ޕައިލެޓުންގެ މެދުގައި ހިނގި ހަމަނުޖެހުމަކާ ގުޅިގެން، އިޒްރޭލަށްދިޔަ ފްލައިޓެއް ސަޢޫދީއަށް ކުއްލި ހާލަތުގައި ޖައްސައިފި

ޕައިލެޓުންގެ މެދުގައި ހިނގި ހަމަނުޖެހުމަކާ ގުޅިގެން، އިޒްރޭލަށް ދަތުރުކުރި ފްލައިޓެއް ސަޢޫދީ ޢަރަބިއްޔާއަށް ކުއްލި ހާލަތުގައި ޖައްސައިފި އެވެ.

މި ހާދިސާއާ ގުޅިގެން ފްލައިޓުން ހައިޖެކް އެލާޓެއް ފޮނުވުމުން، އިޒްރޭލުގެ ސަލާމަތީ ބާރުތަކުން އެންމެ ފުރަތަމަ ތައްޔާރީ ހާލަތަށް އައި ނަމަވެސް، ފަހުން އޮފިޝަލުން ވަނީ އެއީ ހައިޖެކް ކުރުމުގެ އަމަލެއް ނޫންކަން ކަށަވަރުކޮށްދީފަ އެވެ.

އިޝްތިހާރު

އިޒްރޭލަށް ދަތުރުކުރި މި ފްލައިޓް ސަޢޫދީ ޢަރަބިއްޔާއަށް ކުއްލި ހާލަތުގައި ޖެއްސީ ހައިޖެކް އެލާޓެއް ފޮނުވުމާ ގުޅިގެންނެވެ.

ނަމަވެސް އިޒްރޭލުގެ އޮފިޝަލުން ފަހުން ބުނީ އެ އެލާޓް ސިގްނަލް ދެވުނީ ދެ ޕައިލެޓުންގެ މެދުގައި ހިނގި ދެބަސްވުމަކާއި ހަމަނުޖެހުމެއްގެ ތެރެއިން ކަމަށެވެ.

އިޒްރޭލުގެ މީޑިއާތަކުން ރިޕޯޓްކޮށްފައިވާ ގޮތުގައި، އެތަނުން އެއް ޕައިލެޓަކު ބޯޓު ވައްޓާލަން މަސައްކަތް ކުރި ކަމަށް ބެލެވޭ ހެކިތަކެއް ފެނިފައިވެ އެވެ.

އިޒްރޭލުގެ އިސް އޮފިޝަލަކު މައުލޫމާތު ދިނ ގޮތުގައި، މި ހާދިސާގައި ވަރަށް ނުރައްކާތެރި ކާރިސާއަކުން ސަލާމަތްވެފައިވާ ކަމަށެވެ.

ދޫބާއީން ފުރައިގެން ބެން ގޫރިއަން އެއާޕޯޓަށް ދަތުރުކުރި ފްލައިދޫބާއީގެ މި ފްލައިޓުގައި އިޒްރޭލުގެ 180 ފަސިންޖަރުން ތިއްބެވެ.

ބޯޓު ޖައްސަން ތާވަލުކުރެވިފައި އޮތް ގަޑީގެ ގަޑިއެއްހާއިރު ކުރިން، ދެ މިނެޓަށްވުރެ ކުރު ވަގުތުކޮޅެއްގެ ތެރޭގައި ބޯޓު ވަނީ 34،000 ފޫޓުން 16,000 ފޫޓަށް ތިރިވެފަ އެވެ.

އެންމެ ފަހުން ބޯޓު ރައްކާތެރިކަމާއެކު ޖައްސާފައިވަނީ ސަޢޫދީ ޢަރަބިއްޔާގެ ހުޅަނގު އުތުރުގައި އޮންނަ ތަބޫކް ސިޓީއަށެވެ.

ބޯޓު ކުއްލިއަކަށް ތިރިވާން ފެށުމުން ބޯޓުގެ ތެރޭގައި ބޮޑު ބިރުވެރިކަމަކާއި ހާސްކަމެއް އުފެދުނު ކަމަށް ފަސިންޖަރުން ބުންޏެވެ.

ބައެއް ފަސިންޖަރުން އިޒްރޭލުގެ މީޑިއާތަކަށް މައުލޫމާތު ދެމުން ބުނެފައިވަނީ، ބޯޓު ތިރިވުން ހުއްޓުވުމަށްޓަކައި ފަސިންޖަރުން ކޮކޮޕިޓަށް ވަދެ ހުރަސްއެޅި ކަމަށެވެ. އަދި އެހެން ރިޕޯޓުތައް ބުނާގޮތުން އެއް ޕައިލެޓަކު ގަސްދުގައި ބޯޓު ވައްޓާލަން އުޅުނު ކަމަށް ބެލެވެ އެވެ.

އިޒްރޭލުގެ އޮފިޝަލް އިތުރަށް ބުނީ، މިކަމަށް ހުރަސް ނޭޅުނު ނަމަ، މިއީ 2001 ވަނަ އަހަރުގެ ސެޕްޓެމްބަރު 11 ގައި ހިނގި ފަދަ ނުރައްކާތެރި ހާދިސާއަކަށް ވުމުގެ ފުރުސަތު އޮތް ކަމަށެވެ.

މި ހާދިސާއާ ގުޅިގެން ފުރަތަމަ ލިބުނު މައުލޫމާތުތަކާއެކު އިޒްރޭލުގެ ވެރިން ވަނީ ކުއްލި ސަލާމަތީ ބައްދަލުވުންތަކެއް ބާއްވައި، ހައިޖެކް ކޮށްފާނެ ކަމަށް ބަލައި ފައިޓާ ޖެޓްތައް ވެސް ތައްޔާރީ ހާލަތަށް ގެނެސްފަ އެވެ.