މައިންބަފައިންނަށް އިޙްތިރާމްކުރުން 06

އިސްލާމްދީނުގެ ޢާންމު އުޞޫލަކީ، ޚާލިޤުވަންތަ ﷲ އަށް އުރެދުމެއްވާ ކަމެއްގައި އެއްވެސް މަޚްލޫޤަކަށް ކިޔަމަންވުމެއް ނެތުމެވެ.

އެހެންކަމުން ދީނާ ޚިލާފު ކަމެއްގައި އެމީހުންނަށް ކިޔަމަންވާކަށް ނުޖެހޭނެ އެވެ. ނަމަވެސް އެފަދަ ޙާލަތުގައިވެސް އިންކާރުކުރަންވާނީ އޯގާތެރިކަމާއެކުގަ އެވެ. އަދި އެނޫން އެހެން ކަންކަމުގައި އެމީހުންނަށް އިޙްތިރާމްކޮށް ހެޔޮކޮށް ހިތުންމަތީ ދެމިހުންނަންވާނެ އެވެ.

އިޝްތިހާރު

މައިންބަފައިން ނިޔާވުމަށްފަހު އެމީހުންނަށް އިޙްތިރާމް އަދާކުރެވިދާނެތޯ؟

އާދެ، ރަސޫލާގެ ސުންނަތުން އެނގޭ ގޮތުގައި އެމީހުންނަށްޓަކައި އިޚްލާޞްތެރިކަމާއެކު ދުޢާކުރުމާއި، އެމީހުންގެ ނަމުގައި ޞަދަޤާތްކުރުމާއި، އެމީހުންގެ ރަޙްމަތްތެރިންނާއި ތިމާގެ މީހުންނާ ގުޅުން ބޭއްވުމާއި، އެމީހުންގެ ދަރަނިތައް އަދާކުރުމަކީ ނިޔާވުމަށްފަހުވެސް އެމީހުންނަށް އިޙްތިރާމް އަދާކުރެވޭނެ ގޮތްތަކެވެ.

މަންމައާއި ބައްޕައަށް ހެޔޮކޮށް ހިތުމުގައި ތަފާތެއްވޭތޯ؟

ދެމީހުންނަށްވެސް ހެޔޮކޮށް ހިތުމަކީ ވާޖިބެކެވެ. ނަމަވެސް އެންމެ އިސްކަންދޭންވީ ކާކަށްތޯ ސުވާލުކުރުމުން ރަސޫލާ ތިން ފަހަރުވެސް ”މަންމަ“ ގެ ނަންފުޅު ގެންނަވާފައި، ހަތަރުވަނަ ފަހަރު ”ބައްޕަ“ ގެ ނަންފުޅު ގެންނެވި އެވެ.

މީގެން ދޭހަވަނީ މާބަނޑު ދުވަސްވަރާއި، ވިހެއުމާއި، ކިރުދިނުމުގައި މަންމަ އުފުލާ ތަކުލީފުތަކުގެ ސަބަބުން މަންމައަށް ލިބިގެންވާ ޙައްޤު ބޮޑުކަމެވެ. ނަމަވެސް ބައްޕަގެ ޙައްޤަކީވެސް އުނިކުރެވޭނެ އެއްޗެއް ނޫނެވެ.