމަށް ބުނެފައެވެ.
ލެވެންޑޯސްކީ ބުނީ އޭނާގެ ހުވަފެންތަށް ހަގީގަތަކަށް ހެދުމަށް ބަޔާންއިން ވަރަށް ބޮޑު އެހީތެރިކަމެއް ދެމުންދާ ކަމަށެވެ. އަދި ކުރިއަށް އޮތްތާނގައިވެސް މި އެހީތެރިކަން ލިބޭނެކަމަށް އުންމީދުކުރާ ކަމަށްވެސް އޭނާ ބުންޏެވެ.
ލެވެންޑޯސްކީ ބުނީ ކުރިޔަށް ހުރީ މުޅިން އާ ޗެލެންޖްތަކެއްކަކަމަށާއި އެ ކަމަށް ވަރަށް ފުރިހަމައަށް ތައްޔަރުވާނެކަމަށެވެ.
2014 ވަނަ އަހަރު ބަޔާންއާ ގުޅުނު ލެވެންޑޯސްކީ އަކީ އެޓީމުގެ ފޯވާޑް ލައިންގައި ހަރަކާތްތެރިވާ އެންމެ މުހިއްމު އެއް ކުޅުންތެރިއާއެވެ. އެގޮތުން އޭނާ ވަނީ އެޓީމަށް މިހާތަނަށް ކުޅެދިން 122 މެޗުގައި 86 ގޯލު ބަޔާންއަށް ކާމިޔާބުކޮށްދީފައެވެ.
މިހާރު އުމުރުން 28 އަހަރުގެ ލެވެންޑޯސްކީ ވަނީ ބަޔާންއާއެކީ ޖަރުމަނު ލީގު ދެ ފަހަރު އަދި ޖަރުމަނު ކަޕް އެއްފަހަރު ހޯދާފައެވެ.