ދިރާސާތަކުގެ އަލީގައި އަޝްވަގަންދާގެ ޞިއްޙީ ބައެއް ފައިދާ
އަޝްވަގަންދާ ބޭނުންކުރުމުން ކުޅިވަރުގެ ހުނަރު އިތުރުވުމާއި ނިދި ރަނގަޅުވުން ފަދަ ފައިދާތައް ލިބިދާނެ އެވެ.
ބައެއް ދިރާސާތަކުން ދައްކާގޮތުގައި ނުތަނަވަސްކަމާއި އެންޒައިޓީއާއި ދަރިމައިވުމުގެ މައްސަލަތައް ހުންނަ މީހުންނަށް މި ފަތްޕިލާވެލީގެ އެހީތެރިކަން ލިބެ އެވެ.
އަޝްވަގަންދާއަކީ އިންޑިއާގެ ޤަދީމީ ބޭސްވެރިކަމެއް ކަމަށްވާ ”އަޔުރްވޭދާ“ ގައި ބޭނުންކުރާ އެންމެ މުހިންމު އެއް ފަތްޕިލާވެއްޔެވެ.
އެތައް ހާސް އަހަރެއްގެ ކުރިން ފެށިގެން މީހުން އަޝްވަގަންދާ ބޭނުންކުރަނީ ހާސްކަން ކުޑަކުރުމަށާއި، ހަކަތަ އިތުރުކުރުމަށާއި، ސަމާލުކަން ދިނުމުގެ ގާބިލުކަން އިތުރުކުރުމަށެވެ.
ސަންސްކްރިތް ބަހުން ”އަޝްވަގަންދާ“ ގެ މާނައަކީ ”އަހެއްގެ ވަސް“ އެވެ. މިއީ މި ފަތްޕިލާވެލީގެ ވަހަށް ނިސްބަތްކޮށް ކިޔާ ނަމެކެވެ. އަދި މިއީ ވަރުގަދަކަން އިތުރުކޮށްދޭ އެއްޗެއްކަމަށް ވެސް ބެލެވެ އެވެ.
ދިރާސާތަކުން ދައްކާގޮތުގައި އަޝްވަގަންދާގެ 8 ފައިދާ.
1- ހާސްކަމާއި ނުތަނަވަސްކަން ކުޑަކޮށްދިނުން
އަޝްވަގަންދާއަކީ ހާސްކަން ކުޑަކޮށްދިނުމަށް މަޝްހޫރު އެއްޗެކެވެ. މިއީ ”އެޑަޕްޓޮޖެން“ އެއްގެ ގޮތުގައި ބެލެވޭ އެއްޗެކެވެ.
އެއީ ހަށިގަނޑަށް ދިމާވާ ނުތަނަވަސްކަމާ ކުރިމަތިލުމަށް އެހީތެރިވެދޭ މާއްދާއެކެވެ. ދިރާސާތަކުން ދައްކާގޮތުގައި އަޝްވަގަންދާ ބޭނުންކުރުމުން ހަށިގަނޑުގެ ސްޓްރެސް ހޯރމޯން ކަމަށްވާ ”ކޯޓިސޯލް“ ލެވެލް ދަށްކޮށްދެ އެވެ. އަދި ނިދުމުގެ ފެންވަރު ރަނގަޅުކޮށްދޭކަން ވެސް ފާހަގަކުރެވިފައިވެ އެވެ.
2- ކުޅިވަރުގެ ހުނަރު ކުރިއެރުވުން
ކުޅިވަރު ކުޅޭ މީހުންނާއި ކަސްރަތު ކުރާ މީހުންގެ ހަށިގަނޑުގެ ވަރުގަދަކަމާއި، ނޭވާލާ ނިޒާމުގެ ފެންވަރު (VO2 max) ރަނގަޅުކުރުމަށް އަޝްވަގަންދާ އެހީތެރިވެދެ އެވެ.
މީގެ އިތުރުން، މަސްތަކުގެ ބާރުގަދަކޮށް، ބޮޑުކުރުމަށް ވެސް އެހީތެރިވެދޭ އެއްޗެއްކަން ދިރާސާތަކުން ދައްކައެވެ.
3- ނަފްސާނީ ދުޅަހެޔޮކަމަށް އެހީތެރިވުން
ބައެއް ދިރާސާތަކުން ދައްކާގޮތުގައި ޑިޕްރެޝަން، މާޔޫސްވުން، އެންޒައިޓީ ފަދަ ނަފްސާނީ ބަލިތަކުގެ އަލާމާތްތައް ކުޑަކުރުމަށް އަޝްވަގަންދާ އެހީތެރިވެދެ އެވެ. ޚާއްސަކޮށް ”ސްކިޒޮފްރީނިއާ“ Schizophrenia ފަދަ ބަލިތައް ތަހައްމަލުކުރާ މީހުންގެ ނުތަނަވަސްކަން ކުޑަކުރުމަށް މީގެ ސަބަބުން ބާރު ފޯރުވަ އެވެ.
