ކެލިފޯނިއާގައި އީދު ބަންދު ރަސްމީކޮށް ބަލައިގަތުމަށް ނިންމައިފި

ކެލިފޯނިއާގައި ދިރިއުޅޭ މުސްލިމުންނަށް އެމީހުންގެ ދީނީ ދެ ޢީދު، ދައުލަތުން ޤަބޫލުކުރާ ރަސްމީ ބަންދު ދުވަސްތަކެއްގެ ގޮތުގައި މިހާރު ވަނީ ކަނޑައަޅާފަ އެވެ.

މީގެ ސަބަބުން މުސްލިމް އާއިލާތަކަށް ދަތިކަމެއް ނެތި ދީނީ އަޅުކަންތައް އަދާކުރުމާއި ޢީދު ފާހަގަކުރުމުގެ ފުރުޞަޠުފަހިވެގެންދާނެ އެވެ.

އިޝްތިހާރު

ގަވަރުނަރު ގޭވިން ނިއުސަމް ވަނީ އެސެމްބްލީ ބިލް (AB) 2017 ތަސްދީގުކުރައްވާފަ އެވެ.

މިއާއެކު، ކެލިފޯނިއާ ވެފައިވަނީ ފިޠުރު ޢީދާއި އަޟްޙާ ޢީދު ދައުލަތުގެ ރަސްމީ ބަންދު ދުވަސްތަކެއްގެ ގޮތުގައި ކަނޑައެޅި އެމެރިކާގެ ދެވަނަ ސްޓޭޓަށެވެ.

ކައުންސިލް އޮން އެމެރިކަން-އިސްލާމިކް ރިލޭޝަންސް (ކެއާ) އިން ފާހަގަކުރާ ގޮތުގައި، މި ޤާނޫނުގެ ސަބަބުން، ޢާއިލާއާއެކު ޢީދު ފާހަގަކުރުމަށްޓަކައި ވަޒީފާއިން ހުއްދަ ހޯދުމުގައި މުސްލިމުންނަށް ކުރިމަތިވަމުންދިޔަ ދަތިތަކަށް ހައްލެއް ލިބިގެންދާނެ އެވެ.

ސެން ފްރެންސިސްކޯގެ އެސެމްބްލީ މެންބަރު މެޓް ހޭނީ ހުށަހެޅުއްވި މި ބިލުގެ ދަށުން، މުވައްޒަފުންނަށް ލިބިދޭ އަމިއްލަ ޗުއްޓީ ނުވަތަ ލީވް ބޭނުންކޮށްގެން ޢީދު ދުވަހު ނުކުމެ އުޅުމުގެ މަގު ފަސޭހަވެގެންދާނެ އެވެ.

އަދި މި ބިލުގެ ސަބަބުން، ލޯކަލް އެއްބަސްވުންތަކުގެ ދަށުން ސަރުކާރުގެ މަދަރުސާތަކާއި ކޮމިއުނިޓީ ކޮލެޖުތައް ޢީދު ދުވަސްވަރު ބަންދުކުރުމުގެ ފުރުސަތު ލިބިގެންދެ އެވެ.

ނަމަވެސް، އަމިއްލަ ކުންފުނިތަކުން މުވައްޒަފުންނަށް ޢީދު ބަންދު ދިނުން މި ޤާނޫނުން ލާޒިމެއް ނުކުރެ އެވެ.

ކެއާގެ ތަފާސްހިސާބުތަކުން ދައްކާގޮތުގައި ކެލިފޯނިއާއަކީ އެމެރިކާގެ ސްޓޭޓްތަކުގެ ތެރެއިން އެންމެ ގިނަ އަދަދަކަށް މުސްލިމުން ދިރިއުޅޭ އެއް ސްޓޭޓެވެ. އެގޮތުން އެއް މިލިއަނަށްވުރެ ގިނަ މުސްލިމުން އެ ސްޓޭޓްގައި ދިރިއުޅެއެވެ.

”ކެލިފޯނިއާއަކީ އެމެރިކާގައި އެންމެ ފުޅާ އަދި އެންމެ ހަރަކާތްތެރި މުސްލިމް މުޖުތަމައުއެއް އޮތް އެއް ސްޓޭޓް. އެމީހުންގެ އާދަކާދަތަކަށް އިހުތިރާމްކޮށް، އެއީ ރަސްމީކޮށް ބަލައިގަންނަންޖެހޭ ކަންކަން،“ މެޓް ހޭނީ ވިދާޅުވި އެވެ.

