ޢިލްމީ ތެދުވެރިކަމާއި ނަފްސުގެ އަޚްލާޤު އިސްކުރާ ނަމޫނާބަޔަކަށްވުމަށް ވަޒީރު ހީނާ ގޮވައިލައްވައިފި.

ވިލާ ކޮލެޖުން މިއަހަރު ދަސްވެނިވި ދަރިވަރުންނަކީ ހަމައެކަނި މަޢުލޫމާތުން މުއްސަނދި ބަޔަކަށް ވުމުގެ ބަދަލުގައި، ޢިލްމީ ތެދުވެރިކަމާއި ނަފުސުގެ އަޚްލާޤު އިސްކުރާ ނަމޫނާ ބަޔަކަށް ވުމަށް ފަންނާއި ސަޤާފަތާއި ތަރިކައާ ބެހޭ ވަޒީރު ހީނާ ވަލީދު ގޮވައިލައްވައިފިއެވެ.

ވަޒީރު މިކަމަށް ގޮވާލެއްވީ މިއަދު ވިލާ ކޮލެޖްގެ މިއަހަރުގެ ދަސްވެނިވުމުގެ ފުރަތަމަ ދަންފަޅީގައި ހިންގުމުގެ ދާއިރާ، އުނގަންނައިދިނުމާއި ކިޔަވައިދިނުމުގެ ދާއިރާއިން ސަނަދު ޙާޞިލްކުރި ދަރިވަރުންގެ ދަސްވެނިވުން ޝަރަފުވެރިކޮށްދެއްވައި ވާހަކަފުޅުދައްކަވަމުންނެވެ.

އިޝްތިހާރު

ވަޒީރުގެ ވާހަކަފުޅުގައި ފިކުރީ ވިސްނުންތަކާ ޢިލްމީ ސިކުނޑިތަކެއް އުފަންކޮށްގެން ހަމައެކަނި ފުދެން ނެތްކަން ފާހަގަކުރައްވާ، ޤައުމަކަށް ބޭނުންވަނީ ހަރުދަނާ އަޚްލާޤީ ޤިޔަމްތަކެއްގެ މަތީގައި ތިބޭ ބަޔެއްކަމަށް ވިދާޅުވިއެވެ. މިގޮތުން ބޭނުންވަނީ އިންސާނީ ކަރާމާތަށް ޙުރުމަތްތެރިކޮށް ހިތާ، އެކަކު އަނެކަކުގެ ޚިޔާލަށް އިޙްތިރާމްކުރުމާއި، ކޮންމެ ކަމެއްގެވެސް ޙަޤީޤަތް ބެލުމާ، ތިމާފަދަ އަނެކުންނަށްވެސް އިޙްތިރާމް ކުރުމުގެ ތަހުޛީބީ ސިފަތައް އަށަގަނެފައިވާ ބައެއްކަމަށެވެ. އަދި ޢިލްމު ޙާޞިލްކުރާ ފަރާތްތައް މިފަދަ ސިފަތަކުގެ ނަމޫނާއަށް ވާންޖެހޭކަމަށް ވަޒީރު ހީނާ ވިދާޅުވިއެވެ.

މިގޮތުން ޤައުމެއްގައި ޢިލްމީ ރޫޙެއް ބިނާކޮށް ފިކުރީ ވިސްނުންތަކެއް އާލާކުރެވެނީ އެ ޤައުމެއްގެ ތަރުބަވީ ނިޒާމާ ތަޢުލީމީ ނިޒާމުގެ ތެރެއިންކަމުގައިވާއިރު، ޢިލްމީ ރޫޙެއް އުފައްދާ އީޖާދީ އަދި ފިކުރީ ވިސްނުންތަކެއްގެ މަތީގައި ޤައުމެއް ދެމެހެއްޓުމުގެ އެންމެ ބޮޑު އެއް މަސްއޫލިއްޔަތެއް އެޅިފައި ވަނީ ތަރުބިއްޔަތު ކުރުމާ އުނގަންނައިދިނުމުގެ ދާއިރާގެ ބޭފުޅުންގެ އިސްތަށިފުޅުގައިކަން ފާހަގަކުރެއްވިއެވެ. އެހެންކަމުން ޤައުމު އެއް ޖީލުން އަނެއް ޖީލަށް ނަގަހައްޓައިދޭ އެއް ބަޔަކީ އެ ޤައުމެއްގައި އުނގަންނައިދިނުމުގެ ދާއިރާގެ ބޭފުޅުންކަން ވަޒީރު ފާހަގަކުރެއްވިއެވެ.

މީގެ އިތުރަށް ޢިލްމީ މީހުންގެ ގޮތުގައި މުޖުތަމަޢުގެ ތެރެޔަށް ނުކުންނައިރު، މަޢުލޫމާތުގެ މުއްސަނދިކަމާއި އެއްވަރަށް، ޢިލްމީ ތެދުވެރިކަމާއި ނަފުސުގެ އަޚްލާޤުގެ މުހިއްމުކަން ވަޒީރު ފާހަގަކުރެއްވިއެވެ. އަދި ޙާޞިލުކުރާ ސަނަދަކީ ހަމައެކަނި ލިޔުމެއް ނޫންކަމާއި، އެ މަސްއޫލިއްޔަތު އަދާކުރުމަށް ލިބިފައިވާ ހުނަރުގެ ބޭނުންކޮށް ޤައުމަށް ޚިދުމަތްކުރެއްވުމަށް ވަޒީރު ގޮވާލެއްވިއެވެ.

ވަޒީރުގެ ވާހަކަފުޅުގައި ޤައުމުގެ އިޖްތިމާޢީ ފޭރާމާއި އަޚްލާޤީ މިންގަނޑާމެދު ފުންކޮށް ވިސްނާ ފިކުރުކޮށް، މިކަންކަން ހަމަ މަގަށް އަޅުވާ މި ޙާލަތު ބަދަލު ކުރުމަށް އިސްނަގާ މޭސްތިރިންނަށް ވެވަޑައިގެންނެވުމަށް އިލްތިމާސްކުރެއްވިއެވެ.

ވިލާ ކޮލެޖްގެ މިއަހަރުގެ ދަސްވެނިވުމުގެ ފުރަތަމަ ދަންފަޅީގައި ވިލާކޮލެޖުން ތަޢުލީމު ހާސިލުކުރި 201 ދަރިވަރުން ވަނީ ދަސްވެނިވެފައި.