ތައުބާވާނެ ގޮތް: ފިޔަވަޅަކުން ފިޔަވަޅަކުން 03

ތައުބާ ބަސްތަކުން ބަޔާންކުރުން: އިސްތިޣްފާރުކުރުމާއި ދުޢާކުރުން
ތައުބާގެ ޝަރުޠުތައް ހިތުގެ އަޑިން ފުރިހަމަކުރުމާއެކު، ބަސްތަކުން އެކަން ބަޔާންކުރުމަކީ އެދެވިގެންވާ ކަމެކެވެ. أستغفرالله  (މާތްﷲ ގެ ޙަޟްރަތުން ފާފަފުއްސެވުމަށް އެދެމެވެ) މިފަދައިން ގިނަގިނައިން ކިޔުމަކީ ހިތުގެ ތައުބާއަށް ދެވޭ ދިރުމެކެވެ.

ރަސޫލާ ﷺ އެކަލޭގެފާނުގެ ފާފަތައް ފުއްސަވާފައިވީ ނަމަވެސް، ދުވާލަކު ހަތްދިހަ ފަހަރަށްވުރެ ގިނައިން އިސްތިޣްފާރު ކުރެއްވި އެވެ.

އިޝްތިހާރު

މީގެ އިތުރުން ’ސައްޔިދުލް އިސްތިޣްފާރު‘ (ފާފަ ފުއްސެވުމަށް އެދޭ އެންމެ މާތް ދުޢާ) ދަސްކޮށް ކިޔުމަކީ ވަރަށް މުހިންމު ކަމެކެވެ. ތައުބާވުމަށް ވަކި ޚާއްޞަ ރަސްމިއްޔާތެއް ނުވަތަ މެދުވެރިއަކު ބޭނުމެއް ނުވެ އެވެ.

ސައްޔިދުލް އިސްތިޣްފާރު

اللَّهُمَّ أنتَ رَبِّي لا إلَهَ إلَّا أنتَ خَلَقْتَنِي وأَنا عَبْدُكَ وأَنا عِلِى عَهْدِكَ وِوِعْدِكَ ما اسْتِطَعْتُ أعُوذُ بِكَ مِن شَرِّ ما صَنِعْتُ أبُوءُ لَكَ بِنِعْمَتِكَ عَليَّ وَأبُوءُ بِذَنْبِي فَاغْفِرْ لِي فِإِنَّهُ لا يِغْفِرُ الذُّنُوبَ إلَّا أنْتَ.

ތައުބާއަކީ އަޅާއާއި ﷲ އާ ދެމެދުގައި އޮންނަ ސީދާ ގުޅުމެކެވެ. ކޮންމެ ވަޤުތެއްގައި، ކޮންމެ ތަނެއްގައި ހުރެގެންވެސް ތައުބާވެވިދާނެ އެވެ.

ތައުބާ ޤަބޫލުކުރެއްވިއްޖެކަން އެނގޭނީ ކިހިނެއް؟
ތައުބާ ޤަބޫލުކުރެއްވިއްޖެކަން އަންގައިދޭ ވަކި ޚާއްޞަ ނިޝާނެއް ނުވަތަ އިޙްސާސެއް އަންނާނެކަމަށް ކީރިތި ޤުރްއާނުގައި ނުވަތަ ޙަދީޘެއްގައި އައިސްފައެއް ނުވެއެވެ.

ޢިލްމުވެރިން އިރުޝާދު ދެއްވަނީ އެފަދަ ނިޝާނަކަށް އިންތިޒާރުކުރުމުގެ ބަދަލުގައި، އިޚްލާޞްތެރިކަމާއެކު ޝަރުޠުތައް ފުރިހަމަކޮށް، ﷲ ގެ ވަޢުދުފުޅަށް އިތުބާރުކުރުމަށެވެ.

ނަމަވެސް، ހެޔޮ ފާލެއްގެ ގޮތުގައި ބެލެވިދާނެ ކަންތައްތަކެއްވެ އެވެ.

އެއީ އުޅުމަށް އަންނަ ހެޔޮ ބަދަލެވެ. ފާފައަށް އޮންނަ ޝައުޤުވެރިކަން ކުޑަވުމާއި، އެކަމާ މެދު ނުތަނަވަސްކަން އިޙްސާސްވުމާއި، އަދި އަޅުކަންތަކަށް ހިތްޖެހުމަކީ ތައުބާގެ ފަހުން އަންނަ ހެޔޮ ބަދަލުތަކެކެވެ.

އެންމެ ރަނގަޅު ގޮތަކީ ކުރީގެ ފާފައާ މެދު އަބަދު ހާސްވުމުގެ ބަދަލުގައި، ޤަވާޢިދުން އިސްތިޣްފާރުކޮށް ތައުބާވުން އާދައަކަށް ހެދުމެވެ.