އިރާޤުން އެމެރިކާ ސިފައިން ފޭބުމާ ގުޅިގެން އެ ޤައުމުން އުފާފާޅުކުރަން ފަށައިފި

އެމެރިކާގެ އެންމެ ފަހު ސިފައިން އިރާގުން ފޭބުމާ ގުޅިގެން އެ ޤައުމުން އެކަން ފާހަގަކުރަން ފަށައިފި އެވެ.

ކުރުދިސްތާން ސަރަހައްދުގައި ތިބި އެމެރިކާ ސިފައިން ފޭބުމާ ގުޅިގެން އިރާޤުގެ ބޮޑުވަޒީރު އަލީ އަލް-ޒައިދީ އެއީ ލިބުނު ބޮޑު ކާމިޔާބީއެއްގެ ގޮތުގައި ފާހަގަކުރެއްވި ނަމަވެސް، ހަތިޔާރު އެޅި ޖަމާޢަތްތައް ކޮންޓްރޯލް ކުރުމުގައި އަދިވެސް ވަނީ ގޮންޖެހުންތަކާ ކުރިމަތިވެފަ އެވެ.

އިޝްތިހާރު

ކުރީގެ ރައީސް ސައްދާމް ހުސައިންގެ ވެރިކަން ވައްޓާލުމަށް އެމެރިކާއިން އިރާޤަށް އެރިތާ 23 އަހަރު ފަހުން، މިދިޔަ ބުދަ ދުވަހު އެމެރިކާގެ އެންމެ ފަހު ސިފައިން ވަނީ އެ ޤައުމުން ފައިބާފަ އެވެ. މި ހަނގުރާމައަށް އެއް ޓްރިލިއަން ޑޮލަރަށްވުރެ ގިނަ ފައިސާ ހޭދަވެފައިވާއިރު، ފާއިތުވި ވިހި އަހަރުގެ ތެރޭގައި އެތައް ހާސް ބަޔަކު ވަނީ މަރުވެފަ އެވެ.

ޕެންޓަގަނުން ނެރުނު ބަޔާނެއްގައި ބުނެފައިވަނީ، 2024 ވަނަ އަހަރުގެ ސެޕްޓެމްބަރު މަހު އެމެރިކާއާއި އިރާޤާ ދެމެދު ވެވުނު އެއްބަސްވުމާ އެއްގޮތަށް، ”އޮޕަރޭޝަން އިންހެރެންޓް ރިޒޯލްވް“ ރަސްމީކޮށް ނިންމާލާފައިވާ ކަމަށެވެ.

ސައްދާމް ހުސައިންގެ ވެރިކަން ވައްޓާލުމަށްފަހު 2003 ވަނަ އަހަރު އެމެރިކާއިން ފުރަތަމަ އިރާޤަށް އެރުމަށްފަހު، 2011 ވަނަ އަހަރު ސިފައިން ބާލާފައިވެ އެވެ.

ނަމަވެސް، އިރާޤުގެ ތިންބައިކުޅަ އެއްބައި ސަރަހައްދު ހިފި އިސްލާމިކް ސްޓޭޓް (އައި.އެސް) އާ ދެކޮޅަށް ހަނގުރާމަކުރުމަށް، އިރާޤު ސަރުކާރުގެ އެދުމުގެ މަތިން 2014 ވަނަ އަހަރު އެމެރިކާ ސިފައިން އަލުން އެ ޤައުމަށް ދިޔަ އެވެ.

އެމެރިކާ ސިފައިން ބޭޭލުމުގެ މަސައްކަތް 2025 ވަނަ އަހަރު ފަށާފައިވާއިރު، އަންބާރު ޕްރޮވިންސްގެ އައިން އަލް-އަސަދު ބޭސްއާއި ބަޏްދާދު އިންޓަނޭޝަނަލް އެއާޕޯޓުގައި ހުންނަ ވިކްޓްރީ ބޭސް ކޮމްޕްލެކްސްގައި ތިބި ސިފައިން ވަނީ އިރާޤުގެ ކުރުދީ ސަރަހައްދަށް ބަދަލުކޮށްފަ އެވެ.

އިރާޤުގެ ކުރުދިސްތާނަކީ 2005 ވަނަ އަހަރުން ފެށިގެން އަމިއްލަ އިދާރީ ބާރުތަކެއް ލިބިފައިވާ ސަރަހައްދެކެވެ.

އެގޮތުން އެ ސަރަހައްދުގެ އަމިއްލަ ބޮޑުވަޒީރަކާއި، ރައީސަކާއި، ”ޕެޝްމާގާ“ ގެ ނަމުން ނަންދެވިފައިވާ ވަކި ސަލާމަތީ ބާރެއްއޮވެ އެވެ.

ޕެންޓަގަންގެ ތަރުޖަމާނު ޝޯން ޕާނެލް ވިދާޅުވި ގޮތުގައި، ކުރުދިސްތާނުން ސިފައިން ފޭބުމަކީ ހަނގުރާމައިގެ ހާލަތުން ބަދަލުވެ، އިރާޤުގެ އިސްނެގުމާއެކު ކުރިއަށްދާ ސަލާމަތީ މަސައްކަތްތަކަކަށް ފެށުނު އާ ބާބެކެވެ.