އޭނާ އިތުރަށް ވިދާޅުވީ، އެއްވެސް ދަރިވަރަކަށް އެކުއްޖެއްގެ ދީނީ މުގައްދަސް ދުވަހެއް ފާހަގަކުރުމާއި ސްކޫލަށް ދިއުމާ ދެމެދު ގޮތެއް ނިންމަން މަޖުބޫރުވެގެން ނުވާނެ ކަމަށާއި، އަދި އެއްވެސް މުވައްޒަފަކަށް އޭނާގެ ދީނީ އަޅުކަން އަދާކުރުމަށްޓަކައި ވަޒީފާ ގުރުބާންކުރަން ޖެހިގެން ނުވާނެ ކަމަށެވެ.

ކެއާގެ ކެލިފޯނިއާ ގޮފީގެ ސީއީއޯ ހުސާމް އައިލޫޝް، ގަވަރުނަރުގެ މި ނިންމެވުމަށް ތައުރީފު ކުރައްވަމުން ވިދާޅުވީ، މިއީ މުސްލިމުންނާ ދެކޮޅަށް ހިންގާ އަމަލުތައް އިތުރުވަމުންދާ ދަނޑިވަޅެއްގައި، ކެލިފޯނިއާ އޮތީ މުސްލިމް މުޖުތަމައުއާއެކުކަން އަންގައިދޭ ވަރުގަދަ މެސެޖެއް ކަމަށެވެ.

ކެއާގެ ރިޕޯޓުތަކުން ދައްކާގޮތުގައި، މިދިޔަ މެއި، ޖޫން އަދި ޖުލައި މަހު އެމެރިކާގެ އެކި ސަރަހައްދުތަކުގައި އިސްލާމީ މަރުކަޒުތަކަށް އަމާޒުކޮށް 17 ހާދިސާއެއް ހިނގާފައިވެ އެވެ.

މިއީ އޭގެ ކުރީ އަހަރުގެ އެ މުއްދަތާ އަޅާބަލާއިރު 183 އިންސައްތައިގެ އިތުރުވުމެކެވެ. މީގެ ތެރޭގައި މަރުގެ އިންޒާރު ދިނުމާއި، މިސްކިތްތަކުގައި ހުޅުޖެހުމާއި، ބިރުދެއްކުމުގެ އިތުރުން ދީނީ ނަފުރަތުގެ ސަބަބުން އިސްލާމީ މަރުކަޒުތަކާ ދެކޮޅަށް ހިންގާފައިވާ އެކި އަމަލުތައް ހިމެނެ އެވެ.

މިފަދަ ހާދިސާތަކުގެ ތެރޭގައި، މެއި 18 ވަނަ ދުވަހު ސެން ޑިއޭގޯގެ އިސްލާމީ މަރުކަޒަށް ދިން ހަމަލާ ހިމެނެ އެވެ. އެ ހަމަލާގައި ނަމާދުކުރަން ތިބި މީހުންނާއި ކުޑަކުދިން ހިމާޔަތްކުރަން އުޅުނު ތިން މީހަކު ވަނީ މަރުވެފަ އެވެ.

ކެލިފޯނިއާ މިހާރު މިވަނީ ވޮޝިންގްޓަން ސްޓޭޓާ ގުޅިފަ އެވެ. ވޮޝިންގްޓަން އަކީ 2025 ވަނަ އަހަރުން ފެށިގެން ފިތުރު ޢީދާއި އަޟްހާ ޢީދު ދައުލަތުގެ ރަސްމީ ބަންދު ދުވަސްތަކެއްގެ ގޮތުގައި ހަމަޖެއްސި އެމެރިކާގެ ފުރަތަމަ ސްޓޭޓެވެ.

”މި ޤާނޫނަކީ ހަމައެކަނި ބަންދު ދުވަސްތަކުގެ ލިސްޓަށް އިތުރުކުރެވުނު ދުވަސްތަކެއް ނޫން،“ މިދިޔަ އަހަރު މި ބިލް ތަސްދީޤުކުރައްވަމުން ފާގަސަން ވިދާޅުވި އެވެ. ”އީދު ބަންދު ރަސްމީކޮށް ބަލައިގަތުމުން އެނގިގެންދަނީ، އަޅުގަނޑުމެންގެ މުސްލިމް ރަހުމަތްތެރިންނާއި، އާއިލާތަކާއި، އަވަށްޓެރިންގެ ސަގާފަތާއި ދީނީ އަޅުކަންތަކަށް އަޅުގަނޑުމެން އިހުތިރާމްކުރާ މިންވަރު.“ -ފާގަސަން-