ފީފާ ވޯލްޑް ކަޕްގެ ފައިނަލުގައި އާޖެންޓީނާއާ ދެކޮޅަށް ލެޓިން އެމެރިކާގެ ގައުމުތައް އެއްގަލަކަށް

ފީފާ ވޯލްޑް ކަޕް ފަދަ ބޮޑެތި މުބާރާތްތަކުގެ ފަހު މަރުހަލާތަކަށް ލެޓިން އެމެރިކާގެ ޓީމުތައް ދިއުމުން، އެ ސަރަހައްދުގެ އެހެން ގައުމުތަކުން އެ ޓީމުތަކަށް ސަޕޯޓުކުރުމަކީ އާންމުކޮށް ފެންނަ ކަމެކެވެ. ނަމަވެސް، މިފަހަރު އާޖެންޓީނާއާ މެދު ކަންތައް ހުރީ މުޅިން ތަފާތުކޮށްކަން ސޯޝަލް މީޑިއާގައި ދައުރުވަމުންދާ ޖޯކުތަކާއި ފާޑުކިޔުންތަކުން ވަރަށް ސާފުކޮށް އެނގެއެވެ.

މިގޮތުން ސޯޝަލް މީޑިއާގައި ވަރަށް ބޮޑަށް މަގުބޫލުވި އެއް ފޮޓޯއަކީ، އާޖެންޓީނާއާ ދެކޮޅަށް ފައިނަލުގައި ކުޅޭ ސްޕެއިންގެ ތަރި ލަމީން ޔަމާލް، ބްރެޒިލްގެ ޖާޒީއެއްލައިގެން ހުރި މަންޒަރު ދައްކުވައިދޭ ފޮޓޯއެކެވެ. އެ ފޮޓޯގެ ތިރީގައި ލިޔެފައިވަނީ ”ބްރެޒިލްގެ ރައްޔިތުންގެ އުންމީދު“ މިހެންނެވެ.

އިޝްތިހާރު

އާޖެންޓީނާއާ މެދު އޮތް މި ނުރުހުމަކީ ހަމައެކަނި ބްރެޒިލާއި އާޖެންޓީނާގެ ދެމެދުގައި އޮންނަ ތާރީޚީ ވާދަވެރިކަމެއް ނޫނެވެ. މެކްސިކޯ، ކޮލަމްބިއާ އަދި ޗިލީ ފަދަ ގައުމުތަކުން ވެސް އުންމީދު ކުރަނީ އާދީއްތަ ދުވަހުގެ ފައިނަލުން މެސީގެ ޓީމު ބަލިވާނެ ކަމަށެވެ. މިއީ 2022 ވަނަ އަހަރު ގަތަރުގައި އޮތް ވޯލްޑް ކަޕްގައި ވެސް ފެނިގެންދިޔަ ކަމެކެވެ.

ކޮލަމްބިއާގެ ސޯޝިއޮލޮޖިސްޓެއް ކަމަށްވާ ޖާމަން ގޯމޭޒް ގަބޫލުކުރާ ގޮތުގައި، އާޖެންޓީނާއާ އެކު އޮތް ”އެއްބައިވަންތަކަމުގެ ރޫހު“ މިހާރު ވަނީ ގެއްލިފައެވެ. އޭނާ ފާހަގަކުރި ގޮތުގައި، ސޯޝަލް މީޑިއާގެ ސަބަބުން އާޖެންޓީނާއަކީ ފީފާގެ ”އުނގު ކުއްޖާ“ ކަމަށް ބުނާ ވާހަކަތަކަށް ވަނީ ބޮޑު ތަރުހީބެއް ލިބިފައެވެ. ބައެއް ސަޕޯޓަރުން ބުނާ ގޮތުގައި އާޖެންޓީނާއަށް ރެފްރީންގެ އެހީތެރިކަން ވަރަށް ބޮޑަށް ލިބެއެވެ.

