ރާއްޖެ ސުޕަ ލީގު: 2 މެޗް ބާކީ އޮއްވައި ސެމީގައި ވާދަކުރާނެ ޓީމުތައް ކަށަވަރު ވެއްޖެ

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމް ކޮއްގެން، ޒުވާނުންގެ މަރުކަޒުގެ އެތެރޭ ހޯލުގައި މިހާރު ކުރިއަށްގެންދާ ރާއްޖެ ސުޕަ ލީގު ވޮލީބޯޅަ މުބާރާތުގައި އިއްޔެ ކުޅެވުނު 2 މެޗްގެ ނަތީޖާއާއެކު، މި މުބާރާތުގެ ސެމީ ފައިނަލުގައި ވާދަ ކުރާނެ ހަތަރު ޓީމު މިވަނީ ޔަގީން ވެފަ އެވެ.

އިއްޔެގެ މެޗްތަކަށް ނިކުތުމުގެ ކުރިން ވެސް ބ.ގޮއިދޫ އަދި ލ. ފޮނަދޫ އިން ވަނީ ސެމީގެ ޖާގަ ކަށަވަރު ކޮއްފަ އެވެ.

އިޝްތިހާރު

3 ޓީމު ހިމެނޭ ގުރޫޕް ބީގައި ކުޅުނު 2 މެޗް ވެސް ކާމިޔާބުކޮށް ބ.ގޮއިދޫ ގުރޫޕުގެ އެއްވަނަ އާއެކު ސެމީގެ ޖާގަ ކަށަވަރު ކޮއްފައި ވާއިރު، ލ.ފޮނަދޫ ވެސް ކުޅުނު 2 މެޗް ކާމިޔާބުކޮށް ސެމީގެ ޖާގަ އޮތީ ޔަގީން ކޮއްފަ އެވެ.

ގޮއިދޫ އަތުން ބަލިވި ތ.ހިރިލަންދޫއާއި ކ.ތުލުސްދޫ ރޭ ބައްދަލުކުރި މެޗް ސީދާ ތިންސެޓުން ކާމިޔާބުކޮށް ގުރޫޕުގެ 2 ވަނަ ހޯދާފައި ވަނީ ހިރިލަންދޫއެވެ. މުޅި މެޗު ކޮންޓުކޮށް ހިރިލަންދޫން މި މެޗްގެ ސެޓުތައް ގެންގޮސްފައިވަނީ 19-25، 19-25 އަދި 23-25 އިން ނެވެ. މެޗުގެ މޮޅު ކުޅުންތެރިޔަކަށް ހޮވުނީ ހިރިލަންދޫގެ އާފާޤް ޚާން އެވެ.

އިއްޔެ ހަވީރު ކުޅެވުނު ގުރޫޕް އޭގެ މެޗްގައި ކ.މާފުށިގެ މައްޗަށް ހޯދި ފަސޭހަ މޮޅާއިއެކު ވ.ފެލިދޫން ވެސް ވަނީ ސެމީގެ ޖާގަ ކަށަވަރު ކޮއްފަ އެވެ.

ސީދާ 3 ސެޓުން ކާމިޔާބުކުރި މެޗުގެ ސެޓްތައް ފެލިދޫން ގެންގޮސްފައިވަނީ 25-18، 25-11، އަދި 25-19 އިންނެވެ. މެޗުގެ މޮޅުކުޅުންތެރިއަކަށް ހޮވިފައިވަނީ ފެލިދޫ ޓިމުގެ ޕާކިސްތާނު ކުޅުންތެރިޔާ މުރާދު ޖީހާން އެވެ.

ގުރޫޕް ބީގެ ވަނަތައް ކަށަވަރު ވާނީ މިއަދު ކުޅުމަށް ހަމަޖެހިފައިވާ ގުރޫޕް ސްޓޭޖުގެ ފަހު 2 މެޗަށް ފަހު އެވެ.

ކުޅުނު 2 މެޗުންވެސް ބަލިވެ، މުބާރާތުން ކަޓާފައިވާ ހދ.ހަނިމާދޫއާއި ކ.މާފުށި ބައްދަލުކުރާ މެޗް ހަވީރު 4 ޖަހާއިރު ފެށުމަށް ހަމަޖެހިފައިވާއިރު، ބ.ގޮއިދޫ އަދި ތ.ހިރިލަންދޫއާ ދެކޮޅަށް ކުޅެން ޖެހޭނެ ޓީމު ކަށަވަރުވާ މެޗުގައި ވާދަކުރާނީ ކުޅުނު 2 މެޗްވެސް ކާމިޔާބުކޮއްފައިވާ ލ.ފޮނަދޫ އާއި ވ.ފެލިދޫ އެވެ. މި މެޗް ފެށުމަށް ހަމަޖެހިފައިވަނީ މިރޭ 8:30 ގައެވެ.

މި މުބާރާތުގެ ސެމީ ފައިނަލުގެ މެޗްތައް ހޮނިހިރު ދުވަހު ކުޅޭގޮތަށް ހަމަޖެހިފައިވާއިރު، 3 ވަނަ ހޮވާ މެޗާއި ފައިނަލް މެޗް ކުޅެވިގެންދާނީ އާދީއްތަ ދުވަހު އެވެ.