ރާޖް ކަޕޫރާއި ދިލިޕް ކުމާރްގެ ގެތަށް ސަރުކާރަށް ނެގުމަށް ޕާކިސްތާނުން މަސައްކަތް ފަށައިފި

ކުރީގެ މަޝްހޫރު ބޮލީވުޑް ފިލްމީ ތަރިން ކަމުގައިވާ ދިލިޕް ކުމާރު އަދި ރާޖް ކަޕޫރުގެ އާސާރީ ގެތަށް ދައުލަތަށް ރަސްމީކޮށް ނެގުމުގެ މަސައްކަތް ފަށާފައިވާ ކަމަށް ޕާކިސްތާންގެ ޚައިބާރް ޕަޚްތުންޚްވާ ޕްރޮވިންސްގެ ސަރުކާރުން ބުނެފިއެވެ.

ކޭ.ޕީ ޕްރޮވިންސް އިން ބުނެފައި ވަނީ، އެ ޕްރޮވިންސްގެ ހިތްގައިމު ހިސާބުގައިވާ މި ދެ ތަރިންގެ އާސާރީ ގެތަށް ނަގަން ބޭނުންވަނީ އެ އިމާރާތްތަށް ދާރުލް އާޘާރަކަށް ހެދުމަށް ކަމަށެވެ.

އިޝްތިހާރު

މިހިނގާ މޭ މަހުގެ 18 ވަނަ ދުވަހު މި ގެތަކުގެ ވެރިން ހާޒިރުވުމަށް އަންގައި، ޕެޝާވަރުގެ ޑެޕިއުޓީ ކޮމިޝަނަރ ޚާލިދް މަހްމޫދް ވަނީ ފާއިތުވި ބުދަ ދުވަހު ގެތަކުގެ ވެރިންނަށް ނޯޓިސް ވެސް ފޮނުވާފައިއެވެ.

މކޭޕީ ސަރުކާރުން މި ހަވޭލީ ތަކަށް ކަނޑައަޅާފައިވާ އަގާމެދު ޚިޔާލު ހުށަހަޅުމުގެ ފުރުސަތު ހަވޭލީތަކުގެ ވެރިންނަށް މިހާރު ވަނީ ހުޅުވާލާފައެވެ. އެގޮތުން މިހާރު ކަނޑައަޅާފައިވާ އަގު މަތިކުރުމުގެ އަމުރު ޕްރޮވިންޝަލް ސަރުކާރުން ނުވަތަ ކޯޓަށް ނެރެވިދާނެއެވެ.

ދާރުލް އާޘާރަކަށް ހެދުމަށް ޓަކައި ކަޕޫރް އަދި ކުމާރުގެ ހަވޭލީ ގަންނަ އަގުގެ ގޮތުގައި ކޭޕީ ސަރުކާރުން ކުރިން ކަނޑައަޅާފައިވާ އަގުތަކަކީ 1.5 މިލިއަން ރުޕީސް އާއި 80 ލައްކަ ރުޕީސްއެވެ. އެހެންނަމަވެސް ކަޕޫރް ހަވޭލީގެ ވެރިޔާ އަލީ ޤާދިރް 20 މިލިއަން ރުޕީސް ދިނުމަށް ހުށަހަޅާއިރު ކުމާރް ހަވޭލީގެ ވެރިޔާ ޤުލް ރަޙްމާން މޮޙްމަންދް ބުނަނީ ސަރުކާރުން އޭނާގެ ހަވޭލީ ގަތުމަށް މާކެޓް ރޭޓް ކަމުގައިވާ 3.50 މިލިއަން ދޭން ޖެހޭނެ ކަމަށެވެ.

ޚައިބަރް ޕަޚްތުންޚްވާގެ އާކިއޮލޮޖީ އެންޑް މިއުޒިއަމްސް ޑިޕާޓްމަންޓްގެ ޑިރެކްޓަރ ޑރ ޢަބްދުއްސަމަދް ބުނެފައި ވަނީ، ހަވޭލީތަކުގެ މިލްކުވެރިކަން ލިބުމުން ފިތްރް ޢީދު ފަހުން ހަވޭލީތައް މަރާމާތު ކުރުމުގެ މަސައްކަތް ފަށާނެ ކަމަށެވެ.

ކަޕޫރް ހަވޭލީ ބިނާ ކޮށްފައި ވަނީ ކޭޕީގެ ޤިއްސާ ޚްވާނީ ބާޒާރްގައި މީލާދީއިން 1918 އާއި 1922 އާއި ދެމެދުއެވެ. މި ހަވޭލީ ބިނާ ކޮށްފައި ވަނީ ރާޖް ކަޕޫރްގެ ކާފަ ދިވާން ކަޕޫރެވެ. ރާޖް ކަޕޫރާއި އޭނާގެ ބޮޑުބޭބެ ތްރިލޯކް ކަޕޫރް އުފަން ވެފައި ވަނީ އެ ހަވޭލީގައިއެވެ. މިހާރު ޕްރޮވިންޝަލް ސަރުކާރުން ވަނީ އެއީ އާޘާރީ ތަރިކައެއް ގޮތުގައި ކަނޑައަޅާފައެވެ.

މަޝްހޫރު އެކްޓަރު ދިލިޕް ކުމާރުގެ 100 އަށްވުރެ ގިނަ އަހަރުވީ ހަވޭލީ ވެސް ހުންނަނީ ހަމަ އެސަރަހައްދުގަ އެވެ. އެ ހަވޭލީ ބާވެ ވީރާނާ ވާން ފެށުމުން އާޘާރީ ތަރިކައެއް ކަމުގައި ކަނޑައަޅާފައި ވަނީ ނަވާޒް ޝަރީފްގެ ވެރިކަމުގައި 2014 ވަނަ އަހަރުއެވެ.

މީގެ ކުރިން މި ހަވޭލީތަކުގެ ވެރިން ވަނީ އެ އިމާރާތްތައް ތަޅާލައި، އެތާނގައި ކޮމާޝަލް ޕްލާޒާ އެލުމަށް މަސައްކަތް ކޮށްފައެވެ. ނަމަވެސް އާކިއޮލޮޖީ ޑިޕާޓްމަންޓުން ވަނީ އެމަސައްކަތް ހުއްޓުވާފައެވެ.