ބްރެޒިލްގެ ސަޕޯޓަރަކު ބުނި ގޮތުގައި، ބްރެޒިލަށް މުބާރާތް ކާމިޔާބު ނުކުރެވޭ ނަމަ، އާޖެންޓީނާއިން ހަތަރުވަނަ ފަހަރަށް ތަށި އުފުލުމަށްވުރެ، ސްޕެއިން ދެވަނަ ފަހަރަށް ޗެމްޕިއަންކަން ހޯދުމަށް އޭނާ މާ ބޮޑަށް އެދެއެވެ. ފާޑުކިޔާ ފަރާތްތަކުން ބުނާ ގޮތުގައި، އާޖެންޓީނާއާ އެއްކޮޅަށް ޕެނަލްޓީ ދިނުމާއި، އިދިކޮޅު ޓީމުތަކަށް ރަތް އަދި ރީނދޫ ކާޑު ދެއްކުމުގައި ރެފްރީންގެ އިންސާފުވެރިކަމެއް ނެތެވެ.

މެކްސިކޯގެ ފުލުހެއް ކަމަށްވާ އެންޓޯނިއޯ ލޮޕޭޒް ބުނި ގޮތުގައި، މެސީއަކީ ފުޓުބޯޅައިގެ ”ލެޖެންޑެއް“ ކަމަށް އޭނާ ގަބޫލުކުރެއެވެ. ނަމަވެސް، ޗެމްޕިއަންކަން ހޯދަންވާނީ ދަނޑުމަތީގައި ބުރަ މަސައްކަތް ކޮށްގެން ކަމަށާއި، ރެފްރީންގެ އެހީގައި ހޯދާ ކާމިޔާބީ ބަލައިނުގަނެވޭނެ ކަމަށް އޭނާ ބުންޏެވެ.

މީގެ އިތުރުން، ސިޔާސީ ސަބަބުތަކާއި ނަސްލީ ތަފާތުކުރުންތަކުގެ ތުހުމަތުތަކަކީ ވެސް އާޖެންޓީނާއާ މެދު ނުރުހުން އުފެދެން ދިމާވި ސަބަބުތަކެކެވެ. އާޖެންޓީނާގެ ރައީސް ހާވިއޭ މިލެއިގެ ސިޔާސަތުތަކަށް ނުރުހޭ މީހުން ވެސް މަދެއް ނޫނެވެ. އަދި އާޖެންޓީނާގެ ބައެއް ކުޅުންތެރިންނާއި ސަޕޯޓަރުންގެ ފަރާތުން ފެނިފައިވާ ނަސްލީ ތަފާތުކުރުންތަކުގެ އަމަލުތަކަކީ ވެސް ގިނަ ބައެއްގެ ފާޑުކިޔުން އަމާޒުވެފައިވާ ކަމެކެވެ.

މި ހުރިހާ ފާޑުކިޔުންތަކާ ގުޅޭގޮތުން މެސީ ބުނެފައިވަނީ، އެއްވެސް މީހަކު އެމީހުންނަށް ހިލޭ އެއްޗެއް ދީފައި ނުވާނެ ކަމަށާއި، އަނެއްކާވެސް އެންމެ މޮޅު ދެ ޓީމުގެ ތެރޭގައި އެމީހުން ހިމެނިފައިވަނީ ބުރަ މަސައްކަތުން ކަމަށެވެ. އަދި އެކަމާ ”ދެރަވާ ބަޔަކު ދެރަވިޔަސް ވަރިހަމަ“ ކަމަށް އޭނާ ބުންޏެވެ.

އާޖެންޓީނާއާ މެދު އޮތް މި ނުރުހުމުގެ ފައިދާ ނަގައިގެން ބައެއް ވިޔަފާރިތަކުން އިޝްތިހާރުތައް ވެސް ވަނީ ތައްޔާރުކޮށްފައެވެ. އެހެންނަމަވެސް، އެމެރިކާގައި ކުރިއަށްދާ ޕްރެކްޓިސްތަކުގައި އާޖެންޓީނާއަށް އޮތް ތަރުހީބަކަށް ބަދަލެއް ނާދެއެވެ. އަދި ބައެއް ސަޕޯޓަރުން އަދިވެސް ގަބޫލުކުރަނީ، ދެކުނު އެމެރިކާގެ ގައުމަކަށްވާތީ އާޖެންޓީނާއަށް ސަޕޯޓުކުރުމަކީ އޮތް ރޫހީ ޒިންމާއެއް ކަމަށެވެ.