އިސްރާއީލުން ފަލަސްޠީނުގެ ނޫސްވެރިޔަކު ޝަހީދުކޮށްލައިފި

ޣައްޒާގެ ސަރުކާރުގެ މީޑިއާ އޮފީހުން ހާމަކޮށްފައިވާ ގޮތުގައި އިސްރާއީލުން ދިން ހަމަލާއެއްގައި ފަލަސްޠީނުގެ ނޫސްވެރިޔަކު ޝަހީދުކޮށްލައިފި އެވެ.

ޝަހީދުވި މުޙައްމަދު ޢަބްދުލްޢަޒީޒުއް ނައްޖާރަކީ ޣައްޒާގެ މިނިސްޓްރީ އޮފް އެންޑޯމަންޓްސް އެންޑް ރިލިޖަސް އެފެއާޒްގެ ދަށުން ހިންގާ ޤުރްއާން ރޭޑިއޯގައި ނޫސްވެރިއެއްގެ ގޮތުންނާއި ބްރޯޑްކާސްޓަރެއްގެ ގޮތުގައި މަސައްކަތްކުރި ފަރާތެކެވެ.

އިޝްތިހާރު

މީޑިއާ އޮފީހުން ބުނި ގޮތުގައި އޭނާ ޝަހީދުވީ ޣައްޒާގެ ދެކުނުން ޚާން ޔޫނިސް ސަރަހައްދަށް އިސްރާއީލުން ދިން ހަމަލާއެއްގަ އެވެ.

މި މަރާއެކު، 2023 އޮކްޓޯބަރު މަހު ހަނގުރާމަ ފެށުނު ފަހުން ޝަހީދުވި ފަލަސްޠީނުގެ ނޫސްވެރިންގެ އަދަދު 263 އަށް އަރާފައިވާ ކަމަށް އެ އޮފީހުން ބުނެ އެވެ.

ސަރުކާރުގެ މީޑިއާ އޮފީހުން ވަނީ ނޫސްވެރިންނަށް އަމާޒުކޮށް ދޭ ހަމަލާތައް ހަރުކަށި އިބާރާތުން ކުށްވެރިކޮށް، ބައިނަލްއަޤްވާމީ ނޫސްވެރިކަމުގެ ޖަމޢިއްޔާތަކުން މިކަން ކުށްވެރިކުރުމަށް ގޮވާލާފަ އެވެ.

މީގެ އިތުރުން، ފަލަސްޠީން އޮންލައިންއިން ރިޕޯޓްކޮށްފައިވާ ގޮތުގައި، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އދ. ގެ އާންމު މަޖިލީހުގައި ތަޤްރީރު ކުރައްވަމުން ގެންދެވި ވަގުތު، އިސްރާއީލު ސިފައިން ވަނީ ޣައްޒާގެ އެކި ސަރަހައްދުތަކުން ފަސް މީހަކު ޝަހީދުކޮށް، އެތައް ބަޔަކު ޒަޚަމްކޮށްލާފަވއެވެ.

ޝަހީދުވި މީހުންގެ ތެރޭގައި އަންހެނަކުވެސް ހިމެނެއެވެ. ރަޝީދު މަގުގެ އަލްބައިދަރު ސަރަހައްދުން ދަތުރުކުރި އުޅަނދަކަށް އިސްރާއީލުގެ ޑްރޯންއަކުން ދިން ހަމަލާއެއްގައި އެކަކު ޝަހީދުވެ 16 މީހަކު ޒަޚަމްވިއިރު، ޣައްޒާގެ މެދުތެރޭގެ ދީރުލް ބަލަހްގައި އުޅަނދަކަށް ދިން ހަމަލާއެއްގައި ވެސް އެކަކު ޝަހީދުވެ ނުވަ މީހަކު ޒަޚަމްވި އެވެ.

ޚާން ޔޫނިސްއަށް ދިން ހަމަލާތަކުގައި ލިބުނު ޒަޚަމްތަކަށް ފަރުވާދެމުން ދަނިކޮށް ޙަސަން އަލްބައްޓާ ނަމަކަށް ކިޔާ މީހަކު ވަނީ ޝަހީދުވެފަ އެވެ. އަދި ރަފަހްގެ އަލްމަވާސީ ސަރަހައްދުގައި އަންހެނަކު ގަޔަށް ބަޑިޖަހައި މަރާލާފައިވާއިރު، އަލްޒަހްރާ ސިޓީގެ ހުޅަނގުން ބަޑީގެ ހަމަލާއެއްގައި ޒަޚަމްވި އަބޫ މަދީން ނަމަކަށް ކިޔާ މީހަކުވެސް ވަނީ ޝަހީދުވެފަ އެވެ.

ނުސީރާތު ރެފިއުޖީ ކޭމްޕާއި ބުރައިޖް ސަރަހައްދުގައިވެސް އިސްރާއީލުގެ ހަމަލާތަކުގައި ބައެއް މީހުން ޒަޚަމްވެފައިވާ ކަމަށް ރިޕޯޓްތައް ބުނެ އެވެ.

މީގެ އިތުރުން، ބުރާސްފަތި ދުވަހުގެ ރޭގަނޑުގެ ވަގުތެއްގައި އިސްރާއީލުގެ ޑްރޯންތަކުން ޣައްޒާ ސިޓީގެ މައްޗަށް، ނުބައި ވަސް ދުވާ މާއްދާއެއް ހުރި ކޮތަޅުތަކެއް އުކާފައިވާ ކަމަށް އެ ސަރަހައްދުގެ ރަށު މީހުން ބުނެ އެވެ.

މި މާއްދާގެ ބޭނުމާއި އޭގައި ހިމެނެނީ ކޮން އެއްޗެއްކަން އަދި ސާފެއް ނުވެއެވެ.

ހަމައެއާއެކު، އިސްރާއީލު ސިފައިން ވަނީ ޣައްޒާ ސިޓީގެ އިރުމަތީގައި ހުރި އިމާރާތްތަކެއް ތަޅާލައި، ޖަބަލިއާ އަދި ބައިތު ލާހިޔާ ސަރަހައްދަށް ބޮޑުބަޑީގެ ހަމަލާތަކެއް ދީފަ އެވެ. އަދި އިސްރާއީލުގެ ޖާސޫސީ ބޯޓުތައް ޣައްޒާގެ މަތިން ދަނީ ވަރަށް ތިރިން އުދުހެމުންނެވެ.