4- ފިރިހެނުންގެ ދަރިމައިވުމުގެ ގާބިލުކަން އިތުރުކުރުން
އަޝްވަގަންދާ ބޭނުންކުރުމުން ފިރިހެނުންގެ ”ޓެސްޓޮސްޓިރޯން“ ހޯރމޯން އިތުރުވެ، ދަރިމައިވުމުގެ ފުރުސަތު ބޮޑުވާކަމަށް ދިރާސާތަކުން ދައްކަ އެވެ. މީގެ ސަބަބުން ދަރިފަނި ނުވަތަ ސްޕާމްގެ މިންވަރާއި، އޭގެ ދުވެލި ބާރުކޮށްދޭކަން ފާހަގަކުރެވިފައިވެ އެވެ.
5- ލޭގައި ހަކުރު ހުންނަ މިންވަރު ދަށްކުރުން
ހަކުރު ބަލި ހުންނަ މީހުންނާއި، ލޭގައި ހަކުރުގެ މިންވަރު މަތި މީހުންނަށް އަޝްވަގަންދާގެ ސަބަބުން ފައިދާ ކުރާކަން ދިރާސާތަކުން އެނގެ އެވެ. މިއީ އިންސިއުލިން އުފެއްދުމަށާއި، ލޭގައި ހުންނަ ހަކުރު ސެލްތަކަށް ދަމައިގަތުމަށް ބާރުއަޅާ އެއްޗެކެވެ.
6- ދުޅަހެޔޮކަން އިތުރުކުރުމާއި ދުޅަވުން ކުޑަކުރުން
ހަށިގަނޑުގެ އެކި ބައިތައް ދުޅަވުން (inflammation) ކުޑަކުރުމަށް އެހީތެރިވެދޭ މާއްދާތައް އަޝްވަގަންދާގައި ހިމެނެ އެވެ. މީގެ ސަބަބުން ހަށިގަނޑުގައި އުފެދޭ އެކި ކަހަލަ އިންފްލެމޭޓަރީ މާއްދާތައް މަދުކޮށްދެ އެވެ.
7- ސިކުނޑީގެ މަސައްކަތާއި ހަނދާންގަދަކުރުން
ސިކުނޑީގެ މަސައްކަތްތައް ހަލުވިކުރުމާއި، ހަނދާންގަދަކުރުމާއި، ސަމާލުކަން ދިނުމުގެ ޤާބިލުކަން އިތުރުކުރުމަށް އަޝްވަގަންދާ އެހީތެރިވެދެ އެވެ. މިއީ ސިކުނޑީގެ ސެލްތައް ރައްކާތެރިކޮށްދޭ ”އެންޓިއޮކްސިޑަންޓް“ ތަކުން މުއްސަނދި އެއްޗެކެވެ.
8- ނިދި ރަނގަޅުކޮށްދިނުން
ގިނަ ބަޔަކު އަޝްވަގަންދާ ބޭނުންކުރަނީ އަރާމު ނިދި ހޯދުމަށެވެ. ދިރާސާތަކުން ދައްކާގޮތުގައި މިއީ ނިދުމުގެ ފެންވަރު ރަނގަޅުކޮށްދީ، ނިދިން ހޭލާއިރު ހަށިގަނޑު ތާޒާކޮށްދޭ އެއްޗެކެވެ. ޚާއްސަކޮށް ނިދިނައުމުގެ މައްސަލަ (insomnia) ހުންނަ މީހުންނަށް މީގެ ފައިދާ ބޮޑެވެ.
ޚުލާސާ
އަޝްވަގަންދާއަކީ ހަށިގަނޑަށާއި ސިކުނޑިއަށް ބޭނުންތެރި އެތައް ފައިދާތަކެއް އެކުލެވިގެންވާ ޤަދީމީ ފަތްޕިލާވެއްޔެކެވެ. ދިރާސާތަކުން ދައްކާގޮތުގައި މިއީ ހާސްކަމާއި ނުތަނަވަސްކަން ކުޑަކުރުމަށާއި، ކުޅިވަރުގެ ހުނަރު ކުރިއެރުވުމަށާއި، ސިކުނޑީގެ ދުޅަހެޔޮކަން އިތުރުކުރުމަށް އެހީތެރިވެދޭ އެއްޗެކެވެ. މީގެ އިތުރުން، ފިރިހެނުންގެ ދަރިމައިވުމުގެ ޤާބިލުކަން އިތުރުކުރުމާއި، ލޭގައި ހަކުރު ހުންނަ މިންވަރު ކޮންޓްރޯލްކުރުމުގައި ވެސް މީގެ ދައުރު ބޮޑެވެ.
ނަމަވެސް، އަޝްވަގަންދާ ބޭނުންކުރަންވާނީ އެންމެ އެކަށީގެންވާ މިންވަރާއި ގޮތްތައް ދެނެގަތުމަށްފަހުގަ އެވެ. ޚާއްޞަކޮށް ދާއިމީ ބައްޔަކަށް ބޭސްކުރާ ފަރާތްތަކުން ނުވަތަ މާބަނޑު މީހުން މިފަދަ ސަޕްލިމެންޓްތައް ބޭނުންކުރުމުގެ ކުރިން ސިއްހީ މާހިރެއްގެ ލަފާ ހޯދުމަކީ މުހިންމު ކަމެކެވެ.
މިލިޔުން ކިޔާލުމުން
