ނުކުޅެދުންތެރިކަން ހުންނަ ފަރާތްތަކުގެ އުޅަނދުތަކަށް ދޫކުރާ ”ފާސްޓެގް“ ގެ މުއްދަތު އިތުރުކޮށްފި

ނިއު ދިއްލީގައި އަމިއްލަ އުޅަނދު ގެންގުޅޭ ނުކުޅެދުންތެރިކަން ހުންނަ ފަރާތްތަކަށް ލުޔެއް ދިނުމުގެ ގޮތުން، ހައިވޭތަކުން ދަތުރުކުރާއިރު ޓޯލް ފީ ދެއްކުމުން އިސްތިސްނާކޮށް ދޫކުރާ ފާސްޓެގްގެ މުއްދަތު، ނުކުޅެދުންތެރިކަން ހުންނަ މިންވަރަށް ބަލައި ފަސް އަހަރާ ހަމައަށް ސަރުކާރުން އިތުރުކޮށްފި އެވެ.

މީގެ ކުރިން މިފަދަ ޓެގްތަކުގެ މުއްދަތަކީ އެއް އަހަރެވެ. މި ބަދަލަށް އަމަލުކުރަން ފަށާނީ ގާންދީ ޖަޔަންތީއާ ގުޅުވައިގެން، އޮކްޓޯބަރު މަހުގެ 2 ވަނަ ދުވަހުން ފެށިގެންނެވެ.

އިޝްތިހާރު

އިންޑިއާގެ މޮޓޯ ވެހިކަލް ޤާނޫނާއި ޤަވާޢިދުތަކުގެ ދަށުން ނުކުޅެދުންތެރިކަން ހުންނަ ފަރާތްތަކުގެ ކެޓެގަރީގައި ރަޖިސްޓްރީކޮށްފައިވާ އުޅަނދުތަކާއި، އެފަދަ ފަރާތްތަކަށް ޚާއްޞަކޮށް ފަރުމާކޮށްފައިވާ އުޅަނދުތަކުން ޤައުމީ ހައިވޭތަކުގައި ފީ ދައްކާކަށް ނުޖެހޭނެ އެވެ.

އިންޑިއާގެ ރޯޑް ޓްރާންސްޕޯޓް މިނިސްޓްރީން ނޭޝަނަލް ހައިވޭސް އޮތޯރިޓީ އޮފް އިންޑިއާ އަށް ފޮނުވި އެންގުމެއްގައިވާ ގޮތުން، 70 އިންސައްތައާއި 100 އިންސައްތައާ ދެމެދުގެ ނުކުޅެދުންތެރިކަން ހުންނަ ފަރާތްތަކަށް ދޫކުރާ ފާސްޓެގްގެ މުއްދަތަކީ ފަސް އަހަރެވެ. އަދި 40 އިންސައްތައާއި 70 އިންސައްތައާ ދެމެދުގެ ނުކުޅެދުންތެރިކަން ހުންނަ ފަރާތްތަކަށް މި މުއްދަތު ތިން އަހަރަށް ވަނީ ކަނޑައަޅާފަ އެވެ.

މި ޓެގްތަކުގެ މުއްދަތު ކަނޑައެޅުމުގައި ބަލާނީ ނުކުޅެދުންތެރިކަން ހުރިކަން ސާބިތުކޮށްދޭ ރަސްމީ ސެޓްފިކެޓް ނުވަތަ ”ޔުނީކް ޑިސެބިލިޓީ އައިޑެންޓިޓީ“ ކާޑުގައިވާ މަޢުލޫމާތަށެވެ. އަދި ކަނޑައެޅިފައިވާ އުސޫލުތަކާ އެއްގޮތްވާ ނަމަ، މުއްދަތު ހަމަވުމުން ޓެގް އާކުރެވޭނެ އެވެ.

މިނިސްޓްރީން ހާމަކުރި ގޮތުގައި، މި ބަދަލު ގެނައުމުގެ މައިގަނޑު މަޤްޞަދަކީ ކޮންމެ އަހަރަކު ޓެގް އާކުރުމަށްޓަކައި ކުރަންޖެހޭ އިދާރީ މަސައްކަތްތައް މަދުކޮށް، ޝަރުތު ހަމަވާ ނުކުޅެދުންތެރިކަން ހުންނަ ފަރާތްތަކަށް ލުއިފަސޭހަ ނިޒާމެއް ގާއިމުކޮށްދިނުމެވެ.