ވެލިދޫއިން 16 ފަތުރުވެރިން ޕޮޒިޓިވްވެ، ރަށް މޮނިޓަރިންއަށް ލައިފި
ނ. ވެލިދޫއިން 16 ފަތުރުވެރިން ކޮވިޑް-19 އަށް ޕޮޒިޓިވްވެ، އެރަށް މޮނިޓަރިންއަށް ލައިފި އެވެ.
އެރަށު ކައުންސިލުން ބުނީ ޕޮޒިޓިވް ވެފައިވަނީ އެރަށުގައި ޗުއްޓީ ހޭދަކުރަމުންދާ 16 ފަތުރުވެރިން ކަމަށެވެ. އަދި އޭގެ ތެރޭގައި ގިނައީ ޕާކިސްތާނަށް ނިސްބަތްވާ ފަތުރުވެރިން ކަމަށެވެ.
”އެމީހުން ޕޮޒިޓިވްވީ ފުރުމުގެ ކުރިން ނެގި ސާމްޕަލުން. އެ ސާމްޕަލްތަކުގެ ނަތީޖާ ލިބުނީ ރޭގެ ވަގުތެއްގަ. އެހެންވެ ރެއިން ފެށިގެން އެރަށް އޮތީ މޮނިޓަރިންގަ.“ ވެލިދޫ ކައުންސިލުން ބުންޏެވެ.
އެ ފަތުރުވެރިންނާއި ކޮންޓެކްޓްވި މީހުން ދެނެގަތުމަށް ކޮންޓެކްޓް ޓްރޭސިންގެ މަސައްކަތް ކުރަމުން އަންނަ އިރު، މިހައިތަނަށް 30 ކޮންޓެކްޓުން ފާހަގަކުރެވިފައިވާ ކަމަށް ވެސް ކައުންސިލުން ބުންޏެވެ. އަދި އެމީހުންގެ ސާމްޕަލްވެސް ނަގާފައިވާ ކަމަށް ބުންޏެވެ.
މީގެ އިތުރުން ޕޮޒިޓިވްވި ފަތުރުވެރިން އެރަށުގެ ބައެއް ފިހާރަތަކަށާއި ހޮޓާ، ރެސްޓޯރެންޓްތަކަށްވެސް ގޮސްފައިވާ ކަމަށް ވެސް ވެލިދޫ ކައުންސިލުން ވަނީ ބުނެފަ އެވެ.
މިލިޔުން ކިޔާލުމުން
