ފަލަސްތީނަށް ދެމުންދާ ހަމަލާތަކާ ދެކޮޅަށް ދިވެހި ސަރުކާރުން ތެދުވުމަށް ޕީޕީއެމް އިން ގޮވާލައިފި

އިސްރާއިލް ސިފައިން ފަލަސްތީނަށް ދެމުންދާ ހަމަލާތަކާ ދެކޮޅަށް ދިވެހި ސަރުކާރުން ތެދުވުމަށް ޕީޕީއެމް އިން ގޮވާލައިފި އެވެ.

ރާއްޖޭގެ އިދިކޮޅު އެންމެބޮޑު ޕާޓީން މިކަމަށް ގޮވާލީ ނެރުނު ނޫސް ބަޔާނެއްގަ އެވެ.

އިޝްތިހާރު

އެ ނޫސް ބަޔާނުގައި ބުނެފައިވަނީ މުސްލިމުންގެ ފުރަތަމަ ޤިބުލަ ކަމުގައިވާ މާތްވެގެންވާ މަސްޖިދުލް އަޤްސާއަށް އިސްރާއީލުގެ ސިފައިން ވަދެ އެތަނުގެ ޙުރުމަތް ކަނޑާ ހުޅު ޖަހާ، އެތަނުގައި ނަމާދުކޮށް އަޅުކަން ކުރުމަށް ހުރަސް އެޅުން އެންމެހަރުކަށި ޢިބާރާތުން ކުށްވެރިކުރާ ކަމަށެވެ. އަދި އަޅުކަމުގައި ތިބި މުސްލިމުންނާއި ދެކޮޅަށް ދެމުން ގެންދާ ލާއިންސާނީ އުދުވާނީ ހަމަލާތައް ވެސް އެންމެ ހަރުކަށި އިބާރާތުން ކުށްވެރިކުރާ ކަމަށެވެ.

“ ފަލަސްތީނުގެ މުސްލިމުންނާއި މެދު އިސްރާއިލްގެ ސިފައިން ހިންގަމުން ގެންދާ އަނިޔާވެރި ލާއިންސާނީ ޢަމަލުތަކަށް މިކޯލިޝަނުން ދެކޮޅު ހަދާ، ޕްރޮގްރެސިވް ޕާޓީ އޮފް މޯލްޑިވްސް ގެ ރައީސް، ރައީސް ޢަބްދުﷲ ޔާމީން ޢަބްދުލްޤައްޔޫމާއި މި ކޯލިޝަނަށް ނިސްބަތްވާ ދެ ޕާޓީގެ އެންމެހާ މެންބަރުންގެ ނަމުގައި ހަމްދަރުދީ ފާޅުކުރަމެވެ. މިކޯލިޝަނުން އަބަދުވެސް ދެމި އޮންނާނީ ޙައްޤުގެ މަގުގައި ތިބި މުސްލިމް ރައްޔިތުންނާއި އެކު ކަމުގައިވެސް ދެންނެވީމެވެ.“ ޕީޕީއެމް ގެ ބަޔާނުގައި ބުެފައި ވެއެވެ.

މީގެ އިތުރުން މާތްވެގެންވާ ރަމަޟާން މަހުގެ ފަހު ދިހައެއްގެ އަޅުކަން އަދާ ކުރުމަށް ހުރަސް އަޅާ ފަލަސްތީނުގެ ބިންތަކަށް ވެރިވެގަނެ، އިސްރާއީލްގެ ސިފައިން ހިންގަމުން ގެންދާ އަނިޔާވެރި ލާއިންސާނީ އުދުވާންތަކާއި ދެކޮލަށް މިހާތަނަށް އައި އިރުވެސް ދިވެހި ސަރުކާރުން ބަހެއް ނުބުނެ ތިބުމަކީ އެކަމާ ދިވެހި ރައްޔިތުން އިންތިހާއަށް ހިތާމަ ކުރާ ކަމެއް ކަމަށް ވެސް ޕީޕީއެމް ގެ ބަޔާނބުގައި ވަނީ ބުނެފަ އެވެ.

އެހެން ކަމުން އިސްރާއީލްގެ ސިފައިން ފަލަސްތީނުގެ ބިންތަކަށް ވެރިވެގަނެ ޚާއްސަ ގޮތެއްގައި މާތްވެގެންވާ އަޤްޞާ މިސްކިތުގެ ޙުރުމަތް ކަނޑާ އެތަނުގައި އަޅުކަން ކުރުމަށް ހުރަސް އަޅާ، ހިންގަމުން ގެންދާ އަނިޔާވެރި ލާއިންސާނީ ޢަމަލުތަކާއި ދެކޮޅަށް ދިވެހި ސަރުކާރުން ބަސް ބުނުމަށް އެ ލިޝަނުން ގޮވާލާ ކަމަށް ވަނީ ބުނެފަ އެވެ. އަދި އެ ޢަމަލުތައް ހުއްޓުވުމަށްޓަކައި ދުނިޔޭގެ ބާރުގަދަ ޤައުމުތަކާއި އެކު ދިވެހި ސަރުކާރުން އިސްވެ މަސައްކަތް ކޮށްދެއްވުމަށްވެސް ގޮވާލާފައި ވެއެވެ.

މިފަދަ ޓެރަރިސްޓު ޙަމަލާތަކާއި ދެކޮޅަށް ސަރުކާރު ފެންވަރުގައި ކުރެވެން ހުރި ކޮންމެ ކަމެއް ކުރުމަކީ ދިވެހި ރައްޔިތުން މިއަދު ސަރުކާރުގެ ކިބައިން އެދޭ އެންމެ ބޮޑު އެދުން ކަމަށް ވެސް ޕީޕީއެމް އިން ނެރުނު ބަޔާނުގައިި ބުނެފައި ވެއެވެ.